Categories

БАҢГИЗАТ САТКАН ИРИ КАНАЛ КОЛГО ТҮШТҮ

Ички иштер министрлиги трансулуттук баңги тобунан баасы 1 миллион 808 миң долларлык баңгизат алынганын билдирди. Мекеменин маалыматы боюнча, министрлик Казакстандын атайын кызматы менен бирге Борбор Азияга синтетикалык заттарды интернет аркылуу саткан топтун ишине бөгөт койду.

Трансулуттук баңги тобунун ишмердүүлүгүн жоюу боюнча биргелешкен атайын операция Кыргызстан менен Казакстандын аймагында жарым жыл бою жүргүзүлгөн. Жыйынтыгында баңги жана психотроптук заттардын ири партияларын даярдоого, контрабандага жана сатууга тиешеси бар Кыргызстандын үч, коңшу өлкөнүн төрт жараны кармалды. Алардан 31 кг 265 грамм баңгизат алынып, аны даярдаган эки жер жоюлду.

 
Categories

АЁОСУЗ САБАЛГАН АЯЛ. ШЕКТҮҮ КАТАРЫ КҮЙӨӨСҮ КАРМАЛДЫ

Караколдо аялын сабап кыйнаган деп шектелип жаткан адамга карата иш козголуп, өзү камакка алынганын Ысык-Көл облустук милициясы 16-майда билдирди. Мекеменин басма сөз кызматынын маалыматына караганда, 14-майда милицияга облустук ооруканага ур-токмокко кабылган 38 жаштагы келин жаткырылганы тууралуу маалымат түшкөн.

Бул факт боюнча Каракол милициясында Кылмыш-жаза кодексинин 177-беренесинин (Үй-бүлөлүк зомбулук) негизинде сотко чейинки териштирүү башталып, аялды 29 жаштагы күйөөсү кызганычтан улам сабаганы маалым болгон. Кийин 138-берене (Уруп-сабап кыйноо) боюнча кылмыш иши козголгон. Келинге коргоо ордери берилген.

Окуя тууралуу алгач 15-майда караколдук укук коргоочу Камил Рузиев жазып чыккан. Ал майыптыгы бар, ооруканага оор абалда түшкөн Айзат Үсөнбаева буга чейин да күйөөсүнүн ур-токмогуна кабылганын билдирген.

 
Categories

«ТЫНЧТЫККА КАРШЫ КЫЛМЫШ». ОК АТЫШУУГА БАЙЛАНЫШТУУ КЫЛМЫШ ИШИ КОЗГОЛДУ

Баткенде кыргыз-тажик чек арасындагы 12-апрелдеги ок атышууга байланыштуу “тынчтыкка каршы кылмыш” беренеси менен кылмыш иши козголду. Прокуратуранын билдиришинче, мекемелер аралык тергөө тобу түзүлдү.

Кыргыз-тажик чек арасында 12-апрелде ок атылган окуя катталган жана тараптар үч ирээт жолугуп сүйлөшкөн. Анда тараптар чек арага тартылган кошумча күчтөрдү жана каражаттарды кайра кайтарууну улантууну, бул чечимдин аткарылышын көзөмөлдөө үчүн тиешелүү органдардардан турган комиссия түзүүнү макулдашкан.

Ошондой эле күзөтчүлөрдүн каттамын тактоо үчүн эки өлкөнүн чек арачыларынан турган жумушчу топ түзүлөрү айтылган. Бул жаңжалда Кыргызстандын алты жараны жараат алган.

 
Categories

АЙДООЧУ СҮЗҮП КЕТКЕН КЫЗ ООРУКАНАДА КӨЗ ЖУМДУ

Бишкекте айдоочу сүзүп кеткен кыз ооруканада көз жумган. Ал Талас шаарынын 1995-жылы туулган тургуну болгон. Бул тууралуу ЖКККББнын маалымат кызматы кабарлады. Ошондой эле милиция кызды сүзүп кеткен айдоочу эки суткага убактылуу кармоо жайына киргизилгенин кабарлады.

Кечээ, 7-апрелде эртең менен Subaru Forester үлгүсүндөгү автоунаанын айдоочусу Opel Astra үлгүсүндөгү машина менен кагышкан. Биринчи автоунаа кырсык болгон жерден из жашырып баратып Исанов менен Киев көчөлөрүнүн кесилишинен жол чырактын кызыл жарыгына токтобой жолдон өтүп бараткан кызды сүзүп кеткен.

Айдоочу андан ары Бөкөнбаев менен Логвиненко көчөлөрүнүн кесилишиндеги жолдун жээгиндеги электр мамысын сүзүп токтогон. Милициянын маалыматында, 27 жаштагы киши мас болгон.

Жабыркаган кыз өтө оор абалда Улуттук госпиталга жеткирилип, ооруканада үзүлгөн.

