Бүгүн, 25-май акыркы коңгуроо күнүндө өлкө боюнча коомдук тартипти камсыздоого 3 миң 391 милиция кызматкери тартылды. Бул тууралуу ИИМдин басма сөз кызматынан билдиришти. Маалыматка ылайык, милиция кызматкерлери ата-энелерге акыркы коңгуроо иш-чарасына байланыштуу отуруштарды уюштурбоо, жашы жете электерге автотранспорттук каражаттарды бербөө керектиги эскертилип, ар кандай кечелерди уюштуруунун алдын алуу максатында түшүндүрүү иштери жүргүзүлүүдө.

“Укук коргоо органдары коомдук коопсуздукту камсыздоо чараларын жогорку деңгээлде ишке ашыруу, мектептин бүтүрүүчүлөрү аралашкан жол кырсыктары, кыз ала качуу, массалык мушташ жана башка коомго жат көрүнгөн кылмыш окуяларынын алдын алуу боюнча күчөтүлгөн тартипте иш алып барышат. Чек ара аймактарында, тагыраагы, Баткен, Ош, Жалал-Абад облустарында ар түрдүү куралдуу кагылышуулардын алдын алуу үчүн чек ара кызматы, жергиликтүү бийлик органдары жана мамлекеттик органдар менен тыгыз байланышта иш алып барып, коомдук жайларда, чек арага жакын аймактарда милициянын кайгуул иштери үзгүлтүксүз жүргүзүлөт”, – деп айтылат маалыматта.

Бишкек шаарынын Ленин районунда жеке менчикке мыйзамсыз берилип кеткен, баасы 28 миллион 273 миң сомго бааланган жер тилкелери мэрияга кайтарылды. Башкы прокуратуранын маалыматына караганда, Ленин райондук администрациясынын кызмат адамдары 2005-жылы Арча-Бешик жаңы конушундагы беш жер тилкесин турак үй куруу үчүн мыйзамсыз түрдө жеке жактарга берип жиберишкен.

Прокуратура тиешелүү документтерди жокко чыгаруу жөнүндө прокурордук акты менен сотко кайрылган. Жыйынтыгында прокуратуранын доо арызы толук канааттандырылып, жер тилкелери мамлекеттин менчигине алынды.

Таажылуу вируска каршы ыкчам штабдын маалыматына ылайык, Кыргызстанда 71 774 киши вакцина алды. Алардын ичинен 22 520сына экинчи доза сайылды. Кыргызстанда Кытайдын “Sinopharm” жана Орусиянын “Спутник V” вакциналары менен эмдөө жүрүп жатат. Анын алкагында орусиялык “Спутник V” вакцинасы толугу менен сайылып бүтүп, экинчи дозасы гана калды.

Расмий маалыматка караганда, 24-25-майга чейин 75 миң кишиге эсептелген Кытайдын Sinopharm вакцинасы да бүтөт. Андан соң июнь айында Asrta Zeneca вакцинасынын 210 миң дозасы COVAX программасынын алкагында келет. Ошондой эле кыргыз өкмөтү Кытай менен Орусиядан дагы вакцина алуу тууралуу сүйлөшүп жатат.

Эпидемиологиялык кырдаалга байланыштуу Бишкекте айрым маданий мекемелер карантинге алынып, эл көп катышкан иш-чараларга тыюу салынган.

Таажылуу вируска каршы ыкчам штабдын маалыматына ылайык, акыркы суткада илдет 191 адамдан табылып, 6 киши каза болду.

АКШнын эң ири интернет базары болгон “Amazon” компаниясы Кыргызстанда товар өндүргөндөр үчүн соода мүмкүнчүлүгүн ачты. Мындан ары каалоочулар аталган компаниянын онлайн порталына катталуу менен өз товарын эл аралык платформада сата алат. Кыргызстанга ачылган мүмкүнчүлүк тууралуу “Amazon” интернет сайтындагы өлкөлөрдүн тизмеси жаңырганда белгилүү болду.

