Categories

Ат – Башы районунан экстремисттик уюмдун мүчөлөрү ок дарылары менен кармалды

2019-жылдын 19-июнунда мурун козголгон кылмыш-иштин алкагында «Хизбут-Тахрир» уюмунун мүчөсү болгон 6 адамдын Нарын областындагы Ат-Башы районунда жашаган жерлерин тинтүү жүргүзгөн. Бул тууралуу УКМКнын маалымат кызматы билдирди.

Анын жыйынтыгында тыюу салынган экстремисттик «Хизбут-Тахрир» уюмунун адабияттары, уруксат берүүчү документтери жок ок атуучу куралдар, 5,45 мм калибр гильзалары, ок-дары салынган темир идиш, курал пистондору жана чачмалар, ноутбук, телефондор жана сим-карталар табылган. Бул учур боюнча сотко чейинки өндүрүштүн материалдары  Кылмыш-жаза кодексинин 314-беренесинин 2-бөлүмү (Экстремисттик уюмду түзүү) боюнча Кылмыштардын жана жоруктардын бирдиктүү реестрине катталды.

Кармалган адамдар Нарын шаардык ИИБ убактылуу кармоочу жайына киргизилди. Тергөө жүрүп жатат.

 
Categories

Чет өлкөлүктөрдү карактап жүрүшкөн кылмыштуу топ кармалышты

ИИМдин Криминалдык милиция кызматынын 2-башкармалыгынын ыкчам кызматкерлери Бишкек, Свердлов жана Ысык-Ата Райондук милиция кызматкерлери менен биргеликте чет өлкөлүк жарандарды каракташкан кылмыштуу топту кармашты. Кармалгандардын үчөөсү эркек, бирөөсү кыз киши. Бул тууралуу ИИМдин Басма сөз кызматы билдирди.

Алардын 2019-жылдын май айынан баштап азыркы күнгө чейин Бишкек шаарынын жана Чүй облусунун аймагында Пакистандын жана Индиянын жарандарына карата каракчылык жасашып, тоношкон бир нече учурлары аныкталды..

2019-жылдын 1-майында болжол менен 21:50 чамасында азият түспөлүндөгү 20-25 жаштардагы беш белгисиз адам Бишкек шаарынын Чүй проспектисинде жайгашкан үйгө кирип барышкан. Кылмышкерлер ушул үйдө жашаган Пакистандын жараны, 1999-жылы туулган К.С. аттууга карата  күч колдонушуп, анын 1 600 АКШ долларын жана жеке буюмдарын ээлеп алышып, изин жашырып качып кетишкен.

2019-жылдын 20-майында болжол менен 21:30 чамасында Бишкек шаарында азият түспөлүндөгү 20-25 жаштардагы беш белгисиз адам Тыныстанов көчөсүндө жайгашкан батирге кирип келишип, Индиядан келген студенттерге физикалык күч колдонобуз деп коркутушуп, 40 000 сомун алып кетишкен. Ошондой эле кол салгандардын бирөөсүндө бычак болгон. Кылмышкерлер акчадан сырткары, 2 ноутбук жана 6 уюлдук телефондорун тартып алышкан.

2019-жылдын 29-май күнү болжол менен саат 22:45 чамасында белгисиз беш адам Пакистандын жарандары жашаган Абдрахманов көчөсүндөгү батирге кирип келишкен. Кол салгандар физикалык күч колдонушуп, 250 АКШ долларын, 6 уюлдук телефонун жана 2 ноутбукту тартып алышкан. Жогорудагы факты КЖБРге катталып,  Жазык кодексинин 201-беренесинин 3-бөлүмү (Тоноо) боюнча сотко чейинки иликтөөлөрү жүрө баштаган.

2019-жылдын 2-июнунда Индиянын жарандарына каракчылык жасалган. Болжол менен саат 21:00 чамасында азият түспөлүндөгү белгисиз беш адам Үмөталиев көчөсүндө жайгашкан батирге кирип келишип, Индиянын жараны, 2000-жылы туулган К.А. аттуунун денесине жаракаттарды келтиришип, 9 000 сомун, төрт баалуу уюлдук телефонун, принтерин тартып алышып, издерин жашырып качып кетишкен.