 
Categories

ИИМ КАРЖЫ ПИРАМИДАСЫ ӨНҮГҮП ЖАТКАНЫН ЭСКЕРТТИ

Каржы пирамидасы жарандарды алдоо менен өнүгүп жатат. Бул тууралуу ИИМдин басма сөз кызматынан билдиришти. Маалыматка ылайык, өлкөдө жыл сайын он миңдеген жарандар каржы пирамидалардын курмандыгы болушат.

Ар кандай каржы пирамидалар жарандардын чөнтөгүнөн алынган акча менен өнүгүп жатат. Алдамчылар кыймылсыз мүлк, облигациялар жана акцияларды сатып алууну сунушташат, жогорку кирешелүү интернет долбоорлоруна, курулушка жана айыл чарбасына акча салууга убада беришет.

Жогорку натыйжалуу өндүрүшкө инвестиция салууга үгүттөп келишет. Көпчүлүк жабырлануучулар акчаларынан кол жууганына моюн сунушуп, алдамчыларга карата эч кандай аракет көрүшпөйт. Анын натыйжасында башка адамдарды алдоону улантууга өбөлгө түзүлүүдө.

“Эгерде сиз же сиздин жакындарыңыз каржы пирамидасынын курмандыгы болсо же сизге карата укукка каршы аракеттер болуп жатат деп шектенип жатсаңыз Ички иштер органдарына токтоосуз кайрылыңыз. Ички иштер министрлиги жарандарга мамлекетибиздин мыйзамдуу өкүлдөрү болгон мамлекеттик банктарга жана ипотекалык компаниялар менен гана өз ара кызматташууну сунуш кылат”, – деп жазылат маалыматта.

 
Categories

ДАЙЫНСЫЗ ЖОГОЛГОН СТУДЕНТТИН СӨӨГҮ ТАБЫЛДЫ

Ошто 4-курста окуган студент кыздын сөөгү табылып, аны өлтүрдү деген шектүү кармалды. Бул тууралуу Ош шаардык ички иштер башкармалыгынын маалымат кызматы кабарлады.

Билдирмеге караганда, милицияга Ош шаарына караштуу Кеңеш айылынын тургуну арыз менен кайрылып, 22 жаштагы кызы 2022-жылдын 30-январында үйдөн окууга чыгып кеткен боюнча дайынсыз болуп жаткандыгын билдирген.

Мындан улам милиция ыкчам иликтөө иштерин жүргүзүп, кылмышка шектүү катары 24 жаштагы эркек кишини кармаган. Ал Ош мамлекеттик университетинин 4-курсунда окуганы маалым болду.

Шектүү сүйлөшкөн кызы менен жолугуп, өзү жашаган үйгө барганын, ал жактан урушуп кеткенин айткан. Пикир келишпестиктен улам аны бычактаганын моюндаган. Ал кыздын сөөгүн үйдүн жанына көмүп, кийимдерин ажатканага ыргытып жибергенин да айткан. Ал күнү кайра окууга барып, окуя болгон күндүн эртеси Өзбекстан аркылуу Орусияга учуп кеткенин билдирген.

Укук коргоо органдары шектүү Россияга барып кайра Кыргызстанга келген жеринен колго түшүрүлгөн. Шектүүнүн көрсөтмөсүнүн негизинде укук коргоо органдары 8-февраль күнү Кара-Суу районундагы Ишкаван айылына барып, ал жашаган үйдүн короосунан изделип жаткан 22 жаштагы кыздын сөөгүн табышкан.

Бул иш боюнча «Адам өлтүрүү» беренеси менен иш козголуп, шектүү Ош ШИИБдин убактылуу кармоочу жайына киргизилген.

 
Categories

БАЖЫ КЫЗМАТЫНЫН ТӨРАГАСЫ КАРМАЛДЫ

Улуттук коопсуздук боюнча мамлекеттик комитет Мамлекеттик бажы кызматынын төрагасы Адилет Кубанычбеков 17-январда коррупцияга шек саналып кармалганын билдирди.

Атайын кызмат тараткан маалыматка ылайык, Бажы кызматынын жетекчилиги товарларды импорттоого катышкан жеке компаниялардын кызыкчылыктарын колдоп, аларга жеңилдетилген шарттарды түзгөн. Бажылык тариздөө мыйзамы одоно бузулуп, параны системалуу алып туруу үчүн жашыруун схемалар колдонулганы аныкталганы кабарланды.

“Мындан тышкары, Бажы кызматынын жетекчилиги мамлекеттин кызыкчылыгына жашынып жеке баюу максатында, тышкы экономикалык ишмердиктин субъектилери үчүн туунду компаниялар көрсөткөн бажы кызматтарынын баасын негизсиз ашыра баалап тургандыгы аныкталды”, – деп айтылат маалыматта.

