Кыргызстандын президенти Садыр Жапаров кыргыз-тажик чек арасындагы соңку окуялар боюнча кайрылуу жасады. Жапаров 28-30-апрелдеги окуяга “Кыргызстандын эли үчүн тарыхый оор сыноонун да, кайгынын да күндөрү болду” деп баа берген. Ал “Кыргызстандын чек ара жана күч органдарынын күжүрмөн даярдыгы, моралдык жактан бийик маанайы жана каармандыгынын аркасында өлкөбүздүн аймактык бүтүндүгү сакталып калганын” белгиледи.

Өлкө башчы кырдаалды жөнгө салуунун дипломатиялык жолу гана тандалганын, тажик президенти Эмомали Рахмон менен эки жолу сүйлөшкөнүн билдирди. Садыр Жапаров ушул күндөрү курал-жарак талап кылып, Баткенге барууга ашыккан жаштарды түшүнүүгө болорун, бирок аларга курал бербей, башкалардын катасын кайталабаганын кошумчалады. Жапаров чатак ырбаса мындан да чоң жоготуулар болмоктугун эскертти. Ал жаңжал учурунда үй-жайын таштап качкандарды үйлөрүнө кайтууга чакырды.

Ал эми талкаланган, өрттөлгөн үйлөр калыбына келтирилерин убада кылды. Жапаров бул иште жардамын аябаган эл аралык коомчулукка ыраазычылык билдирип, мындан ары жаңжалды алдын алуу үчүн эки тараптын кадырлуу адамдарынан турган тынчтык сактоо комиссиясын түзүүнү сунуштаганын кошумчалады.

Президент Садыр Жапаров бүгүн, 1-майда, Тажикстандын президенти Эмомали Рахмон менен телефон аркылуу сүйлөштү. Бул тууралуу президенттин аппаратынын маалыматтык саясат бөлүмү билдирет.

Мамлекет башчылары буга чейин жетишилген бардык келишимдерди сакташарын жана өлкөлөрдүн аймактарын жана чек араларын өз ара урматтай тургандыктарын белгилешти. Президенттер ошондой эле чек арада түзүлгөн кырдаал тезирээк жөнгө салынарына ишенерин билдиришти.

Телефон аркылуу сүйлөшүүнүн жүрүшүндө Кыргызстан менен Тажикстандын башчылары эки тараптын чек ара аймактарынан бардык аскер техникалары чыгарыла тургандыгын дагы бир жолу тастыкташты.

Мындан тышкары, эки өлкөнүн лидерлери кыргыз-тажик чек арасынын периметриндеги бардык аскердик техникаларга ревизия кылуу боюнча Кыргызстан менен Тажикстандын биргелешкен комиссиясын түзүүнү макулдашышты.

Ошону менен бирге Садыр Жапаров менен Эмомали Рахмон азыркы учурда эки өлкөнүн өкмөттөр аралык комиссиялары бардык маселелерди чечүү боюнча биргелешип иштеп жаткандыгын баса белгилешти.

Кыргызстан менен Тажикстандын президенттери чек ара аймактарындагы кырдаалды турукташтырууга таасир этүүчү чагымдарга жол бербөө зарылдыгын өзгөчө белгилешти.

Президент Садыр Жапаров 26-апрелде мамлекеттик телеканалдардын бирине түз эфирде маек куруп, акыркы учурда коомдо кызуу талкууланган айрым маселелер боюнча суроолорго жооп берди. Маек учурунда ал Жогорку Кеңештин депутаттары кабыл алган Ысык-Көлдө кумарканаларды ачуу боюнча мыйзамды колдой турганын, ага кошумча иретинде өлкөнүн аймактарынын борбор шаарларында жана Бишкекте кумарканаларды ачууга уруксат берүү сунушун киргизерин айтты.

Ал белгилегендей, казинолор өлкөнүн бардык жагында, Бишкекте, облус борборлорундагы шаарларда, ачылышы керек. “Мен азыр Кыргызстандын жарандары кумарканалардын эшигин аттабайт деп мыйзамга киргизгиле деп жатам. Бул чет өлкөлүктөр үчүн эле ачылат”, – деди Жапаров.

Президент Садыр Жапаров “Телеграм” каналына 25-апрелде жер жана энергетика маселелери тууралуу билдирүү жарыялады. Биринчи билдирүүдө кайсы жер тууралуу сөз болгону такталган эмес, бирок жалган маалыматтар тарап жатканы белгиленген.

“Акыркы учурда саясий чайкоочулар өздөрүнүн жеке максаттары жана кызыкчылыктары үчүн, ар кандай туура эмес “жалган” маалыматтар менен соцтармактардан бузукулук чакырыктарды таштап элдин башын айландырууда. Билсеңиздер, эч кандай жерлер берилген жок, жерлер алмашуу жолу менен гана учурда сүйлөшүүлөр жүрүп атат. Элдин макулдугу, эл менен жолугушуу, кеңешүү, түшүндүрүү иштери тыгыз жүрүп жатат. Президент элден качып жашынып жаткан жери жок, күнү-түнү иштеп эл үчүн ак кызматын кылып жатат”, – деп жазылган.

Ал эми экинчи кыска билдирүүдө 15 жылдан бери топтолгон оор энергетикалык кризистен чыгуу үчүн реформалар керек экени айтылат.

Орусиянын 11 аскер адамы Кыргызстандын президенти Садыр Жапаровдун энчилүү кол сааты менен сыйланды. Бул тууралуу өлкө башчынын маалымат кызматы кабарлады. Россия Федерациясынын Коргоо министрлигинин № 20022 аскер бөлүмүнүн кызматкерлери “Коопсуздук -2021” аскердик машыгууларына катышкан.

Саат тапшыруу аземи “Кант” авиабазасында болуп, анда Кыргызстандын Коргоо министрлигинин жетекчилиги жана Коопсуздук кеңешинин катчылыгынын кызматкерлери болгон. Машыгууга эки миңге жакын адам катышып, 100гө жакын автомобиль, сооттолгон жана атайын техника, 20га чейинки артиллериялык система, ошондой эле 10дой авиациялык техника тартылган.

Президент Садыр Жапаров бүгүн, 2-мартта Казакстанга мамлекеттик сапар менен барды. Нур-Султан шаарынын эл аралык аэропортунда Жапаровду Казакстандын вице-премьер-министри — тышкы иштер министри Мухтар Тлеуберди, энергетика министри Нурлан Ногаев жана Нур-Султан шаарынын акими Алтай Кульгинов тосуп алышты. Нур-Султан шаарынын эл аралык аэропортунда Кыргызстандын жана Казакстандын мамлекеттик желектери илинип, килем төшөлүп, ардактуу кароолдун ротасы тизилди.

Садыр Жапаров Казакстандын Президенти Касым-Жомарт Токаев менен эки тараптуу сүйлөшүүлөрдү жүргүзүп, эки жана көп тараптуу кызматташуунун актуалдуу маселелерин, ошондой эле өз ара алакалардын келечегин талкуулайт.

Ошондой эле Мамлекет башчысы Казакстандын туңгуч президенти Нурсултан Назарбаев, парламенттин мажилисинин төрагасы Нурлан Нигматулин жана премьер-министр Аскар Мамин менен жолугушат.

Ошол эле учурда мамлекеттик сапардын алкагында Садыр Жапаровдун Казакстандын ишкерлер чөйрөсүнүн өкүлдөрү менен жолугушуусу пландалган.

Президент Садыр Жапаров Орусияга учуп кетти. Бүгүн, 24-февралда өлкө башчынын Москвага эки күндүк расмий иш сапары башталат. Иш сапардын алгачкы күнү Жапаров орус президенти Владимир Путин менен жолугушат.

Расмий Бишкек да, Москва да жолугушууда эки өлкө ортосундагы саясий алакадан тартып, соода-экономика, маданий жааттагы карым-катнаш, ЕАЭБ алкагындагы интеграциялык биригүү сыяктуу маселелерге чейин сөз болорун жарыялады. Тышкы иштер министри Руслан Казакбаев Орусиядан Кыргызстанга сатылып жаткан газдын баасын арзандатуу маселеси жана гранттык каражаттар караларын айтты.

Мындан сырткары, Жапаров орус өкмөтү жана парламентинин жетекчилери менен жүз көрүшүп, Орусияда жашаган кыргыз диаспорасынын өкүлдөрүнө кездешет. Белгилей кетсек, бул Садыр Жапаровдун президент катары алгачкы чет элдик сапары.