Ушундай кол салуулар бир күн өткөндөн кийин 3-июнда Бишкекте катталган. Кылмышкерлер жоопкерчиликке тартылбай тургандыгын сезишип, бул жолу өзгөчө оройлук менен кол салышкан. Болжол менен саат 03:00 чамасында азият түспөлүндөгү 20-25 жаштардагы беш белгисиз адам тапанча жана бычактар менен куралданып, Бишкек шаарынын Бөкөнбаев көчөсүндө жайгашкан үйгө кирип барышкан. Кылмышкерлер Пакистандын беш студентинин денесине кол салышып, 1 500 АКШ долларын, андан сырткары бир нече уюлдук телефондорун ээлеп алышкан.

2019-жылдын 8-июнунда болжол менен саат 23:15 чамасында Чүй облусунун Ысык-Ата районунун Кант шаарында спорттук кийимчен, медициналык бет капчан чымыр денелүү белгисиз төрт адам бычак менен куралданышып, Пакистандын жарандары жашаган батирге кирип барышкан. Чет өлкөлүк жарандардын денесине жаракаттарды келтирип, 2 700 АКШ долларын жана эки уюлдук телефонун тартып алышкан.

ИИМдин Криминалдык милиция кызматынын 2-башкармалыгынын ыкчам кызматкерлери Бишкек ШИИББдин, Свердлов РИИБдин жана Ысык-Ата РИИБдин кызматкерлери менен бирдикте чет өлкөлүк жарандарды карактоонун бетин ачуу боюнча жүргүзүшкөн ыкчам иш-чаралардын жүрүшүндө аталган кылмыш ишине шектүүлөрдүн өздүгү аныкталган. Аныкталган маалымат боюнча кылмыштуу топтун мүчөлөрү мурда соттолгондордон турат жана бир нече ай мурда жаза мөөнөтүн өтөө жайынан бошотулушкан. Ар бир жасаган кылмыш иштерин алар дыкаттык менен бет капчан кылмыштарды жасап жүрүшкөн. Жабырлануучулардын батиринин эшиктерин каккылашып, кылмышкерлер өздөрүн сантехник же коңшусу катары тааныштырышып, андан соң аларды уруп-сабашып, байлашып, акча каражаттары менен уюлдук телефондорун тартып алышкан.

Азыркы учурда алардын жогорудагыдай башка кылмыш иштерин жасагандыгын аныктоо боюнча ыкчам-издөө иш-чаралары жүрүп жатат. Кылмыштуу топту кармоо боюнча иш-аракеттер  ИИМдин  ыкчам кызматкерлери тарабынан 2019-жылдын 9-июнь күнү Ысык-Көл облусунун Бостери айылынын аймагында жүргүзүлгөн. Тонолгон акчаларга алар эс алууну чечишкен, бирок бул кылмыштуу ойлору ишке ашкан жок.

Жогорудагы кылмыш иштерин жасоого шектелип кылмыштуу топтун төмөнкү мүчөлөрү кармалды:

– Ош облусунун тургуну, 1994-жылы туулган Х.Д. аттуу жаран, мурда уурулук боюнча соттолгон;

– Бишкек шаарынын тургуну, 1988-жылы туулган З.Д. аттуу жаран, уурулук боюнча соттолгон;

– Нарын облусунун Жумгал районунун тургуну, 1996-жылы туулган А.у.А. аттуу жаран, мурда уурулук боюнча соттолгон;

– Чүй облусунун тургуну (кыз киши), 1994-жылы туулган Т.К. аттуу жаран, Бишкек шаарында жашап жүргөн, мурда бейбаштык боюнча соттолгон.

Азыркы учурда жогорудагы кылмыш иштерине тиешеси бар башка жарандарды дагы кармоо боюнча иш-чаралар жүрүп жатат.

 
Categories

Эл аралык издөөдө жүргөн Түркиянын жараны кармалды

Кылмыш жасагандыгы үчүн Интерполдун багыты боюнча эл аралык издөөдө жүргөн Түркиянын жараны кармалды. Бул тууралуу ИИМдин Басма сөз кызматы билдирди.

