Президент Сооронбай Жээнбеков бүгүн Түркиянын Президенти Режеп Тайип Эрдоган менен телефон аркылуу сүйлөштү.
Бул тууралуу президенттин маалымат кызматы билдирди.
Сүйлөшүүдө өлкө башчылары эки жана көп тараптуу кызматташуунун маселелерин жана буга чейинки макулдашуулардын ишке ашыруусун талкуулашты.
Эки лидер Курман айт майрамы менен бири-бирин куттукташып, эки элге тынчтык жана бакубатчылык каалашты.
Өзбекстандын премьер-министри Абдулла Арипов1-августта жумушчу сапары менен Бишкекке келет. Бул тууралуу Өкмөттүк аппараттын маалымат кызматы билдирди.
Абдулла Арипов жумушчу сапарынын алкагында өкмөт башчы Мухаммедкалый Абылгазиев менен тар жана кең чөйрөдө жолугушат.
Эске салсак, 13-июнда Өзбекстандын президенти Шавкат Мирзиёев менен президент Сооронбай Жээнбеков жолугушуп, кыргыз-өзбек мамилесин тереңдетүүнү убадалашкан болчу.
Кыргызстандын президенти Сооронбай Жээнбеков менен Тажикстандын президенти Эмомали Рахмон жолугушат. Бул тууралуу Тышкы иштер министрлигинин маалымат кызматы билдирди.
Маалыматка ылайык, жолугушууда эки тараптуу маселелер талкууланып, кыргыз-тажик чек арасы боюнча делимитация жана демаркация маселеси каралмакчы.
Эске салсак, 22-июль күнү кыргыз-тажик чек арасында кайрадан чыр чыгып, 16 адам жабыркаган. Ага Ворух айылынын жашоочуларынын айылдын кире беришине желек орнотуусу себеп болгон.
Түштүк Корея Республикасынын премьер-министри Ли Нак Ён расмий сапары менен Кыргыз Республикасына келди. «Манас» эл аралык аэропортунан аны Өкмөт башчы Мухаммедкалый Абылгазиев тосуп алды. Бул тууралуу Өкмөттүн маалымат кызматы билдирди.
Корея Республикасынын Премьер-министринин расмий сапарынын алкагында бир нече иш-чара пландаштырылган.
Атап айтсак, Кореянын 50дөн ашуун компаниясынын катышуусунда кыргыз-корей бизнес-форуму өтөт. «В2В» түрүндөгү жолугушууларды, ошондой эле, эки тараптуу бир катар жолугушууларды өткөрүү пландалган. Сүйлөшүүлөрдө тараптар соода, айыл чарба, саламаттык сактоо, тоо-кен тармагы, туризм, энергетика, транспорт, текстилдик өнөр жай, маалыматтык технологиялар чөйрөсүндө жана маданий-гуманитардык байланыштарды бекемдөө багытында кызматташууну өнүктүрүү маселелерин талкуулашат.
Мындан тышкары, Түштүк Кореянын премьер-министрин Кыргыз Республикасынын президенти Сооронбай Жээнбеков кабыл алат.
Расмий сапардын жыйынтыгы боюнча бир катар эки жактуу документтерге кол коюу пландалууда.
Орусия-Грузия аба каттамына тыюу салынды. Бул тууралуу РИА Новости агенттиги жазды.
Бүгүн, 8-июлда «Аэрофлот» компаниясынын учагы Тбилиси – Москва каттамы аркылуу «Шереметьево» аэропортуна келип конду. Бул — Грузиядан Орусияга түз учкан акыркы учак. 8-июлдан тарта эки мамлекет түз аба каттамына тыюу салды, авиакомпаниялар кызматташууну токтотушту.
Кошумчалай кетсек, 20-июнда Тбилисиде Орусиянын Православ парламенттик ассамблеясынын депутаттарынын Грузияга болгон сапарынан кийин нааразылык акциялары башталган. Демонстранттардын көтөрүлүшү бир топ күнгө уланган. Анын негизинде, Орусиянын президенти Владимир Путин орус авиакомпанияларына 8-июлдан баштап Грузияга учууга убактылуу тыюу салган жарлык кабыл алган.