Борбор Азиядан Казакстан, Өзбекстан, Тажикстан жана Түркмөнстан да бул тизмеге кирди. Буга чейин эң ири интернет базарга кыргызстандыктар катталганы менен өз товарын сатууга мүмкүнчүлүк болгон эмес. Ошондой эле дүйнөлүк базарда сатылган товарды Кыргызстанга жеткирүү кызматы болбой келген. Эми каалоочулар компаниянын сайтына расмий катталып, банктагы эсеп номурларын да киргизүү менен соода баштай алышат.

Аалымдар кеңешинин Каттоо жана аттестациялоо комиссиясынын 19-майдагы протоколдук чечимине ылайык, Кыргызстан Мусулмандар дин башкармалыгынын башчысына сынак 21-майда өтөт. Бул тууралуу муфтияттан билдиришти. 22-майда Борбордук текшерүү комиссиясынын төрагасынын кызмат ордуна, 24-25-май күндөрү Аалымдар кеңешинин VII чакырылышынын мүчөлүгүнө сынак өтөт.

Муфтий болуу үчүн тапшыргандардан алты талапкердин документтери туура келди. Буга чейин муфтияттын башчысын шайлоо боюнча Аалымдар кеңешинин курултайынын мөөнөтү жылып, 29-майга белгиленген. Аалымдар кеңешинин VII чакырылышынын мүчөлүгү, муфтийликке жана Борбордук текшерүү комиссиясынын төрагалыгына сынак быйыл 17-февралда жарыяланган.

10-февралда атайын кызмат мурдагы муфтий Максатбек Токтомушевди башкармалыктагы мыйзамсыз финансылык иштер боюнча козголгон кылмыш ишине шектүү катары кармаган. Бишкектин Биринчи май райондук соту аны 12-февралда жашаган жеринен башка аймакка чыкпоо тилкаты менен бошоткон. 11-февралда Аалымдар кеңеши кезексиз жыйынга чогулуп, Токтомушевдин муфтийликтен өз каалоосу менен баш тарткан арызын карап, канааттандырган. Азыр анын милдетин муфтийдин орун басары Жоробай Шергазыев аткарууда.

Артем Новиков министрлер кабинетинин төрагасынын биринчи орун басарлыгынан бошотулуп, Кыргыз-Орус өнүктүрүү фондунун башкармалыгынын төрагасы болуп дайындалды. Бул тууралуу министрлер кабинетинин басма сөз кызматы кабарлады.

Фонддун Уставына ылайык, төрага үч жылдык мөөнөткө дайындалат.

Буга чейинки жетекчи Азиз Аалиев фонддун төрагасы болуп быйыл 19-мартта дайындалган. Ага чейин ал бул кызматта 2020-жылдын февраль-октябрь айларында иштеген.

Кыргыз-Орус фонду 2014-жылы эки өлкөнүн өкмөттөрүнүн ортосундагы келишимдин негизинде Кыргызстандын ЕАЭБге интеграция болушуна орус тараптан жардам катары түзүлгөн.

Бүгүн, 19-майга карата Токтогул суу сактагычындагы суунун көлөмү 9 миллиард 814 миллион метр кубду түздү. Бул тууралуу “Электр станциялары” ачык акционердик коомунун басма сөз кызматынан билдиришти.

“Бүгүн, 19-майга карата Токтогул суу сактагычындагы суунун көлөмү 9 миллиард 814 миллион метр кубду түздү. Суунун орточо күндүк агып кириши секундасына 509 метр куб, агып чыгышы 365 метр кубду түзүүдө”, – деп билдиришти басма сөз кызматынан. Кечээ, 18-майда суу сактагычта 9 миллиард 801 миллион метр куб суу бар болчу.

