Categories

Үй-бүлөлүк зомбулук көрсөткөн адамды 48 саатка чейин кармоо боюнча мыйзамга кол коюлду

Президент Сооронбай Жээнбеков «КР Жазык-процесстик кодексине өзгөртүүлөрдү киргизүү жөнүндө» Кыргыз Республикасынын мыйзамына кол койду. Бул тууралуу президенттин аппаратынын маалыматтык саясат бөлүмү билдирет.

Бул мыйзам үй-бүлөлүк зомбулук фактыларын болтурбоо боюнча кечиктирилигис чараларды көрүү максатында Жогорку Кеңеш тарабынан 2020-жылдын 30-апрелинде кабыл алынган.

Аталган өзгөртүүлөр менен жабырлануучунун жана башка үй-бүлө мүчөлөрүнүн же аларга теӊдештирилген адамдардын коопсуздугун камсыздоо максатында үй-бүлөлүк зомбулук жасоого шектүү адамды 48 саатка чейин кармоо чарасы каралган.

Тактап айтканда, 504-берене толукталган, 3-1-бөлүк менен үй-бүлөлүк зомбулук жасагандыгы боюнча шектелген адам төмөнкүдөй негиздер болгондо кармалышы мүмкүн:

1) эгерде жабырлануучунун жана башка үй-бүлө мүчөлөрүнүн же аларга теӊдештирилген адамдардын өмүрүнө жана ден соолугуна шектүү адам тарабынан реалдуу коркунуч бар болсо;

2) эгерде шектүү алкоголго жана анын башка түрүнө мас абалында болсо жана ал жабырлануучу жана башка үй-бүлө мүчөлөрү же аларга теӊдештирилген адамдар үчүн коркунуч келтирип жатса;

3) эгерде шектүү жабырлануучуну жана башка үй-бүлө мүчөлөрүн же аларга теӊдештирилген адамдарды кордоону, аларга коркунуч келтирүүнү, уруп-сабоону, шылдыӊдоону, басмырлоону улантат деп болжогонго мүмкүндүк берүүчү негиздер бар болсо.

Мыйзам расмий жарыяланган күндөн тартып күчүнө кирет.

 
Categories

Акыйкатчы көп балалуу эненин баш коргоо чарасын өзгөртүүнү суранды

Акыйкатчы  Токон Мамытов  Октябрь райондук сотунун төрагасы Д.Назаровго кайрылып, анын өндүрүшүндө жазык иши каралып жаткан жаран Н.К.га карата бөгөт коюу чарасын өзгөртүүнү суранды. Акыйкатчынын маалымат кызматынын билдиргенине караганда, анткени учурда №1 ТИЗОдо кармалып жаткан жаран Н.К-нын карамагында төрт кичине баласы бар, алардын улуусу жети жашта, учурда бешинчи баласы менен кош бойлуу.

Өзүнүн сунуштамасына негиздеме катары соттолуучу Н.К  КР Жазык кодексинин 204-беренесинин 1-бөлүгүндө каралган кылмышты жасады деп айыпталууда. Бул беренедеги кылмыштар I категориядагы жазаны карайт, ал 2 жыл 6 ай жаза каралууга жатат, бул ал КР Жазык коддексинин 19-беренесине ылайык анча чоң эмес кылмыштарга кирет.

Андан тышкары, КР Жазык-процесстик кодексинин 116-беренесине ылайык бөгөт коюу чарасын тандоодо  5 жылдан ашык эркинен ажыратылчуларды гана бөгөт коюу чарасы камакка алуу түрүндө тандалышы керек.

 
Categories

Президент Сооронбай Жээнбеков Акыйкатчы Токон Мамытов менен адам укугун талкуулады

Президент Сооронбай Жээнбеков бүгүн, 7-февралда  Акыйкатчы Токон Мамытовду кабыл алды.

Жарандардын укуктарын жана эркиндигин коргоо системасы, укук коргоо институтунун ишмердүүлүгүн өркүндөтүү чаралары талкууланды. Акыйкатчы жарандардын укуктарын жана эркиндигин бузуу учурларын, кайрылууларын кароо жана текшерүү, алардын укугун калыбына келтирүүгө көмөк көрсөтүү боюнча ишмердүүлүгү жөнүндө маалымат берди.

Токон Мамытовдун берген маалыматына ылайык, учурда  Жогорку Кеңештин кароосуна сунуштала турган 2019-жылдын «Кыргыз Республикасында адамдын жана жарандын укуктарын жана эркиндиктерин сактоо жөнүндө» Акыйкатчынын жылдык доклады даярдалууда.

Президент Сооронбай Жээнбеков адамдардын укугун коргоо, жарандык укукту жана эркиндикти басмырлоонун бардык түрлөрүн алдын алуу боюнча натыйжалуу чараларды көрүүдө Акыйкатчы институтунун өзгөчө ролун белгиледи. Жарандардын кадыр-баркына жана эркиндигине шек келтирүү боюнча бардык фактыларга ыкчам чара көрүү зарылдыгына көңүл бурду.

