Categories

МАНАС РЭТ КЫЗМАТ АДАМДАРЫ КАРМАЛДЫ

Талас облустук прокуратурасы тарабынан “Түндүк электр” ишканасынын Манас райондук электр тармактарынын айрым кызмат адамдары коррупциялык аракеттерге баргандыгы аныкталды. Анын кесепетинен мамлекетке 3 миллион сомдой зыян келтирилген дешет Башкы прокуратурадан.

Белгилүү болгондой, Манас райондук электр тармактар ишканасынын кызмат адамдары жергиликтүү өз алдынча башкаруу органдарынын жооптуу кызмат адамдары менен туруктуу байланыш түзүп, турмуш-тиричилик жана өндүрүштүк абоненттердин колдонгон электр энергиясы үчүн накталай төлөмдөрдү “XENON” жана “IBS” базаларына киргизбей, каражаттарды өздөрүнө ыйгарып жүрүшкөн.

Ал эми төлөмдөрдү бюджеттин акчаларынын эсебинен бурмалап, жаап келишкендиги тастыкталган. Алдын ала эсеп боюнча, мамлекетке 2 миллион 800 миң сомдон ашык зыян келтирилген. Бул факты боюнча Кылмыш-жаза кодексинин 336-беренеси (коррупция) менен кылмыш иши козголгон.

 
Categories

СОКУЛУК РИИБ ТЕРГӨӨЧҮСҮ ПАРА АЛЫП ЖАТКАН ЖЕРИНЕН КАРМАЛДЫ

Сокулук райондук ички иштер башкармалыгынын тергөө кызматынын жетекчисинин орун басары кармалды. Бул тууралуу Улуттук коопсуздук боюнча мамлекеттик комитети кабарлады. Билдирүүгө ылайык, аталган жаран опузалап пара талап кылууга шектелип кармалган.

Буга чейин жаран УКМКга кайрылып, сотко чейинки өндүрүштү токтотуу үчүн 50 миң сом талап кылган Сокулук районунун ички иштер башкармалыгынын тергөө кызматынын жетекчилеринин бирине чара көрүүнү суранган.

“2020-жылы жол кыймылынын жана транспорт каражаттарын пайдалануу эрежелерин бузуу менен жаранга Сокулук районунун ички иштер башкармалыгы тарабынан сотко чейинки өндүрүш иши катталган. Жабырлануучу тарапка эч кандай дооматы жок деген каршы билдирүүсүнө карабастан, тергөө кызматынын кызматкери сотко чейинки өндүрүштү токтотуу үчүн пара талап кылган”, – деп жазылат билдирүүдө.

19-апрель күнү Сокулукта 20 миң сом пара алып жаткан жеринен милициянын лейтенанты кармалган. Ал УКМКнын убактылуу кармоочу жайына киргизилип, учурда ыкчам-тергөө иш-чаралары жүргүзүлүүдө.

 
Categories

«ЖАЛАЛ-АБАД ЭЛЕКТРДИН» ЭКС-ДИРЕКТОРУ КАРМАЛДЫ

“Жалал-Абад электр” ишканасынын мурдагы жетекчиси коррупцияга шектелип кармалды. Бул тууралуу Башкы прокуратуранын маалымат кызматы кабарлады. Аталган ишкананын жооптуу кызматкерлерине карата электр энергиясына болгон карыздарды мыйзамсыз баланстан чыгаруу фактысы боюнча Кылмыш-жаза кодексинин 336-беренеси – “Коррупция” менен кылмыш иши козголгон.

Текшерүүдө 2015-жылдын 1-январынан тартып 2020-жылдын 31-декабрына чейинки мезгил аралыгында “Жалал-Абад электрдин” кызмат адамдары мыйзамсыз аракеттерге барып, электр энергиясына болгон жалпы 113 миллион 838 миң 100 сомдук карызды негизсиз эсептен чыгарышкандыгы аныкталган. К

ылмышка шектүү катары аталган компаниянын мурдагы жетекчиси кармалып, Жалал-Абад ШИИБдин убактылуу кармоочу жайына киргизилгени маалым болду. Учурда тергөө амалдары жүргүзүлүүдө.

 
Categories

ЧЕК АРА КЫЗМАТКЕРЛЕРИ ЖