Categories

Ташкөмүр шаарына жаңы мэр шайланды

Бүгүн 2-декабрда Ташкөмүр шаардык кеңешинин сесиясы болду.
Анда
Борбордук шайлоо комиссиясынын чечимине ылайык шаар башчысын шайлоо өттү.
Атаандаштыктын негизинде өткөн бул шайлоого эки талапкер катышты. Алар “Ата-Журт” партиясынан Добулбеков Нурлан жана “Ташкөмүр жаштары” партиясынан Эрик Орозбаев.
Сессияга катышкан 30 депутаттын 18 и Добулбеков Нурланга добуш беришип, жыйынтыгында Добулбеков Нурлан шаар мэрлигине шайланды. Шаар башчылыгына келген 49 жаштагы Добулбеков Нурлан кесиби боюнча энергетик.
Буга чейин ал Жогорку окуу жайларында окутуучу, жеке курулуш компаниясында жетекчи болуп эмгектенген.

 
Categories

NewTV каналы Баткен, Өзгөн, Токтогул аймактрында кайрадан ободо

NewTV каналы 1-декбрдан тарта БАТКЕН, ӨЗГӨН, ТОКТОГУЛ, КАРА-КӨЛ аймактарында жайгашкан станциаларынан өз эфирлерин кайрадан чагылдыра баштады.
NewTV [new television] бренди менен таанымал “2 Канал” ЖЧКсы Кыргыз Республикасындагы динамикалуу өнүгүп келе жаткан телеканал болуп саналат. Биздин канал күн сайын коомдогу орчундуу темаларды түз эфирде саясий, социалдык жана көңүл ачуучу берүүлөр менен чагылдырып турат. Саат сайын түз эфирде өлкө аймагындагы акыркы жаңылыктар кыргыз жана орус тилдеринде көрсөтүлөт. Эфирдин күнүмдүк көлөмүн 17 саатты түзсө, анын 9-10 саатын өздүк контентте даярдалган эфирлер камтыйт. NewTV каналы өлкөнүн бүткүл аймагына биринчилерден болуп жогорку сапаттагы full HD форматында заманбап санариптик берүүдө чыгып баштаган. Биздин телеканал 2017-жылдын сентябрь айынан тарта Европа жана Азия континеттеринин 80ден ашуун өлкөлөрүндө спутник аркылуу өз көрөрмандарынын аймагын кеңейте алды. Чыгармачыл жамаат ар дайым телеканалдын мыкты болушуна жана өнүгүшүнө тынымсыз изденүү менен аракет жасайт. Өлкөдө чыныгы демократиялуу коомду курууга, жарандарды ачык жана так маалымат менен камсыздоодо телеканалдын ролу чоң деп ойлойбуз. Эң башкысы чагылдырылган маалыматтар обьективдүү, жеткиликтүү, ар-тараптуу жана актуалдуу болушу телеканалдын редакциялык саясатынын ажырагыс бир бөлүгү болуп эсептелет.
Урматтуу көрарман эгер ушул аймактарда биздин каналды көрүп жаткандар болсо же ушул аймакта көрсөтпөй калган учур болсо, анда биздин төмөнкү Whatsapp номерибизге кабарлап койсоңуздар болот.
https://wa.me/996772987007
жагымдуу көрүү каалайбыз.
 
NewTV жаңылыкты биз менен көр
 
Байланыш
 
Телефон: 0312 56 46 20 Жарнама бөлүмү (Рекламный отдел)
Т: 0312 56 66 56
Түз эфир: 0312 56 56 72
0772 98 70 07
WhatsApp Мобилдүү репортер: 0772 98 70 07 WhatsApp (жаңылыктар бөлүмү)
 
Categories

УЛУТТУК БАНК ДАГЫ ИНТЕРВЕНЦИЯ ЖАСАДЫ

Улуттук банк кечээ, 1-декабрда 5 миллион 250 миң доллар сатты. Бул тууралуу мекеменин сайтында айтылат. АКШ акчасынын курсу өзгөрүүсүз бойдон турат. 1 доллар сатыкта 84,9 сом, ал эми сатып алууда үч тыйынга өскөн. Ноябрда Улуттук банк 11 ирет интервенция жасаган. Муну менен узаган айда Улуттук банк 84 миллион 750 миң доллар сатканы белгилүү болду. Алтын валюталык запас Улуттук банкка сомдун баасын кармап турууга жардам берет. Резервдин көлөмү дээрлик 3 миллиард долларды түзөт. Бул алты айга чейин товарларды жана кызматтарды импорттоого жетиштүү.

 
Categories

АЗЫК-ТҮЛҮК АРЗАНДАЙБЫ?

