Чаткал районунда тоо-кен тармагында иш жүргүзгөн компания экологияга зыян келтиргени үчүн мамлекетке 103 миллион сом төлөөгө милдеттендирилди. Бул туурасында Башкы прокуратуранын маалымат кызматы билдирди.

Маалыматка ылайык, Жер ресурстары боюнча мамлекеттик агенттикке караштуу “Кадастр” мекемеси тоо-кен тармагындагы “Ч.З” ишканасына өндүрүш үчүн убактылуу жер пайдаланууга күбөлүк жана 726 га жер тилкесин бекер берген.

Жалал-Абад облустук прокуратурасы тарабынан жүргүзүлгөн текшерүү учурунда Кыргызстандын жаратылышына өзгөчө ири өлчөмдөгү зыян келтирилгени аныкталган.

Буга байланыштуу Жалал-Абад облустук прокуратурасы пайданы өндүрүү максатында сотко доо арыз менен кайрылган. Чаткал райондук соту доо арызды жарым-жартылай канааттандырып, “Ч.З” ишканасынан 103 миллион сом өндүрүү чечимин чыгарды.

Экотехинспекциянын Аксы, Ала-Бука жана Чаткал райондору боюнча башкармалыгынын билдирүүсүнө ылайык, айыл чарба жоготууларынын жана алынбай калган пайданын өлчөмү 133 739 682 сом экендиги такталган.

Былтыр декабрда жер ресурстары боюнча мамлекеттик агенттиктин директору коррупцияга шектелип кармалган. Улуттук коопсуздук боюнча мамлекеттик комитети (УКМК) аны “Кадастр” мамлекеттик ишканасынын аймактык бөлүмдөрүнүн жетекчилеринен мыйзамсыз акча алган туруктуу коррупциялык схема уюштурган деп шек санап жатканын билдирген.

Өткөн айда “Кадастр” мекемесинин Оштогу филиалынын жетекчи да коррупцияга шектелип кармалды.

Уюшкан кылмыштуу топтун мүчөлөрүн жана аларга байланышы бар адамдарды президент жана парламенттик шайлоого катыштырбоо сунушталууда. ИИМ “Президент жана ЖК депутаттарын шайлоо боюнча” жана “Уюшкан кылмыштуулукка каршы аракет тууралуу” конституциялык мыйзамга өзгөртүү киргизүүнү сунуштап жатат. Мындан сырткары, мыйзамга уюшкан кылмыштуу топтун мүчөлөрү жергиликтүү кеңештин депутаты болбогондой жана мамлекеттик, муниципалдык кызматтарга дайындала албагандай өзгөрүү кирүүдө.

ИИМ билдиргендей, мындай кызматтарга соттолгон адамдар, анын ичинде уюшкан кылмыштуу топтордун курамында болгондор дайындалбаш керек. Ушул эле категорияга кылмыштуу топтордун кызыкчылыгын коргоп кылмыш кылгандар же ИИМдин каттоосунда уюшкан кылмыштуу топтун мүчөсү катары тургандар да кирери кошумчаланды.

Министрлик уюшкан кылмыштуу топтун мүчөлөрү криминалдык акчаларды легалдаштыруу үчүн саясий партияларга, коомдук кыймылдарга кирип алышарын эскерткен. Мындан сырткары, кылмышкерлер тарабынан партияларды каржылоо да кооптуу тенденция экени белгиленди. ИИМ акыркы жылдары криминал чөйрөсүнүн өкүлү жок бир да парламенттик шайлоо кампаниясы өтпөй калганын кошумчалаган.

Учурда коомчулуктун көңүл борборундагы негизги окуя эки күн мурун Улуттук коопсуздук мамлекеттик комитетинин төрагасы Камчыбек Ташиевдин өткөргөн маалымат жыйыны болууда.

Анда УКМК төрагасы коррупцияга байланыштуу бир катар жагдайларды коомчулукка шардана кылды.

Ошондон бери Камчыбек Ташиевдин айткандары чоң талкууга жем таштады. Дээрлик көпчүлүк Камчыбек мырзанын айткан-дегендерине моокумдары канып, ар тараптуу алкап туру.

Айрыкча, эки жарым айдагы кыска аралыкта жемкорлук менен күрөшүү мурда болуп көрбөгөндөй зор, натыйжалуу жүрүп жаткандыгы алкышка арзыйт.

Ушунчалык кыска убакытта 2 миллиард 700 миллион сомдон ашык акча УКМК тарабынан казынага кайтарылышынын өзү эле не деген зор эмгек!

Анткен менен кызыктын баары Жогорку соттун төрайымы Гүлбара Калиеваны кылмыш жоопкерчилигине тартуу маселеси коомчулукта эки ача пикир жаратууда.

УКМКнын төрагасы төрайым Калиева тууралуу айтып оозун жыйганча Жогорку соттун маалымат кызматы дароо бидирүү таратып, коомчулукка айгай салып чыкты.

Анысы аз келгенсип, Соттор кеңеши да президенттин милдетин аткаруучуга кайрылуу жолдоп, укук коргоо органдары тарабынан сот системасына мурда болуп көрбөгөндөй басмырлоо, ыдык көрсөтүү болуп жатат деп ыйлактап жиберди.

Таң калычтуусу, мурдагы бийликтердин тушунда башка адамдардын конституциялык укуктары тебеленип, күнөөсүз-күнөөлүү болуп жаткан чакта эмнеге дал ушул Соттор кеңеши «а» деп үн катпай жүргөн?!

Эми соттор чекесинен жемкорлукка шектелип кармала баштаганда “Карга карганын көзүн чукубайт” болуп жандалбастап жатат.

Учурунда бир топ саясатчылар ак жеринен күнөөлөнүшүп, темир торго киргизилип жатканда «күнөөсүздүк презумпциясы» дегени кайда эле?!

Ошондо эмне бул жагдайды айтышып, калыстыгын көрсөтүшпөгөн?!

Азыркы бийлик мурдагылардан кескин айырмаланып чабактарды эмес, акулаларды кармап жатат.

Жемкорлордун ана башчыларын, киттерди кармап жатат.

Уурулар менен күрөшүү дал ушундай болуш керек эле.

Мурдагылар көбүнесе тандалма күрөшүү жүргүзүшүп, чабактарын кармашып, акулаларын коюп жиберишчү.

Мыйзам баарына бирдей болгондон кийин соттор да мыйзамга баш ийишип, мыйзам чегинде жоопкерчиликке тартылып, ак болсо актыгын далилдешип алышсын да!

Неге алар өзгөчөлөнүш керек?

“Шектүү шектенет” болуп камалбай жатып ызы-чуу салуу сотторго аброй алып келбейт!

Тескерисинче, сот системасы арасындагы жемкорлордон тазаланышы зарыл!

Андыктан таза соттор Ташиевге ыраазы болушуп, сот системасын тазалоого салым кошуп жаткандыгына алкыш айтышпайбы?!

Камчыбек Ташиев аталган кызматка адеп киришкенде мындан ары өлкөбүздө уюшкан кылмыш топторуна, бандиттерге аёосуз күрөш жүрөт деп айткан эле.

Ал айткан сөздөрүнүн өтөсүнө чыгып жатат.

Учурда бандиттер качып, безип жок болуп бара жаткандыгына көпчүлүк күбө болуудабыз.

Жумурай журтубуз буга ыраазы.

Буйруса Кудай Камчыкеге ден соолук, күч-кубат берсе алдыда дагы далай арбын иштер болот деп үмүт кылабыз жана ишенебиз!