Ысык-Көл облусунда өткөн Эл аралык марафонго милициянын отставкадагы генерал-майору Кемелбек Киязов дагы катышты. Бул тууралуу ИИМдин маалымат кызматы билдирди.

Генерал өзүнүн курагындагылар категориясында 2017-жылы 10 чакырым аралыкты, 2018-жылы 21 чакырым аралыкты чуркап өтүп жеңишке жеткен. Ушул жылы 42 чакырым 192 метр толук марафондук аралыкта жарышка катыша алды. Ал аралыкты толук чуркап өтүп, өзүнүн курагындагылар арасында биринчиликти багындырды. Ал 63 жашта.

Генерал-майор Кемелбек Киязов жарыштын профессионалы болбогону менен чуркоону сүйүүчүлөр арасында жакшы жыйынтыктарды көрсөтүп келет. Келечекте башка өлкөлөрдө өткөн марафондук жарыштарга катышууну максат кылууда.

11-май күнү Чолпон-Ата шаарында С. Джуманазаровдун жаркын элесине арналган “Кыргызстан-Run the Silk Road” VIII-эл аралык марафону өтөт. Чуркоо аралыктары  3 чакырымдан башталып, 10; 21; 42 чакырым. Ар кандай жаштагы инсандар катышса болот. Улуу муундагылардын жеңүүчүлөрүнө өзүнчө сыйлыктар каралган.

Ал эми ИИМдин маалыматына караганда, марафон өткөрүү учурунда “Балыкчы-Ананьева-Каракол” унаа жолунун 83-чакырымынан 105-чакырымында (Бактуу-Долоноту айылынан баштап Корумду айылына чейин) транспорт каражаттарынын кыймылына убактылуу чектөөлөр киргизилет.

Бардык айыл-чарба, курулуш техникаларына жана жүк ташуучу, оор жүк ташуучу транспорт каражаттарына унаа каттамы жабык болот.

ИИМдин Жол кыймылынын коопсуздугун камсыздоо башкы башкармалыгы бардык айдоочуларга “Балыкчы-Ананьева-Каракол” унаа каттамындагы кыймылга альтернативдүү маршруттарды тандоону алдын ала эскертет. Мындан тышкары, жаралган ыңгайсыздык үчүн Ысык-Көл облусунун жашоочуларынан, конокторунан кечирим сурайт жана жол кыймылынын коопсуздугун камсыздоодо көрүлгөн тиешелүү чараларды туура түшүнүү менен кабыл алууларына чакырат.

Кыргызстандын курама командаларынын спортчуларын Токио шаарында (Япония) өтө турган жайкы XXXII Олимпиадалык жана XVI Паралимпиадалык оюндарга катышууга даярдоо боюнча уюштуруу комитетинин жыйыны өттү.

Олимпиадага спорттун 13 түрү боюнча 21 лицензия алууга аракеттер көрүлөт. Бул – күрөштүн 3 түрү, дзюдо, жеңил атлетика, бокс, оор атлетика, заманбап беш түрлүү көнүгүүлөрдөн турган спорттук мелдеш, сууда сүзүү, ок атуу, фехтование, жаа атуу, триатлон. Жогоруда көрсөтүлгөн спорт түрлөрүнүн айрымдары боюнча 2019-жылы лицензиялык турнирлер өтөт.

Андагы маалыматтарга караганда, лицензиялык турнирлерге даярдануу үчүн биздин өлкөнүн улуттук курама командаларынын мүчөлөрү спорт түрлөрү боюнча 2019-жылдын январынан тартып бүгүнкү күнгө чейин 21 эл аралык жана рейтингдик мелдештерге катышып, 37 медаль утуп алышкан (17 алтын, 6 күмүш жана 14 коло медаль). Ошондой эле жети Азия Чемпионатында 12 медалга ээ болушкан (2 алтын, 1 күмүш жана 9 коло медаль).

Мындан тышкары спорт түрдөрү боюнча Кыргызстандын улуттук курама командалары 36 окуу-машыгуулардан өтүштү. Лицензиялык турнирлерге даярдануу алкагында биздин курама командалар 94 эл аралык (лицензиялык, рейтингдик) мелдештерге катышууну максат кылып жатышат. 2019-жылы Ысык-Көлдө триатлон жана волейбол боюнча эки Азия Чемпионатын өткөрүү пландаштырылууда.