Categories

ЖАПАРОВ МЕНЕН ПУТИН ЖОЛУГУШТУ

Президент Садыр Жапаров 16-майда Москвада Орусиянын башчысы Владимир Путин менен жолугушту. Мамлекет башчынын маалымат кызматы кабарлагандай, Тет-а-тет форматындагы жолугушууда өлкө лидерлери кыргыз-орус эки тараптуу кызматташтыгынын актуалдуу багыттарын талкуулашты.

Путин эки өлкө ортосундагы мамилелер жалпысынан позитивдүү өнүгүп жатканын, былтыр товар жүгүртүүдө олуттуу өсүш болгонун, Орусия Кыргызстандын товар жүгүртүүсүндө ишенимдүү биринчи орунда турарын айтты.

Жапаров Орусия менен бардык багыттар боюнча эки тараптуу кызматташууга даяр жана кызыкдар экенин билдирди. Кыргызстандын президент баштаган расмий делегациясы Москвага Жамааттык коопсуздук келишими уюмунун кезектеги саммитине катышуу үчүн барган.

 
Categories

«ЭЛ ҮМҮТҮ» ЭЛ АРАЛЫК СТИПЕНДИЯЛАР ПРОГРАММАСЫ АЧЫЛДЫ

Кыргызстанда “Эл үмүтү” аттуу эл аралык стипендиялардын жаңы программасы ачылды. Бул тууралуу жарлыкка кол койгонун президент Садыр Жапаров билдирди.

Программада дүйнөнүн алдыңкы 100 университетинин биринин магистратурасы менен докторантурасына өткөн жаштар үчүн быйылтан тартып атайын стипендия каралганы, азырынча 50 улан-кызга берилери, стипендиянын көлөмү тандалып алынган университетке жараша болору, суммасы 50 миң доллардан ашпоого тийиш экени белгилүү болду.

“Экономика жана гуманитардык адистиктер боюнча да тапшырсаңыздар болот, бирок, албетте, артыкчылык көбүрөөк техникалык жана инженердик багыттарга берилет. Илимдин доктору даражасы наамын алууга өзүнчө 10 стипендия бөлүнөт. Биз жаш окумуштуу-окутуучуларыбызды өзгөчө колдоого алалы деп жатабыз. Анткени алар студенттердин улам кийинки муунуна өз билими менен бөлүшүп турушат”, – деп жазды президент социалдык түйүндөрдөгү расмий баракчаларына.

Мындан тышкары, өкмөт дүйнөнүн алдыңкы университеттери менен эки тараптуу максаттуу келишимдерди иштеп чыгууга киришкени маалым болду.

 
Categories

ПРЕЗИДЕНТТИН АЗЕРБАЙЖАНГА РАСМИЙ САПАРЫ

Президент Садыр Жапаров 19-апрелде Баку шаарындагы “Ардак аллеяга” барып, Азербайжандын улуттук лидери Гейдар Алиевдин жана анын жубайы Зарифа Алиеванын мүрзөсүнө гүлчамбар койду. Бул тууралуу мамлекет башчынын басма сөз кызматы кабарлады.

Жапаров расмий сапары менен Азербайжандын борбору Баку шаарына 19-апрелде барган. Президенттин басма сөз кызматы маалымдагандай, эки күндүк сапар алкагында Жапаров Азербайжандын президенти Илхам Алиев менен эки тараптуу сүйлөшүүлөрдү өткөрөт.

Мамлекет башчылары эки жана көп тараптуу кызматташуунун актуалдуу маселелерин талкуулашат. Азербайжандын Милли Межлисинин төрайымы Сагиба Гафарова менен эки тараптуу жолугушуу да пландалган.

 
Categories

«МӨӨНӨТҮМ БҮТКҮЧӨ ЧЕК АРАНЫ ЧЕЧҮҮ НИЕТИМ БАР»

Президент Садыр Жапаров Кыргызстан менен Тажикстандын чек арасында болгон акыркы чыр-чатак боюнча 13-апрелде Фейсбуктагы расмий баракчасына билдирүү жазды. Ал өлкө демократиялык жолдон тайбай турганын, сөз эркиндиги, адам укугу сөзсүз сакталарын билдирди.

“Бирок жалпы журналисттерден, өздөрүн блогер деп эсептеген жарандарыбыздан бир нерсени суранам. Кошуна мамлекеттер менен болгон чыр-чатактарда маалыматты өзүңөр каалагандай бурмалап жана алардын жетекчилерин мазактап, ар кандай видео-фотоматериалдарды таратканды токтоткула. Бул кылыгыңар моралдык этикага туура келбейт. Мындай кылыгыңар менен абалды ого бетер курчутканга, эки элди кайраштырууга түрткү болуп жатасыңар. Ооба, чек ара көйгөйү бар. 30 жылдан бери чечилбей келген маселе. Абдан кылдаттыкты, кыраакылыкты талап кылат. Такташуулар жүрүп жатат. Миңдеген километр такталбаган жерлер бар. Убакыт керек. Менин президенттик мөөнөтүм бүткүчө, бул маселени чечип кетем деген ниетим бар”, – деп жазды Садыр Жапаров.