ИИМдин Экстремизм жана мыйзамсыз миграцияга каршы аракеттенүү боюнча кызматына Түркиянын “У” аттуу жараны ички иштер органдарынан жашырынып, Кыргызстанда мыйзамсыз жүргөндүгү жана Европа өлкөлөрүнө жасалма документ менен кетүүгө аракеттенип жаткандыгы жөнүндө маалымат келип түшкөн.

Ыкчам-издөө иш-чараларынын жүрүшүндө Интерполдун багыты боюнча эл аралык издөөдө жүргөн 35 жаштагы Түркиянын жараны кармалган. Алынган маалымат боюнча ага Түркияда жасаган оор кылмыш иши үчүн издөө жарыяланган. Кармалган жаран Бишкек ШИИББдин Убактылуу кармоочу жайына киргизилген. Ал эми, соттун чечими менен №1 тергөө абагына 2 айга камакка алынды.

 

 
Categories

ИИМ кызматкерлери аралашкан кылмыштуу топ кармалды

Чүй областынан 12 калибрдеги кесилген мылтык жана ок-дарылар, ошондой эле жасалма мамлекеттик номерлерди берип жаткан жеринен Москва райондук ИИБнын криминалдык милиция кызматынын ыкчам ыйгарым укуктуу кызматкери, милициянын лейтенанты К.К. жана Бишкек шаарынан Чүй областынын криминалдык милиция кызматынын жетекчисинин орун басары, милициянын подполковниги К.Р. кармалды. Бул тууралуу УКМКнын маалымат кызматы билдирди.

Кармоо учурунда К.К өзүнүн ВАЗ 2107 маркасындагы автоунаасы менен кылмыш болгон жерден качып кетүү аракетин көрүп, жыйынтыгында кармап жаткан топтун автоунааларынын бири менен сүзүшүп алган.

Такталган боюнча, кылмыштуу топтун уюштуруучусу К.Р. болуп, калк керектөөчү товарларды дүңүнөн жана чекен саткан жеке ишкерлер менен коңшу мамлекеттерден ири өлчөмдөгү акча каражаттарын (божомолдор боюнча 5 млн. АКШ доллары өлчөмүндө)аткезчилик жол менен ташыган тараптарга кол салууну белгилеп жатышкан.

Сотко чейинки териштирүүнүн алкагында материалдар кылмыштардын жана жоруктардын бирдиктүү реестрине, КР кылмыш-жаза кодексинин 321 беренесинде каралган кылмыш белгилери боюнча катталды. Кармалгандар КР УКМК убактылуу кармоочу жайына камакка алынды. Тергөө жүрүп жатат.

 
Categories

Баңги заттын өндүрүү үчүн ангидрид ташып бара жаткан адам кармалды

Ыкчам-издөө иш-чараларынын алкагында, Ош областынын аймагынан «Дэу-Нексия» маркасындагы авто унааны башкарып бара жаткан 1994-жылы туулган,Ош облусунун тургуну  «Э.у.Р.» жана коңшу мамлекеттердин биринин жараны, 1983-жылы туулган «Н.А.» кармалышты. Бул тууралуу УКМКнын маалымат кызматы билдирди.

Авто унаанын багажын текшерүү учурунда контрабандалык жол менен коңшу мамлекеттердин бирине алынып бара жаткан,101 литр ангидридуксуз кислотасын куюлган, 10-13 литр өлчөмүндөгү 8 даана желимчелектер табылып алынды. 0,5 литр ангидридтен1 кг героин өндүрүлөт.

Бул окуя боюнча  УКМК Тергөө органдары тарабынан  Кылмыш-жаза кодексинин 267-беренеси (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) боюнча сотко чейинки өндүрүштүк иштер башталып, Кылмыштардын жана жоруктардын бирдиктүү реестрине катталды. Аталган адамдар УКМКнын тергөө камак жайына киргизилди.

Азыркы убакта УКМК бул кылмыштын уюштуруучуларын жана ага тиешеси бар башка адамдарды кармоого жана ошондой эле транзиттик каналдарына жана контрабандага бөгөт коюуга багытталган ыкчам-тергөө иштери жүрүп жатат.