 
Categories

Токон Мамытов Анара Дауталиевага байланыштуу тынчсызданганын билдирди

“Бишкек шаарынын мэриясы жана укук коргоо органдары бул жагдайды тыкыр териштирүүсү керек, ал эми Бишкек шаарынын мэриясынын Билим берүү башкармалыгы шашылыш түрдө тиешелүү комиссияны түзүүгө тийиш. Мындай пикирин Акыйкатчы Токон Мамытов Укук коргоочу А.Дауталиевага болгон коркутуулар жана кысымга байланыштуу билдирди.

Эске сала кетсек, Бишкек шаардык кеңешинин социалдык маселелер боюнча туруктуу комиссиясынын отурумунун жүрүшүндө, Бишкек шаарынын тургундарынын №5 балдар бакчасында  көп сандаган мыйзам бузуулар, азык-түлүк продуктыларын уурдоолор жана акча чогултуулардын ачык-айкын эместиги тууралуу даттануулары каралып жатканда, укук коргоочу Анара Дауталиева  төмөнкүлөрдү маалымдаган:

Анара Дауталиева: “10-январь күнү 8.43тө мага Нурбүбү деп өзүн тааныштырган аял чалып, комиссияга баруу үчүн мени алып кеткени келгенин маалымдашкан. Бул аял бакчанын директорунун тууганымын деп тааныштырган жана комиссияда ишимди улантчу болсом менде чоң залакалар болоорун айткан. Алар менин дарегимди кайдан алышкан? Менин балдарым жашы жеткен болгонуна карабастан алар үчүн кооптоном. Мага жалаа жабылып жатат. Арызга кол койгон ата-энелерге кысым көрсөтүлүүдө”,-деген.

Бир катар маалыматтык сайттарда укук коргоочу Анара Дауталиева өзүнүн коопсуздугуна жана өз балдарынын коопсуздугуна тынчсызданганын, ушул балдар бакчасына барган балдардын ата-энелеринин көз карашын жана талаптарын коргогону  үчүн ага коркутуулар болуп жатканын маалымдаган.

Бишкек шаардык кеңешинин отурумунда белгилүү болгондой, ата-энелердин арызында көрсөтүлгөн көптөгөн фактылар тастыкталган.

 
Categories

Өмүр бою эркинен ажырагандардын жакындарынан кайрылуулар келип жатат

Өлүм жазасын кабыл алардан мурда сот жана укук коргоо системасынын ишинин сапатын жогорулатуу керек. Бүгүнкү күндө Акыйкатчы институтуна өмүр бою эркинен ажырагандардан, алардын жакындарынан, адвокаттарынан, жада калса абак кызматкерлеринен кайрылуулар келип жатат. Аларды текшере келсек, айрымдарынын күнөөсүз түрмөдө отурганы боюнча бир нече факты аныкталды. Мындай пикирин Токон Мамытов Sputnik Кыргызстан радиосуна маек куруп жатып билдирди.

Токон Мамытов:  “Андыктан өлүм жазасын киргизүүдөн мурда аталган тармактарды ачык, жеткиликтүү, калыс иштөөгө алып барышыбыз керек. Андан соң гана бардык тарабынан дыкат иликтөөгө алып, кандай учурда кимдерге өлүм жазасын киргизүүгө болорун талкууласак болот”, — деди.

Ошондой эле акыйкатчы коомчулукта ар кандай кылмыштардын алдын алуу үчүн профилактикалык иштерге басым жасоо зарылдыгын кошумчалады.

 
Categories

“Казакты» үй камагына чыгарган судья Сулайманова кызматынан бошотулду

Мындай жарлыкка президент Сооронбай Жээнбеков кол койгон. Бошотууга Судьялар кеңешине караштуу Тартип комиссиясынын Ош шаардык сотунда судьялык ыйгарым укуктарын аткарып жаткан жергиликтүү соттун судьясы Айнура Сулайманованы кызматтан бошотуу боюнча сунушу себепчи болгон.

Айнура Сулайманова баңги затка байланышкан өзгөчө оор кылмыш менен айыпталган адамдын кылмыш ишин кароосунда, иштин жагдайларын толук изилдебей туруп, ага карата иштин материалдарында тиешелүү соттук экспертизасынын корутундусу жоктугуна карабастан, медициналык мүнөздөгү мажбурлоо чараларын колдонуу жөнүндө токтом чыгарган.

Жыйынтыгында жогору турган сот инстанциясы чыгарылган соттук актыны жокко чыгарды.

Ишти кайрадан кароонун натыйжасында соттун өкүмү менен айыпталуучу күнөөлүү деп табылып, 1100 эсеп көрсөткүчү өлчөмдөгү айыпка кириптер кылуу менен 10 жылга эркиндигинен ажыратуу жазасы берилген. Бүгүнкү күндө аталган өкүм мыйзамдуу күчүнө кирген.

