Депутаттар менен жолугушууда Садыр Жапаров өкмөттүн жаңы программасын кийинчерээк Жогорку Кеңешке сунуштай тургандыгын айтты. Ал мурдагы өкмөттүн программасы менен дагы деле тааныштырып жаткандыгын белгиледи. Түзүм дагы өзгөрүүсүз калган. Бирок министрлер кабинетинин курамы дээрлик толугу менен жаңыртылды.

Өкмөттүн курамы:

Биринчи вице-премьер-министр – Артем Новиков;
Вице-премьер-министр – Равшан Сабиров;
Вице-премьер-министр – Максат Мамытканов;
Вице-премьер-министр – Аида Исмаилова;
Тышкы иштер министри – Руслан Казакбаев;
Юстиция министри – Марат Жаманкулов;
Ички иштер министри – Улан Ниязбеков;
Каржы министри – Кыялбек Мукашев;
Экономика министри – Санжар Муканбетов;
Айыл чарба, тамак-аш өнөр жайы жана мелиорация министри – Эркинбек Чодуев;
Транспорт жана жолдор министри – Бакыт Бердалиев;
Өзгөчө кырдаалдар министри – Бообек Ажикеев;
Билим берүү жана илим министри – Алмазбек Бейшеналиев;
Саламаттыкты сактоо министри – Алымкадыр Бейшеналиев;
Маданият, маалымат жана туризм министри – Нуржигит Кадырбеков;
Эмгек жана социалдык өнүгүү министри – Улукбек Кочкоров;
министр рангындагы өкмөттүк аппараттын башчысы – Бакыт Аманбаев;
Өнөр жай, энергетика жана жер казынасын пайдалануу мамлекеттик комитетинин төрагасы – Жыргалбек Сагынбаев;
Маалыматтык технологиялар жана байланыш мамлекеттик комитетинин төрагасы – Алтынбек Исмаилов.

Буга чейин Садыр Жапаров буйрукка кол койгон, ага ылайык Сагынбек Абдылдаев Экономикалык кылмыштарга каршы күрөшүү боюнча мамлекеттик кызматтын (каржы полициясы) төрагасы, ал эми Аскат Эгембердиев Жазаларды аткаруу мамлекеттик кызматынын төрагасы болуп дайындалган. Алтынбек Торутаев Мамлекеттик бажы кызматынын төрагасы кызматынан бошотулуп, Элнура Мамбетжунушева жаңы жетекчи болуп дайындалды. Өкмөттүн басма сөз кызматы билдиргендей, чечим Матраимовдордун үй-бүлөсүнүн «балдарын» бажы органдарындагы иштен четтетүү жана алар белгилеген коррупциялык схемаларды жоюу максатында кабыл алынды.

Жогорку Кеңештин токтомдору президенттин аппаратына жөнөтүлөт. Мамлекет башчысы тиешелүү жарлыкка кол койгондон кийин өкмөт дайындалды деп эсептелет.

14-октябрда эртең менен Кыргыз Республикасынын Президенти Сооронбай Жээнбеков Жогок Кеңешинин жаңы шайланган төрагасы Канат Исаевге кат менен кайрылганы белгилүү болду. Анда премьер-министрликке талапкер Садыр Жапаров тарабынан 10-октябрда сунушталган Жогорку Кеңештин программасын бекитүү, өкмөттүн түзүмүн жана курамын аныктоо боюнча чечимдери, учурдагы мыйзам бузууларга байланыштуу президенттик аппарат тарабынан парламентке кайтарылып берилгени айтылган. Жээнбеков бул маселени Жогорку Кеңештин кийинки жыйынында белгиленген тартипте кароону сунуштады.

Эскерте кетсек, 10-октябрда депутаттар кезексиз жыйынга чогулуп, Садыр Жапаровдун өкмөтүнүн программасын, курамын жана түзүмүн бекиткен. Бирок, андан кийин дароо эле айрым депутаттар, саясатчылар жана юристтер отурумда кворум жок экендигин, андыктан чечим легитимсиз болгонун билдиришти. Жапаров тарап, өз кезегинде, ал мыйзамдуу шайланган деп жүйө келтирди. Вице-спикер Мирлан Бакиров өкмөттүн программасын, курамын жана түзүмүн бекитүү жөнүндө жарлыкка кол коюп, Президенттин аппаратынын кароосуна жөнөттү. Бирок Сооронбай Жээнбеков дайындоо тууралуу жарлыкка кол койгон жок жана жыйында кворум жоктугун эске алып, документтерди Жогорку Кеңешке кайтарып берди.

If you have found a spelling error, please, notify us by selecting that text and pressing Ctrl+Enter.