 
Categories

Санкт-Петербургда өз мекендештерин тоноп жүрүшкөн кылмыштуу топ кармалды(видео)

Кыргызстандын ИИМнин Россия Федерациясындагы Өкүлчүлүгү Россиянын укук коргоо кызматкерлери менен биргеликте жүргүзүлгөн ыкчам-издө иш-чараларынын жүрүшүндө Ош облусунун Кара-Суу районунун 1981-жылы туулган А.Ж. аттуу тургуну кармалган. Ал Санкт-Петербург шаары жана Ленинград облусу боюнча “Смотрящий” болгон. Аны менен кошо Ош облусунун Алай районунун 1987-жылы туулган Э.А. аттуу жаран кармалган. Ал жогорудагы “Смотрящий” адамдын жакын кишиси болгон, криминалдык чөйрөнүн адамдарынын бири. Бул тууралуу ИИМдин Басма сөз кызматы билдирди.

Кыргызстандын ИИМнин РФдеги Өкүлчүлүгүнүн маалыматы боюнча кармалган жарандар УКТнын биринин активдүү мүчөсү катары каттоодо турат. 2019-жылдын 30-апрель күнү соттун токтому менен кармалган жарандарга карата Санкт-Петербург шаарындагы тергөө абагына эки айга камакка алуу чарасы тандалды.

Азыркы учурда кылмыштуу топтун мүчөлөрүнүн колунан жабыр тарткандардын өздүгүн тактоо, андан сырткары ушул сыяктуу кылмыш иштерине тиешеси бар кылмыштуу топтун башка мүчөлөрүн аныктоо боюнча тиешелүү иш-чаралар жүрүп жатат.

 
Categories

Издөөдө жүргөн Тажикстандын жараны кармалды

ИИМдин Криминалдык милиция кызматынын 3-башкармалыгынын ыкчам кызматкерлери Интерполдун линиясы боюнча эл аралык издөөдө жүргөн жаранды кармашты. Бул тууралуу ИИМдин Басма сөз кызматы маалымдады.

Жакында, ИИМдин Криминалдык милиция кызматынын кызматкерлери тарабынан Кыргызстандын аймагында оор кылмыш иши үчүн коңшу республиканын укук коргоо органдары тарабынан издөөгө алынган жаран жашырынып жүрөт деген ыкчам маалымат алынган. Жүргүзүлгөн ыкчам иш-чараларынын жүрүшүндө каракчылык жасагандыгы үчүн издөөдө жүргөн Тажикстан Республикасынын жараны, Согдий облусунун тургуну 1992-жылы туулган Г.У. аттуу кармалган. Издөө иши 2019-жылдын февраль айында козголгон. Кармалган жаран камакка алынды.

 
Categories

Москвада оор кылмыш ишине шектелип Кыргызстандык кармалды

2019-жылдын март айынын аягында ИИМдин Россиядагы Өкүлчүлүгүнө Кыргызстандын жарандары кайрылып, дайынсыз жоголгон Баткен облусунун Баткен районунун жашоочусу, 1981-жылы туулган Р.Ж. аттуу тууганын издөөгө жардам көрсөтүүнү суранышкан. Бул тууралуу ИИМдин Басма сөз кызматы билдирди.

Ал 2019-жылдын 23-март күнү Москва шаарынын Верхние көчөсүндө жайгашкан үйүнөн чыгып кеткен бойдон кайтып келбегени жана чалууларга дагы жооп бербегенин айтышкан. Ошондой эле  дайынсыз жоголгон адам ошол күнү достору менен чыгып кеткен жана сары түстөгү “Форд Галакси” үлгүсүндөгү автоунаасы дагы токтоп турган жеринен жок болуп кеткен.