Президент сөз эркиндиги деген шылтоо менен жалган маалыматтарды таратпоого чакырды.

 
Categories

ПРЕЗИДЕНТ ДЫЙКАН-ФЕРМЕРЛЕРГЕ КАЙРЫЛДЫ

Президент Садыр Жапаров бүгүн, 22-февралда социалдык түйүн аркылуу фермерлерге жана дыйкандарга кайрылып, мамлекет дыйкандарга болушунча кол кабыш кылып, арзан насыяларды берип баштаганын билдирди. Президенттин билдирүүсүнө ылайык, айыл чарба багытында жеңилдетилген насыя берүүгө 26 миллиард сом бөлүнгөн.

«Жакындан бери 3 жылдык мөөнөт менен 6 пайыздан насыя ала баштадыңыздар. Бул насыяларды «Айыл банк», «РСК банк» жана «Керемет банк» өкмөттүк банктары аркылуу берип жатабыз. Жалпысынан айыл чарба багытына арнап, жеңилдетилген насыя берүүгө 26 миллиард сом бөлүнгөн. Мунун ичинде 1,5 миллиард сом үрөн сатып алууга, 1 миллиард сом ирригация тутумун жакшыртууга, калганы дыйкандар менен фермерлерге 3 жылдык мөөнөткө насыя берүү үчүн бөлүндү», — деп айтылат маалыматта.

Быйыл жалпысынан 16 миң тонна жогорку сапаттагы үрөн сатып алынды. Бул үрөндөр мурда карызы бары-жогуна карабастан, дыйкандарга 4,5 %дык үстөгү менен 2 жылдык мөөнөткө берилет. Быйыл дыйкандардын бир бөлүгү алса, кийинки жылы экинчи бөлүгү, аркы жылы үчүнчү бөлүгү насыя алуусуна шарт түзүлөт.

«Биринчи кезекте, элдин курсагы тоюш керек жана тамак-аш коопсуздугу камсыз болуш керек. Алган түшүмүңөр сатылбай калбайт. Өкмөт тараптан ар тараптуу жардам берилет», — деп кошумчалады президент.

 
Categories

ПРЕЗИДЕНТ «УЛУУ КӨЧМӨНДӨРДҮН МУРАСЫНЫН» ИШИ БОЮНЧА КЕҢЕШМЕ ӨТКӨРДҮ

Президент Садыр Жапаров «Улуу көчмөндөрдүн мурасы» улуттук холдинг компаниясынын иши боюнча кеңешме өткөрдү. Анда өнөр жайды, гидроэнергетикалык мүмкүнчүлүктү, санариптик технологияларды өнүктүрүүгө багытталган 32 долбоор, билим берүү, туризм, медицина тармагындагы долбоорлор сунушталды

. Алардын арасында Ысык-Көл облусунда цемент заводунун курулушу каралган. Ошондой эле өндүрүш кубаты жылына 5 млн. тонна болгон «Кавак» күрөң көмүр бассейнин өздөштүрүү долбоору, Куттуу-Сай, Талды-Булак, Андаш кендерин өздөштүрүү долбоорлору бар. Чоң-Кемин, Кара-Көл жана Орто-Токой ГЭСтерин куруу, билим берүү жана IT тармагын колдоо долбоолору, өнөр жай жана кайра иштетүү ишканаларын куруу демилгелери бар.

Президент сунуш кылынган долбоорлордун концепциясын жактырып, «Улуу көчмөндөрдүн мурасы» улуттук холдинг компаниясынын 2022-жылга карата бюджетин бекитип, долбоорлорду өз убагында ишке ашырууну тапшырды.

 
Categories

ПРЕЗИДЕНТ: “БЫЙЫЛ БИШКЕК-КАРА-БАЛТА ЖОЛУ ОҢДОЛУП БҮТСҮН!”

Президент Садыр Жапаров бүгүн, 15-февралда Чүй облусуна болгон иш сапарынын алкагында Бишкек-Кара-Балта унаа жолун реконструкциялоонун жүрүшү менен таанышты.

Транспорт жана коммуникациялар министри Эркинбек Осоевдин айтымында, учурда Бишкек-Кара-Балта унаа жолунун жалпы узундугу 52,5 чакырымдан калган 7,4 чакырымын реконструкциялоо иштери уланууда. Калктуу конуштардагы оңдолгон жолдун негизги унаа жүрүүчү бөлүгү алты тилкелүү болуп, туурасы 3,5 метрди түзөт.

Мындан тышкары, Бишкектин түндүк айланма жолун реконструкциялоо долбооруна ылайык, автожол кеңейтилип, ага жол кайчылаштары, тротуарлар жана жол үстүнөн адамдар өтүүчү өтмөктөр курулат.

Садыр Жапаров ошондой эле Профсоюзная көчөсүндөгү жол куруу долбоору менен таанышты. Долбоорду үстүбүздөгү жылы толугу менен бюджеттик каражаттардын эсебинен ишке ашырып баштоо пландалууда. Узундугу 8,5 чакырымды түзгөн жол Бишкек-Кара-Балта унаа жолуна альтернатива болуп, аны жеңилдетери күтүлүүдө.