 
Categories

Бейөкмөт уюмдарга байланыштуу мыйзам долбоору алардын укугун чектейби?

Акыйкатчы Токон Мамытов менен бейөкмөт уюмдардын жана коммерциялык эмес уюмдардын өкүлдөрүнүн жолугушуусу болду. Жолугушуу учурунда “Кыргыз Республикасынын айрым мыйзам актыларына өзгөртүүлөрдү киргизүү жөнүндө” (“Коммерциялык эмес уюмдар жөнүндө” жана “Юридикалык жактарды, филиалдарды (өкүлчүлүктөрдү) мамлекеттик каттоо жөнүндө”) Кыргыз Республикасынын мыйзам долбооруна байланышкан маселелер талкууланды.

Аталган мыйзамдолбоору өлкөнүн Жогорку Кеңеши тарабынан 2019-жылдын 31-декабрынан тартып коомдук талкууга коюлган.  Мыйзам боюнча өлкөбүздөгү бейөкмөт уюмдардын жана коммерциялык эмес мекемелердин өкүлдөрү тынчызданууларын билдирип келишет. Эгерде мыйзам кабыл алынып калса алардын финансылык ишмердүүлүгүнө кыйынчылык жаратары айтылууда. Ошондой эле бул аракетти бийлик тарабынан кысым катары баалагандар да арбын.

Талкууга “Балдарды коргоо лигасынын” жетекчиси Назгуль Турдубекова, «Smart Жаран» Ассоциациясынын жетекчиси Эркина Убышева, “Голос свободы” фондунун жетекчиси Сардар Багышбеков жана “Коммерциялык эмес укук эл аралык борборунун” Кыргызстандагы  өкүлчүлүгүнүн директору Ноокат Идрисов катышты. Жыйынтыгында, бул  маселени чечүү үчүн мындан ары да салмактуу мамиле жана эки тараптуу сүйлөшүүлөр керектиги баса белгиленди.

 
Categories

Акыйкатчы Ысык-Көлдө бензин чачылып өрттөлүп, аман калган аялдын ишин көзөмөлгө алат

Акыйкатчынын Ысык-Көл облусундагы Ыйгарым укуктуу  өкүлү  бензин чачылып өрттөлүп, аман калган аялга барып жолукту. Бул тууралуу Акыйкатчы институтунун маалымат кызматы билдирди.

Каракол ШИИБ маалыматына ылайык, Торгоев көчөсүндө жайгашкан кафенин жанынан бир эркек аялга бензин чачып, өрттөдү-деген маалымат келип түшкөн. Келген милиция кызматкерлери Жети-Өгүз районунун Богатыровка айылынын 33 жаштагы тургуну Б.С. өзүнүн 35жаштагы жарандык никедеги күйөөсү аялына бензин чачып, ширеңке чагып туруп, кылмыш кылган жеринен качып кеткенин аныкташкан.

Бул иш Каракол шаарынын ИИБ тарабынан Кылмыштар жана жоруктардын бирдиктүү реестринде  катталды. Соттук-медициналык экспертиза дайындалды. Кылмышка шектүү кармалып, Каракол шаардык сот тарабынан 2 айлык мөөнөткө камакка алынды. Учурда жабырлануучу Ысык-Көл облусттук оорукананын травматологиялык бөлүмүндө дарыланып жатат. Дарыгердин айтымында, аялдын абалы туруктуу.

Акыйкатчынын Ысык-Көл облусу боюнча өкүлчүлүгү бул ишти өз көзөмөлүнө алды.

 
Categories

Бүгүн Атамбаевдин соту болот

Алмазбек Атамбаевдин жаңы жылдан кийинки алгачкы соту бүгүн 9-январда кайрадан башталат. Сот  Улуттук коопсуздук боюнча мамлекеттик комитеттин  имаратында өтөт. Бул тууралуу анын жактоочусу Сергей Слесарев маалымдады.

Эске сала кетсек, Алмазбек Атамбаевге Азиз Батукаевдин абактан бошотулушу, Кой – Таш окуялары боюнча айыпталып келет.

 
Categories

Алмазбек Атамбаев кайрадан сот өтчү бөлмөдөн чыгып кетти

Бүгүн УКМКнын имаратында “мыйзамдагы ууру” Азиз Батукаевдин иши боюнча сот иши уланды. Бул тууралуу Алмазбек Атамбаевдин жактоочусу Слесарев билдирди. Анын маалыматтарына караганда, Алмазбек Атамбаев сот болуучу бөлмөгө келген. Ал эми сот бөлмөгө кирип келгенде Атамбаев сот ишинин бөлмөдө өтүп жаткандыгына нааразычылыгын билдирүү иретинде кайра чыгып кеткен.

Слесарев: “Атамбаев сот ишинин сот залында эмес, УКМКнын бөлмөсүндө өтүп жаткандыгына каршылыгын билдирди”,-деди.