Президент Сооронбай Жээнбеков телефон аркылуу Казакстан Республикасынын Президенти Касым-Жомарт Токаев менен сүйлөштү. Бул тууралуу Өлко башчысынын маалоымат кызматы билдирди.
Сооронбай Жээнбеков Касым-Жомарт Токаевге Казакстандын Түркстан облусунун Арыс шаарындагы абалга байланыштуу колдоо сөздөрүн билдирди. Ал Кыргызстан өзгөчө кырдаалды жоюуда жардам берүүгө даяр экенин белгиледи.
Президент Сооронбай Жээнбеков курман болгондордун үй-бүлөлөрүнө көңүл айтып, жабыркагандарга тез сакайып кетүүсүн каалады.
Кытай элинен Ош облустук балдардын клиникалык ооруканасына жана 7 районго жалпы суммасы 2млн сомду түзгөн 11 даана заманбап реанимобилдик жабдыктар жана анализаторлор берилди.
Аталган медициналык аппараттар Кыргыз-Кытай кызматташтыгынын алкагында кайтарымсыз грант түрүндө келген.
Мындай жабдыктар оор өнөкөт дарттарды айыктырууга, наристелердин өмүрүн узартууга өбөлгө болот.
Австрия Республикасынын Парламентинин Федералдык Кеӊешинин Президенти Инго Аппе Кыргызстанга расмий иш сапар менен келди. Бул тууралуу Жогорку Кеӊештин Басма сөз кызматы билдирди.
Жогорку Кеӊештин Төрагасынын орун басары Мирлан Бакиров кадырлуу конокту бүгүн, 24-июнда “Манас” эл аралык аба майданынан тосуп алды.
Иш сапар учурунда Инго Аппе жетектеген Австрия парламентарийлери Жогорку Кеӊештин Төрагасы Дастанбек Жумабеков менен жолугушуп, парламентер аралык кызматташтык, мыйзам чыгаруу айдыӊындагы мамилелердин келечеги туурасында пикир алышат. Ошондой эле расмий делегациянын курамы Чынгыз Айтматовдун үй-музейинде болгон соӊ, “Ата-бейит” мемориалдык комплексинде 1916-жылдын курмандыктарын эскерип, гүлчамбар коюшмакчы.
Өлкөнүн Тышкы иштер министр Чыңгыз Айдарбеков бүгүн Кореянын Кыргызстандагы Элчиси Ха Тэ Ёк мырзаны кабыл алды. Бул тууралуу министрликтин маалымат департаменти кабарлады.
Тараптар кыргыз-корей мамилелеринин азыркы абалы жана саясий, экономикалык, парламенттер аралык, маданий-гуманитардык чөйрөлөрдө практикалык өз ара аракеттенүүнү өнүктүрүү, ошондой эле, кызматташуунун өзүнчө долбоорлору боюнча пикир алмашышты.
2019-жылдын июль айына мерчемделген Корея Республикасынын премьер-министри Ли Нак Ёндун Кыргызстанга расмий сапарын даярдоо маселелерине өзгөчө көңүл бурулду.
Сапарды жогорку деңгээлде ийгиликтүү өткөрүү максатында тараптар тыгыз координациянын, ошондой эле алдыдагы бизнес-форумдун мерчемин тыкыр иштеп чыгуунун маанилүүлүгүн белгилешти.
“Дастан” заводу Орусиянын “Уралтрак” заводу менен биргеликте трактор чыгарат. Мындай маалыматты аталган заводдун маркетологу Самат Чекиров билдирди.
Анын айтымында, ушул жылдын апрель айында бизнес форум өткөрүлүп, эки тараптуу келишимдер түзүлгөн. Келишимге ылайык, Орусия тарап трактордун тетиктерин берип, ал Кыргызстандан куралмак.
Маркетолог маалымдагандай, ушул жылдын жай-күз айларына карата 150 даана трактор куралып, сатыкка чыгарылары мерчемделүүдө. Азырынча сыноодон өтүп жатат. Тракторлор Кыргызстандын дыйкандарына сатылат жана ошондой эле, Өзбекстан менен Тажикстанга экспорттолот.