Президент Транспорт жана коммуникациялар министрлигине Бишкек-Кара-Балта жолун реконструкциялоону 2022-жылдын аягына чейин бүтүрүп, курулуш иштерин өз убагында жана сапаттуу жүргүзүүнү көзөмөлгө алууну тапшырды.

Ошондой эле унаа транспорттордун үзгүлтүксүз, коопсуз жана ыңгайлуу кыймылын камсыз кылуу максатында Бишкектин түндүк айланма жолунун жана Профсоюзная көчөсүн бойлой айланып өтүүчү жолдун курулуш долбоорунун ишин тездетүүнү тапшырды.

 
Categories

ПРЕЗИДЕНТТИН КЫТАЙГА ИШ САПАРЫ АЯКТАДЫ

Президент Садыр Жапаровдун Кытайдын Бээжин шаарына 3-февралдан 6-февралга чейин болгон иш сапары аяктады. Бул тууралуу Президенттик администрациядан билдиришти.

Сапардын алкагында Жапаров «Бээжин-2022» Кышкы Олимпиада оюндарынын ачылыш салтанатына катышып, Кытайдын Төрагасы Си Цзиньпин менен сүйлөшүүлөрдү өткөрдү. Анда Кытай Кыргызстанга 50 млн. юань кайтарымсыз жардам жана таажылуу вируска каршы 5 млн. доза вакцина берери айтылды.

Өлкө лидерлери саясий, соода-экономикалык, инвестициялык, энергетикалык жана башка тармактарда эки тараптуу кызматташуунун актуалдуу маселелерин талкуулашты. Кытай лидери Кыргызстандан экологиялык таза азыктарды сатып алууга жана энергетика жаатында кызматташууга даярдыгын билдирди.

Ошондой эле пандемиялык чектөөлөрдү эске алуу менен аба каттамдарын акырындап калыбына келтирүү жана жүк ташууну көбөйтүү зарылдыгын белгиледи. “Торугарт” жана “Эркечтам” өткөрмө пункттарынын өткөрүү мүмкүнчүлүгүн кеңейтүү тууралуу сөз кылды.

Си Цзиньпин “Кытай-Кыргызстан-Өзбекстан” темир жолун куруунун жана үч өлкөнүн кызматташтыгын күчөтүү зарылдыгын айтып, бул жалпы Борбор Азия үчүн маанилүү экенин белгиледи. Президент Садыр Жапаровдун иш сапары аяктап, 6-февралда Бишкекке кайтып келди.

 
Categories

ПРЕЗИДЕНТ КЫТАЙГА БАРАТ

Президент Садыр Жапаров 3-6-февралда иш сапары менен Кытайда болот. Бул тууралуу Президенттин администрациясынын тышкы саясат бөлүмүнүн башчысы Жээнбек Кулубаев билдирди.

Иш сапарынын алкагында Жапаров Пекин шаарында өтө турган кышкы олимпиада оюндарынын ачылыш аземине катышып, Кытайдын төрагасы Си Цзиньпин менен жолугушат.

Президенттер саясий, соода-экономикалык жана маданий-гуманитардык кызматташуунун актуалдуу маселелерин талкуулашат. Мындан тышкары, талкуулана турган негизги маселелердин бири Кытай-Кыргызстан-Өзбекстан эл аралык темир жол линиясын куруу тууралуу болору айтылды.

Соода-экономикалык кызматташуунун алкагында кыргыз тарап «Эркечтам» жана «Торугарт» өткөрмө бекеттеринин өткөрүү мүмкүнчүлүгүн кеңейтүү, өлкөлөр ортосундагы аба каттамдарын жандандыруу маселелерин көтөрөт.

Мындан тышкары кыргыз делегациясы энергетика, тоо-кен, айыл чарба жана билим берүү тармактарында бир катар долбоорлорду улантууну ниеттенип, инвестициялык кызматташуу маселелерин талкуулоого даяр.

 
Categories

ПРЕЗИДЕНТ АРАЛЫКТАН ИШТӨӨГӨ ӨТТҮ

Президент Садыр Жапаров Кытай Эл Республикасына боло турган иш сапарына байланыштуу аралыктан иштөө режимине өттү. Бул тууралуу президенттик администрациянын басма сөз кызматынан билдиришти.

Бул дүйнөдө таажылуу вирус инфекциясынын жайылып жаткан учурдагы кырдаалында эпидемиологиялык коопсуздук чараларын сактоо зарылчылыгы менен шартталган. Мамлекет башчысы аралыктан иштөө режимине карабай толук кандуу иш графиги боюнча иштөөсүн улантат.

Үстүбүздөгү жылдын 3-5-февралына белгиленген Кытайга боло турган сапарынын алкагында президент Садыр Жапаров Пекин шаарында 2022-жылкы кышкы Олимпиада оюндарынын ачылыш аземине катышат, ошондой эле Кытайдын төрагасы Си Цзиньпин менен эки тараптуу жолугушуу өткөрөт.