Премьер-министрдин милдетин аткаруучу Артем Новиков Бишкек шаарынын мэринин милдетин аткаруучу Балбак Түлөбаевди кабыл алып, ага калаанын ар бир районунда айыл чарба азыктары сатылчу жарманке ачуу тапшырмасын берди. Бул тууралуу өкмөттүн маалымат кызматынан билдиришти. Новиковдун айтымында, социалдык маанилүү товарлардын кескин кымбаттап кетиши тургундарды бир топ ыңгайсыз абалга кептеп жатат. Андыктан тез арада абалды жөнгө салуу боюнча аракеттер көрүлүшү керек. “Бул үчүн бир жуманын ичинде Бишкектин ар кайсы жерлерине фермерлердин, даяр азык-түлүк өндүргөн ишкерлердин жана ири импортерлордун товарлары сатылган жарманкелер ачылышы керек. Фермерлер менен ишкерлер жарманкеде өз товарларын үстүнө көп акча кошпой, дүң баа менен берүүгө даяр. Ири соода борборлору жарманке үчүн өздөрүнүн аймагынан орун берүүгө макулдугун беришкен”, – деди Новиков. Ал эми Түлөбаев мындай жарманкелерге даярдык жүрүп жатканын жана ага катышууга 200дөй өндүрүүчү макул болгонун билдирди.

 
Categories

ЭМИ КЫТАЙДАН КӨБҮРӨӨК ЖҮК ТАШЫЛАТ

Премьер-министрдин милдетин аткаруучу Артем Новиков Кытайдын Кыргызстандагы элчиси Ду Дэвэнь менен жолугуп, натыйжада жүк ташуунун агымы 3-декабрдан тарта көбөйтүлөрү маалым болду. Бул туурасында өкмөттүн маалымат кызматы билдирди. Элчи кыргыз тараптын бир нече ирет кайрылуусуна жана Новиков менен 25-ноябрдагы жолугушуусунан соң “Эркечтам” жана “Торугарт” көзөмөл-өткөрүү пунктуларынын өткөрүү жөндөмдүүлүгүн жогорулатуу боюнча бир катар кеңешмелер өткөрүлгөнүн маалымдаган. Анын жыйынтыгы менен кытай тарап жумуш убактысын 8ден 12 саатка чейин көбөйтүү, ошондой эле өткөрмө пунктун дем алышсыз иштөө режимине өткөрүүнү сунуштаган. “Жүк ташыган автоунаалардын саны болжол менен суткасына 30га көбөйөт. Элчи “Эркечтам” өткөрмө пунктундагы инфраструктураны жакшыртуу, өткөрүү жөндөмдүүлүгүн жогорулатуу максатында кытай тарап эки кампа куруу, контейнер үчүн кран орнотуу тууралуу чечимин кабыл алгандыгын кабарлады”, – деп айтылат маалыматта. Новиков маселе ыкчам чечилгени үчүн ыраазычылык билдирип, кыргыз өкмөтү кытай тараптын көзөмөл-өткөрүү пунктуларын жакшыртуу максатында кабыл алынып жаткан бардык аракеттерин колдоого алууга даяр экендигин белгилеген.

 
Categories

АКШ ЭЛЧИЛИГИ МАТРАИМОВГО КОЗГОЛГОН КЫЛМЫШ ИШИН КУБАТТАДЫ

АКШнын Кыргызстандагы элчилиги мамлекеттик бажы кызматынын мурдагы орун басары Райымбек Матраимовго кылмыш ишинин козголушун кубаттаган пикирин “Твиттердеги” расмий баракчасына жарыялады. Билдирүүдө “АКШ элчилиги Кыргызстандын Улуттук коопсуздук боюнча мамлекеттик комитетинин Райымбек Матраимовго каршы козгогон ишинде башка катышуучулар да пайда болгонун белгилейт. Тергөө жана өкүм – уюшкан кылмыштуулукка каршы күрөштүн ачкычы. Элдин ырыскысын уурдагандардын баары сот алдында жооп берерин камсыздайт”, – деп жазылган. Кыргызстандын Улуттук коопсуздук комитети Райымбек Матраимовдун үстүнөн тергөө-иликтөө иштери уланып жаткандыгын, бул иштин алкагында коррупциялык схемага башка бажы кызматкерлеринин катыштыгы бардыгы аныкталганын билдирген.

