Британиядан башпаанек сураган Айсултан Назарбаевдин билдирүүсү боюнча Казакстандын расмий бийлик өкүлдөрү алгачкы жолу үн катты. Бул тууралуу Борбордук Азия жаңылыктар кызматы жазды.

Мамлекеттик «Хабар» телеканалынын эфиринде Казакстандын маалымат жана коомдук өнүгүү министри Даурен Абаев бул «эне трагедиясы» экенин билдирди. Ал билдирүүнү Айсултандын атын жана азыркы абалын пайдалангандар жазганын, мурдагы президенттин небереси маңзаттын таасири алдында жүргөнүн кошумчалады. Ал адамдын кайгысынан рейтинг жасоону токтотууга жана бул теманы жабууга чакырды.

Казакстандын туңгуч президенти Нурсултан Назарбаевдин жээн небереси Айсултан Британиянын бийлигинен баш калка сураган. Бул тууралуу ал 13-февралда «Фейсбуктагы» баракчасына жазган. «Соңку беш жылдан берки жашоом кунарсыз болуп калды», -деп билдирген Айсултан. Ал үй-бүлөсү тарабынан өзүнө басым болуп жатканын, анткени ал Орусия менен Казакстандын бийлик ээлеринин ортосундагы коррупция тууралуу маалыматка ээ экенин айткан.

29 жаштагы Айсултан – Назарбаевдин тун кызы, парламент төрайымы Дарига Назарбаеванын уулу. Ал былтыр октябрда Лондондо полицияга кол салган деген айып менен шарттуу кесилген. Буга анын баңгизат чегип алган абалында полиция кызматкерлерине каршылык көрсөтүп, алардын бирин тиштеп алганы себеп болгон. Натыйжада Назарбаевдин небереси 140 сааттык коомдук жумушка чегерилип жана баңгизат көз карандылыгынан арылыш үчүн атайын сабактарга барууга милдеттендирилген. Окуядан кийин ал баңгиликтен дарылаган «Priory» аттуу ооруканага жаткырылган. Айсултан Назарбаевдин кийинки убактагы билдирүүлөрү боюнча Казакстандын биринчи президентинин үй-бүлөсү комментарий бере элек.

If you have found a spelling error, please, notify us by selecting that text and pressing Ctrl+Enter.