Борбордук шайлоо комиссиясынын маалыматына ылайык, 10-апрелде Токтогул шаардык кеңешине шайлоодо добуш берүүчүлөрдүн 35,76% катышты. Анда “Ата-Журт Кыргызстан” 18,47%, “Тынчтык” 15, 74%, “Ынтымак” 15,05%, “Бирге-Вместе” 13,43%, “Мекен ынтымагы” 12,70%, “Ишеним” 11,80% , ал эми “Эл үмүтү” партиясы 11,60% добуш алды.

Таш-Көмүр шаардык кеңешине шайлоодо үч партия катышып, добуш берүүчүлөрдүн 30,95% келди. Анда “Жаштар” 45,35%, “Ата-Журт Кыргызстан” 38,50% жана “Ынтымак” партиясы 14,62% добуш топтоду. Баарына каршылар 1% жакын болду.

Кечээ Токтогул менен Таш-Көмүрдөн сырткары, Кара-Балта шаардык, ошондой эле Жалал-Абад, Ысык-Көл, Нарын, Ош жана Чүй облустарындагы 13 айылдык кеңешине шайлоо өттү. Алар: Аксы районунун Кара-Жыгач, Сузак районунун Көк-Арт, Тоң районунун Кажы-Сай, Ак-Талаа районунун Тоголок Молдо, Ат-Башы районунун Казыбек, Араван районунун С. Юсупов, Кара-Суу районунун Ак-Таш, Төлөйкөн, Кемин районунун Жаңы-Алыш, Кара-Булак, Көк-Ойрок, Москва районунун Александровка, Сокулук районунун Сокулук айылдык кеңештери.

Бишкек шаарындагы Свердлов жана Биринчи май округдары боюнча кайра шайлоонун үгүт иштери башталды. Шайлоо алдындагы кампания 7-февралда башталып, 20 күнгө созулат. Эки округдан депутаттык мандат үчүн 53 талапкер ат салышууда.

Жалпы жонунан 72 жаран катышуу ниетин билдирген. БШКнын алардын 19у тийиштүү талаптарды аткарбаганы үчүн жарышка катталбай калганын билдирди. Учурда Биринчи май шайлоо округунан 28, Свердлов шайлоо округунан 25 адам жарышка чыкты.

Белгилей кетсек, 28-ноябрдагы парламенттик шайлоодо Свердлов жана Биринчи май шайлоо округдарында “баарына каршы” графасы талапкерлердин алган добушунан ашып кеткендиктен шайлоо өтпөй калды деп таанылган. Мындан улам 27-февралда бул эки райондо кайра шайлоо белгиленген.

Кайра шайлоого талапкерлерди көрсөтүү 27-январда аяктайт. Бул тууралуу Борбордук шайлоо комиссиясы кабарлады.

Маалыматка ылайык, бир мандаттуу округдар боюнча депутаттыкка талапкерлерди көрсөтүү кайра шайлоо дайындалган күндөн тартып башталат жана добуш берүү күнүнө 30 календарлык күн калганга чейин аяктайт, башкача айтканда, келе жаткан жылдын 27-январына чейин.

Кайра шайлоого катышуу үчүн 48 жаран БШКга арыз менен кайрылды. Эске салсак, 28-ноябрда өткөн шайлоодо аталган эки округда  баарына каршы добуш бергендердин саны көп болгон.

Анда Биринчи Май районунда 32,92 пайыз, Свердлов районунда 37,48 пайыз бардыгына каршы добуш берген. Бишкектин Свердлов жана Биринчи Май округунда кайра шайлоо 27-февралда өтөт.

Борбордук шайлоо комиссиясы Жогорку Кеңештин депутаты кылып каттаган Токтобүбү Оргалча жарандыгы жана бийлик менен байланышы жөнүндө билдирүү таратты.

Ал интернет айдыңында айтылып жаткандарды курулай ушак деп атады. Токтобүбү Оргалча видео кайрылуусун “Фейсбуктагы” баракчасына жарыялады.

“Эл ичинде мен жөнүндө аябагандай чоң ушак айланып жатат. Мени уйгур, кытай, тыңчы кылып атышат. Бул такыр чындыкка дал келбейт. Мен Ат-Башыдан кеткен чериктин кызымын. 1916-жылы чоң аталарыбыз Ат-Башыдан Кытайга үрккөн”, – деди Оргалча.