 
Categories

ПОЭЗИЯ САПТАРЫ

Гүлайым Калыбекова. 1991-жылы Нарын районуна караштуу Миӊ-Булак айылында төрөлгөн. 2009-жылы Актан Тыныбек атындагы орто мектепти ийгиликтүү аяктаган. И. Арабаев атындагы Кыргыз мамлекеттик университетинин мамлекеттик тил жана маданият институтун бүтүрүп, кыргыз тили жана адабияты мугалими адистигине  ээ болгон. Мектеп жашынан бери райондук, облустук, республикалык кароо сынактарга катышып, алдыңкы орундарга ээ болуп келет. Алардын бири Кыргыз радиосунун 80 жылдыгына карата уюштурулган “Таланттар таймашы” сынагында баш байгеге ээ болгон. Эл аралык “Нурборбор” чыгармачыл жаштар академиясынын мүчөсү. “Кыял чабыттары” ыр жыйнагынын автору. Ырлары альманахтарга, антологияларга жарыяланган. Учурда журналистика тармагында үзүрлүү эмгектенип келет. Эки кыздын энеси.

ПОЭЗИЯ САПТАРЫ

***

Мен сени эмнеге сүйѳрүм,

Белгисиз болмоктур бир ѳмүр.

Сен ѳскѳн тоолорду кѳргѳндѳ

Себебин таптым мен жүйѳѳлүү.

 

Кайгыны тоготпос кубатың,

Калдайган карылуу кулачың.

Кайратың тоолордон бүтүптүр,

Калканчым, тоом болуп турасың.

 

Кармашкан адамды жалынтар,

Каныңда ойногон жалын бар.

Шар жүргѳн, шамдаган мүнѳзгѳ,

Шар аккан суулардан салым бар.

 

Сендеги жайлоонун илеби

Сергитет дүйнѳмдү. Билемин

тоолуктун топуктуу пейили,

Толтурат бүт кемин дүйнѳнүн.

 

ПОЭЗИЯ САПТАРЫ

Жаным балам

Жаны бүткѳн жан дүйнѳмѳ ѳрүлүп,

Жаным балам жандан чыккан бѳлүнүп.

Анык бакыт даамын сенден таттым да,

Калдым жашап, мээрим болуп тѳгүлүп.

 

Жаным балам, жыты сенсиң бейиштин,

Жанымдасың, кереги жок кейиштин.

Күлүп турса күнгѳ тете кѳздѳрүң,

Бактым болот кѳлѳмүндѳй деңиздин.

 

Бал тилинен толукталып байлыгым,

Балам үчүн ѳтѳт күнүм, ай, жылым.

Билек түрүп, жүрѳк күтүп тайманбас,

Балам үчүн жасагым бар бардыгын.

 

Жаным балам, келечектин жүзүсүң,

Жалтанбаган үмүтүмдүн күчүсүң.

Жаркыраган күлкүң күн да, жүзүң нур,

Жан сергиткен жашоомдун түр түсүсүң.

 

***

Келген соң дүйнѳнү кыдырып,

Бүткѳн соң баарына кызыгып.

Кѳѳдѳндѳ тынчыбас бук калса

Кенкени бекерге тирүүлүк.

 

Кылса да чатырды башпаана,

Зыянын тийгизбей башкага.

Жашаган адамга суктанам

Толкубас токко да, ачкага.

 

Жүрбѳстѳн дүнүйѳ кууп жүгүрүп,

Жүрѳктѳн тынчына сүйүнүп.

Жашаган жан гана бактылуу

Жалтанбай Аллага жүгүнүп.

ПОЭЗИЯ САПТАРЫ

Шамал

Алыс-жуук деп аралыкты бөлбөгөн,

Багытынан артка кайтып көрбөгөн.

Шамал экен эркиндиктин символу,

Түр өзгөртүп төрт мезгилге көнбөгөн.

 

Качан болсо каалаганы эркинде,

Дарек сурап кайрылбастан эч кимге.

Шамал гана көз ирмемде айланып,

Саякаттай алат чексиз мейкинге.

 

Чимирилтип куюн деген ийигин,

Тоготпостон зоокалардын бийигин.

Шамал гана эркин ашып өтө алат

Басып туруп аскалардын ийинин.

 

Санаа кылбай аркы өйүзгө өтүүдө,

Толкундардан тепкич жасап өзүнө.

Шамал гана эркин басып кете алат,

Таман коюп көл, деӊиздин бетине.

 

Күчөп күндө мезгил менен жарышуум,

Келечекке кенен таштап арышым.

Күткүм келет мен шамалдай эркиндик,

Башкара алган булуттардын багытын.

 

Мен…

Акылы жок тентек эмесмин,

Акылдуу да боло элекмин.

Жан болсом да анча жакшы эмес

Жакындарга бирок керекмин.

 

Кир дайра эмес, таза арыкмын,

Жакшылыкка бурчу багытмын.

Жетпегендин сүйүү дастаны,

Жеткен жанга ыйык бакытмын.

 

 

Чындык үчүн чыпка элекмин,

Жалганчыны муунтчу кебезмин.

Умтулганым жалаӊ жакшылык,

…жаманга да кээде себепмин.

 

Көзгө илээшпес учу-кыйыры,

Мен ааламдын бүтүн сыныгы.