Кыргызстанда Жалпы республикалык тестирлөө башталды. Бул тууралуу Билим берүү жана илим министрлигинин маалымат кызматы кабарлады. Ага ылайык, ЖРТнын 1-туру кечээ башталып, бүгүн, 19-майда, уланууда. 1-турга жетишпей калгандар 2-3-турга катышса болот. 2-туру 21-22-майда, ал эми 3-тур 22-23-июнда өтө турганы маалым болду.

“Тестирлөө 115 борбордо жүрүүдө. Ал жакта бүтүрүүчүлөрдүн коопсуздугун жана ден соолугун камсыз кылуу үчүн бардык шарттар түзүлгөн. Медициналык кызматкерлер да иштеп жатат. ЖРТдан өтүүгө өлкө боюнча жалпы 42 817 абитуриент катталган”, – деп айтылат маалыматта.

Министрлик тестирлөөгө Кыргызстандын орто жана орто кесиптик билими бар жарандары катыша аларын белгиледи.

Министрлер кабинетинин төрагасынын орун басары, экономика жана финансы министри У.Карымшаков Экономика жана финансы министрлигине караштуу Туризм департаментинин, министрлер кабинетинин Ысык-Көл облусундагы ыйгарым укуктуу өкүлүнүн жана Кыргызстан курорттор ассоциациясынын уюштуруусу алкагында ички жана эл аралык өнөктөштөрдүн колдоосу менен өткөрүлгөн Ысык-Көл облусунун Чолпон-Ата шаарында орун алган «Рух-Ордо» маданий борборунда кезектеги эл аралык Ысык-Көл ITF-2021 туристтик көргөзмө-жарманкесине катышты.

Иш-чаранын башкы максаты болуп Кыргызстандын туризм дараметин алдыга жылдыруу, туризм жаатын калыбына келтирүү, этно жана экотуризм өлкөсү катары таанытууну улантуу жана андан ары өнүктүрүү эсептелет.

Жарманкеге президент С. Жапаров, Казакстан, Өзбекстан, Россия, Түркия, Венгрия, Индия, Швецария өлкөлөрүнүн элчилери жана өкүлдөрү, Бириккен улуттар уюмунун Кыргызстандагы өкүлү, Россия Федерациясынын Башкортостан, Свердловск жана Челябинск облустарынын тийиштүү мамлекеттик органдарынын атайын делегациялары, Маданият, маалымат, спорт жана жаштар саясаты министри К.Олжобаев, БУУ Кыргызстандагы өкүлү Озонниа Ожиело, HELVETAS Swiss Intercooperation (HELVETAS Swiss Intercooperation) ассоциациянын Кыргызстандагы филиалынын директору Анна Элизабет Хелена де Беер, ПРООН, ACTED, GIZ өкүлдөрү, туризм жаатын өнүктүрүүгө колдоо көрсөткөн эл аралык уюмдардын жетекчилери жана өкүлдөрү, жүздөн ашуун туристтик бизнестин өкүлдөрү ж.б. кызыкдар тараптар катышышты.

Көргөзмөдө министрлер кабинетинин Нарын, Жалал-Абад, Чүй, Талас,  Ысык-Көл облустарынын, Бишкек шаарынын мэриясынын боз үйлөрү тигилип, жогорку деңгээлде аймактардын дарамети чагылдырылды, аймактардын түрдүү продукциялары жана туристтик продукттары сунушталды.

Өлкө башчы С.Жапаров мамлекеттин негизги максаты – туристтик индустриядагы ишканалардын иштешине жагымдуу шарттарды, заманбап мыйзамдарды жана ченемдик укуктук базаларды түзүп чыгуу, кооз жаратылышка бай болгон өлкөбүздү туристтер үчүн жагымдуу өлкөгө айландыруу экендигин белгилеп, расмий түрдө Ысык-Көл ITF-2021 эл аралык туристтик жарменкесин жана 2021-жылдын жайкы туристтик мезгилин ачты.