Ал кыргыз жарандыгын алган учурда кытай жарандыгынан расмий баш тартканын билдирди. Токтобүбү Оргалча президент Садыр Жапаров жана жубайы Айгүл Жапарова менен эч кандай тааныштыгы жок экенин, бирок азыркы бийликтин саясатын колдой турганын белгиледи.

Оргалча ага мандат мыйзамдуу тийгенин дагы кошумчалады.

Жогорку Кеңештин депутаттыгына «Альянс» партиясынан талапкер Жанар Акаев өзүнө мандат тийбей калганы тууралуу пикирин билдирди. Ал «Фейсбуктагы» баракчасына шайлоонун жыйынтыгы чыгып, жеңүүчүлөр аныкталгандан кийин бир адамга карата атайын эрежени өзгөртүү логикага сыйбай турганын жана бул коркоктук экенин жазды. Депутат бул үчүн Борбордук шайлоо комиссиясын айыптады.

«БШКнын эрежени шайлоодон кийин өзгөрткөн чечими менде эле эмес, элдин баарында күмөн ой жаратты. Мындай адилетсиз буйрукту аткарган БШК мүчөлөрү жана буйрук бергендер силердин уятыңарда болсун. БШКнын шайлоого чейин кабыл алган жобосунда партия 7 мандат алса, экөө аял болот деп так жазылган. Мыйзамды жөнгө салчу эрежени 13-декабрда БШКнын жетекчилиги түнкүсүн мүчөлөрүн чогултуп, басым кылганына карабастан мүчөлөрү каршы болуп, токтомду өзгөртүү сунушу өтпөй калган. Аны менен тынчыган жок. Эки күн убакыт алып, БШКнын ар бир мүчөсүнө жогорудан «салам-дубай» айттырып, маселени бышырып, кайра дагы алып чыгышты. Кайра-кайра добушка коюп жатып эптеп өткөрдү, бир гана «Альянска», анын ичинен мага гана тиешелүү маселени БШК атайын өзгөрттү. Шайлоо бүтүп, кимдер өткөнү жарыя болгондон кийин да токтомду өзгөрткөнү — акылга сыйгыс көрүнүш», – деп жазды Жанар Акаев.

Ал жаңы саясий маданиятты калыптандырууну каалаган саясатчылардын бири экенин, гендердик баланс үчүн күрөшүп келгенин жана мындан ары да саясий ишмердиги күчөй турганын кошумчалайт.

Борбордук шайлоо комиссиянын кечээ, 12-декабрдагы жыйынында бир мандаттуу 19 шайлоо округу боюнча Жогорку Кеңештин депутаттарын шайлоонун жыйынтыгы аныкталды.

БШКдан билдиргендей, тиешелүү округдардын аймактары боюнча добуш берүүнүн жыйынтыктары жөнүндө округдук шайлоо комиссияларынын протоколдорунун негизинде № 15 Базар-Коргон шайлоо округу боюнча Айбек Алтынбеков, № 16 Ноокен шайлоо округу боюнча Бактыбек Сыдыков, № 22 Жайыл шайлоо округу боюнча Нурланбек Азыгалиев, № 23 Москва шайлоо округу боюнча Карим Ханджеза, № 7 Ош шайлоо округу боюнча Айбек Осмонов, № 28 Октябрь шайлоо округу боюнча Дастан Бекешев, № 33 Нарын шайлоо округу боюнча Улан Бакасов, № 8 Төлөйкан шайлоо округу боюнча Нурбек Алимбеков, № 12 Өзгөн шайлоо округу боюнча Элмурза Сатыбалдиев, №10 Куршаб шайлоо округу боюнча Данияр Төлөнов, № 18 Ала-Бука шайлоо округу боюнча Азизбек Турсунбаев, № 35 Ак-Суу шайлоо округу боюнча Акылбек Түмөнбаев, №2 Баткен шайлоо округу боюнча Нурлан Ражабалиев, №3 Кадамжай шайлоо округу боюнча Ырысбек Атажанов, №4 Көк-Жар шайлоо округу боюнча Омурбек Бакиров, №5 Ноокат шайлоо округу боюнча Жусупбек  Коргонбай уулу, №19 Токтогул шайлоо округу боюнча Кундузбек Сулайманов, №26 Ленин шайлоо округу боюнча Жаныбек Абиров, №20 Манас шайлоо округу боюнча Дастанбек Жумабеков Жогорку Кеңештин депутаттыгына шайланды деп табылды.