Бул фактылар боюнча 17-январда Кылмыш-жаза кодексинин “Коррупция” беренеси менен кылмыш иши козголуп, анын алкагында Адилет Кубанычбеков кармалып, УКМКнын убактылуу кармоочу жайына киргизилген.

 
Categories

ЭКИ АДАМДЫ БЫЧАКТООГО ШЕКТЕЛИП УКТ МҮЧӨЛӨРҮ КАРМАЛДЫ

Ысык-Көлдө эки адамды бычактоого шектелип уюшкан кылмыштуу топтун мүчөлөрү кармалды. Бул тууралуу Ички иштер министрлигинин маалымат кызматы билдирди.

5-январь күнү болжол менен кечки саат 20:30 чамасында Балыкчы шаардык милициясына ушул эле шаардын ооруканасына бири 31 жаштагы, бири 32 жаштагы эки жигит бычак жеп түшкөнү кабарланган.

Айтылган факт Кылмыштардын бирдиктүү реестрине Кылмыш-жаза кодексинин 130-беренеси менен катталган. Атайын тергөө тобунун иликтөөсүнүн негизинде жигиттерди бычактагандар 30 жана 28 жаштагы Ысык-Көл облусунун эки тургуну экени такталган.

16-январь күнү Балыкчы постунан өтүп бараткан унаа токтотулуп, жогорудагы кылмышка шектелип жаткан эки адам колго түшүрүлгөн. Шектүүлөр Балыкчы шаардык ички иштер бөлүмүнүн убактылуу кармоочу жайына киргизилди. Учурда тергөө жүрүп жатат.

 
Categories

СУМАЯНЫН ӨЛҮМҮНӨ ШЕКТҮҮГӨ СОТТУК-ПСИХИКАЛЫК ЭКСПЕРТИЗА ДАЙЫНДАЛЫП, БОШОТУЛДУ

Сумаянын өлүмүнө шектүү жаранга соттук-психикалык экспертиза дайындалганын Жалал-Абад облустук ички иштер башкармалыгынан 24-декабрда кабарлашты.

“Тергөөнүн жүрүшүндө шектүү Жалал-Абад облустук ооруканасынын психоневрология бөлүмүндө жин оорусу менен стационардык тартипте дарыланганы аныкталды”, – деп айтылат милиция тараткан маалыматта.

Жазык-процесстик кодексинин «Экспертиза жүргүзүү үчүн адамдарды медициналык мекемеге жаткыруу» беренесинин негизинде шектүүгө карата 23-декабрда соттук-психикалык экспертиза дайындалып, аны ыкчам өткөрүү жагы Таш-Көмүр шаарына караштуу Кызыл-Жар-12 шаарчасында жайгашкан психикалык оорукананын эксперттерине тапшырылган.

Ички иштер министрлиги ноябрь айында дээрлик он күндөй дайынсыз болуп, кийин сөөгү табылган тогуз жаштагы Сумая Хосилжанованы өлтүрүүгө шек саналып 48 жаштагы жаран кармалып, убактылуу кармоочу жайга киргизилгенин 23-декабрда билдирген.

Милиция тараткан маалыматта сурак учурунда шектүү күнөөсүн моюнуна алып, Сумаяны мектепке бара жатканда азгырып үйүнө ээрчитип кеткенин, үч-төрт күн жер төлөдө колу-бутун скотч менен байлап кармагандыгын, денеси муздап, каза болуп калгандан кийин сөөктү суунун жээгине таштап салганын жарыялаган.

 
Categories

АТАМБАЕВДЕН ЭКИ КЫЛМЫШ ИШИ АЛЫНДЫ

21-декабрда мурдагы президент Алмазбек Атамбаевдин баш коргоо чарасы каралып, эки кылмыш иши жокко чыгарылды. Бул тууралуу Биринчи Май райондук сотунун маалымат кызматынын өкүлү билдирди.

Атамбаевден Калыс-Ордодогу мектеп жана он түрк жаранына паспорт берүү боюнча кылмыш иши алып салынды. Белгилүү болгондой, ал бир жылдан ашык убакыттан бери камакта.

Алмазбек Атамбаев жана президенттик аппараттын мурдагы жетекчиси Фарид Ниязов 2020-жылдын 10-октябрында кармалган. Жаңы Кылмыш-жаза кодексинин 115-беренеси жана 303-беренеси боюнча айыпталуучуну бир жылдан ашык убактылуу кармоочу жайда кармоого болбойт.

Алмазбек Атамбаевге бир нече кылмыш иши козголгон, анын ичинде 2019-жылдын 7-8-августунда Кой-Таш айылында болгон башаламандык, коррупция, түрк жарандарына мыйзамсыз паспорт берүү жана 2020-жылдын октябрында массалык башаламандык уюштурган деген айып тагылган.