Генийлердин эӊ бир чабалы,

Ойчулдардын эӊ бир кыйыны.

 

Акылы жок тентек эмесмин,

Акылдуу да боло элекмин.

…адалдыкка арнап күчүмдү,

Ашкым келет жашоо белесин.

 

Жалгыздыкка

Эссиздин эсине да илинбеген.

Эч кимге кѳрүнбѳгѳн, билинбеген,

Жалгыздык жакшы кѳрѳм сени абдан

Жашаган жашоомдо бир чийин менен.

 

Калган соң жакшылыкты сенден татып,

Кездешүү сени менен мага бакыт.

Эргийм да эч ким сезбес жыргал табам

Добушсуз шыбырыңды тыңшап жатып.

 

Жалгыздык – сен жаныма ѳбѳк-жѳлѳк,

Сѳзгѳ бек сырдашым жок сенден бѳлѳк.

Жалгыздык мен сендеги улуулуктан

Жүрѳмүн жүз жыл жашар ырлар тѳрѳп.

 ПОЭЗИЯ САПТАРЫ

Ак жамгыр

 Чертилип табият комузу,

Жаӊырат жамгырдын добушу.

Бейкапар уйкуда бир адам

Бактыма себепкер болуучу.

 

Ак жамгыр абайлап төгүлчү

Уйкусу болбосун бөлүндү.

Түш көрүп жаткандыр а балким

Экөөбүз бир сүрчү өмүрдү.

 

Түшүндө мага арнап сүйгөнүм,

Тергендир адырдын гүлдөрүн.

Мен жытын сезгенче озунуп

Тамчылар таажына тийбегин.

 

Мээримин гүл менен дестелеп,

Келатат, сүйөйүн эркелеп.

Мен үчүн жаралган бакыт ал

Сен ага тийишпе себелеп.

 

Ак жамгыр басылчы аярлап,

Булуттар жылгыла абайлап.

Арзуума апапак таӊ келсин

Ак сүйүү чындыгын кабарлап.

 

Чертилип табият комузу,

Жаӊырып жамгырдын добушу.

Эркелейт айнекти черткен үн.

Эргүүмө себепкер болуучу.

 

 

 
Categories

ИШИН ЖАНДАНТКАН ЖАЙЛАР

Rows of movie theater seats

Ордо калаада бүгүндөн тарта кинотеатр, компьютердик клуб жана соода борборлордогу тамак-аш саткан жайлар иштеп баштады. Бул тууралуу вице-мэр Айжан Чыныбаева маалымат жыйын учурунда билдирди. Анын айтымында, муну менен катар ишкерлерге бир нече талап коюлган. “Аталган жайларда санитардык-эпидемиологиялык талаптар аткарылышы шарт. Ар бир кардардын бет кап тагынып жүргөнү көзөмөлгө алынып, аларды аралыкты сактап отургузуу зарыл. Ошондой эле залдар 50 пайызга гана толушу керек”, – деди Чыныбаева. Вице-мэр ишмердүүлүгүнө уруксат берилген жайлар тез-тезден текшерилип турарын эскертти.

 
Categories

КЕЗЕКТЕГИ ИНТЕРВЕНЦИЯ

30-ноябрда Улуттук банк өлкөнүн улуттук валютасын колдоо максатында кезектеги валюталык интервенция жүргүзүп, сатыкка 16,1 миллион доллар чыгарды. Ушуну менен ноябрь айында 11-жолу, ал эми жыл башынан бери 26-жолу интервенция жүргүзүлүп, сатыкка жалпысынан 430 миллион доллардан ашуун акча коюлду. Бүгүн, 1-декабрга карата доллардын расмий курсун Улуттук банк 84,79 сом деп аныктады, акча алмаштыруучу жайларда орточо сатуу курсу 84,90 сом болууда. Ноябрь айынын экинчи жарымында интервенция дээрлик күн сайын жүргүзүлүп жатты.

 
Categories

МАМЫТОВДУН ОРУСИЯГА ИШ САПАРЫ 3 КҮНГӨ СОЗУЛАТ

Президенттин милдетин аткаруучу, Жогорку Кеңештин спикери Талант Мамытовдун Орусияга иш сапары үч күн – 6-8-декабрда болот. Бул тууралуу мамлекет башчынын маалымат катчысы Галина Байтерек билдирди. Анын сөзүнө караганда, сапар Жогорку Кеңеш менен Орусиянын Мамлекеттик Думасынын алкагында болот. Байтерек калган маалыматтар кийинчерээк айтыларын кошумчалады. Мамытовдун сапары боюнча маалыматты буга чейин Мамлекеттик Думанын төрагасы Вячеслав Володин билдирген. Ал жолугушуу 7-декабрда болорун айткан.