Бардык талапкерлерге каршы добуш эң көп берилген участоктордо шайлоо кайра өткөрүлөт. Бул тууралуу Борбордук шайлоо комиссиясынын төрайымы Нуржан Шайлдабекова билдирди.

“Бишкектеги кээ бир участоктордо “баарына каршы” добуштар эң көп добуш алган талапкердикине караганда көп болду. Шайлоо мыйзамынын 37-беренесинде “Эгерде башка талапкерге караганда алда канча көп сандагы добуш алган талапкер үчүн берилген шайлоочулардын добуштары шайлоочулардын бардык талапкерлерге каршы берилген добуштарынан аз болсо шайлоо болбой калды деп таанылат” деп жазылган. Мындай учурда кайра шайлоо өткөрүлөт”, – деди Шайлдабекова.

Ал кошумчалагандай, кайра шайлоо күнүн БШК бир ай ичинде аныкташы керек болот.

Билим берүү жана медицина тармагынын кызматкерлерин шайлоого байланыштуу иштерге тартууга тыюу салынарын Министрлер кабинетинин төрагасы Акылбек Жапаров 23-ноябрда парламенттик шайлоону уюштуруу боюнча республикалык штабдын жыйынында сүйлөп жатып эскертти.

Жапаров бийликтин милдети – жарандардын эркин билдирүүсү үчүн зарыл шарттарды камсыз кылуу экенин белгилеп, добуш берүү бекеттери керектүү жабдуу, байланыш жана интернет менен жабдылганын айтты.

Ошону менен катар ал таажылуу вирус пандемиясына байланыштуу ар бир шайлоо бекетинде тийиштүү санитардык талаптар сакталышы керектигин белгиледи. Шайлоо процессине республикалык бюджеттен 623 миллион сом бөлүнгөнү айтылды.

Борбордук шайлоо комиссиясы Жогорку Кеңештин депутаттыгына талапкер Дастанбек Жумабековго эки айып пул салды. Таластын Манас районундагы №20 бир мандаттуу шайлоо округунан талапкерлигин койгон Жумабеков “Фейсбукка” жарыялаган үгүт тасмасынын каржылык булагын көрсөткөн эмес.

Үгүт эрежесине ылайык, ар бир жарнамалык материал үчүн талапкердин шайлоо фондунан акы төлөнгөнү ачык айтылышы керек. Жумабековдун өкүлү социалдык желеге чыгарылган видеону бышыктап, кийин өчүрүлгөнүн айтты.

Жумушчу топ “Президентти жана Жогорку Кеңештин депутаттарын шайлоо жөнүндөгү” Конституциялык мыйзамдын талаптары бузулган деп, талапкерге 7,5 миң сом айыппул салууну сунуш кылды. Бул сунуш БШКнын 23-ноябрдагы жалпы жыйынында колдоо тапты.

Ошондой эле талапкердин бир тууганы, дарыгер Сабырбек Жумабековдун кайрымдуулук максатында жасаган операциясы үгүт катары колдонулганы тууралуу арыз түшкөн. Бул темадагы макаланы жергиликтүү басылмалардын бири чыгарган.

БШК бул үчүн да талапкерге 7,5 сом айыппул салып, басылмага эскертүү берди. Дастанбек Жумабековдун үстүнөн арыздарды жеке жаран жазган.

Нарындагы №33 шайлоо округунан Жогорку Кеңештин депутаттыгына талапкерлигин койгон төрт кишиге 7500 сомдон айып пул салынды. Мелисбек Жунусов, Чынгыз Капаров, Алмазбек Баатырбеков жана Улан Бакасов эреже бузуу менен үгүт жарнамаларын мектепке жана мечитке жакын жерге илгени тууралуу маселе Борбордук шайлоо комиссиясында каралды.

Жумушчу топ аталган талапкерлер “Президентти жана Жогорку Кеңештин депутаттарын шайлоо жөнүндөгү” Конституциялык мыйзамдын талаптарын бузган деп, аларга айып пул салууну сунуш кылды. Бул сунуш БШКнын 21-ноябрдагы жалпы жыйынында колдоо тапты.