ИИМдин Россиядагы Өкүлчүлүгү Россиянын ИИМдин аймактык бөлүмдөрү менен биргеликте дайынсыз жоголгон жарандын кайда жүргөндүгүн аныктоо боюнча ыкчам-издөө иш-чараларын жүргүзүшкөн. Иш-чаранын жүрүшүндө Москва шаарынын Домодедово шаардык округунун жанындагы жолго жакын жердеги талаадан азият түспөлүндөгү 40 жаштардагы белгисиз адамдын бетинде, моюнунда, артында жаракаттары бар жансыз денеси табылган. Аталган окуя боюнча соттук-медициналык жана башка экспертизалар дайындалган. Россиянын Тергөө комитетинин Москва облусу боюнча Башкы тергөө башкармалыгынынын аймактык тергөө бөлүмү тарабынан Россия Федерациясынын Кылмыш-жаза кодексинин 105-беренеси (өлтүрүү) менен кылмыш иши козголгон. Дайынсыз жоголду деп эсептелинген Р.Ж. аттуунун өлүгүн туугандары таанышкан.

Ыкчам-издөө иш-чараларынын натыйжасында, оор кылмыш ишине тиешеси бар жаран аныкталып, кармалган. Шектүү Москва облусу менен Москва шаарынын аймагында жүргүнчүлөрдү ташуу менен алектенип жүргөн Кыргызстандын жараны, Жалал-Абад облусуна караштуу Ноокен районунун 1993-жылы туулган Т.А. аттуу жашоочусу болуп чыккан. Тергөөнүн жүрүшүндө сары түстөгү “Форд Галакси” үлгүсүндөгү маркумга таандык автоунаа такталып, кылмыш ишине бекитилип, соттук-медициналык экспертиза дайындалды.

Азыркы учурда Россиянын Тергөө комитетинин Москва шаары боюнча Башкы тергөө башкармалыгынын тергөө бөлүмү тарабынан Т.А. аттууга карата кылмыш ишине шектүү катары айып тагылып, тергөө абагына киргизилди.

 
Categories

Крим дүйнөнүн атамандарынын бири “Дөө Чыңгыз” кармалды.

Эки күндөн бери коомчулукту уу-дууга салып жаткан крим дүйнөнүн атамандарынын бири “Дөө Чыңгыз” кармалды. Анын чыныгы аты Чыңгыз Жумагулов. Ал 38 жашта. Бул тууралуу ИИМдин маалымат кызматы билдирди.

Ч. Жумагулов борбор калаанын так ортосунда жайгашкан Исанов көчөсүнөн кармалган. ИИМдин криминалдык милиция кызматы жана Бишкек шаардык ички иштер башкармалыгынын кызматкерлеринин ыкчам издөө аракеттеринин натыйжасында колго түшүрүлгөн.

Эске сала кетсек, ал эки кишинин өлүмүнө шектелүүдө.

 
Categories

Баңги заттарды ташып бара жаткан жарандар кармалышты

Ыкчам-издөө иш-чараларынын алкагында  Ош эл аралык аэропортунан коңшу мамлекеттердин биринин жарандары 1993-жылы туулган Ш.А, 1986-жылы туулган С.Г, жана 1987-жылы туулган С.С. кармалышты. Бул Тууралуу УКМКнын маалымат кызматы билдирди.

Аталган кылмыштуу топ Кыргызстан аркылуу баңги заттарды Орусия өлкөсүнө жеткирүү максатын көздөшкөн.  Багажды текшерүү учурунда жашыруун сактоочу жай, жалпы салмагы 3 килограммдан ашык 57 брикет табылып алынган.

Алдын ала маалыматтар боюнча спецификалык жыты бар, табылып алынган заттар «героин» баңги заты болуп эсептелинет. Бул учур боюнча  УКМК Тергөө органдары тарабынан  Кылмыш-жаза кодексинин 267-беренесинин 3-бөлүмү (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) боюнча кылмыш иши козголуп, Кылмыштардын жана жоруктардын бирдиктүү реестрине катталды.

Аталган адамдар Ош шаарынын ИИБ убактылуу кармоочу жайына киргизилди. Азыркы убакта  УКМК бул кылмыштын уюштуруучуларын жана ага тиешеси бар башка адамдарды кармоого жана ошондой эле транзиттик каналдарына жана контрабандага бөгөт коюуга багытталган ыкчам-тергөө иштери жүрүп жатат.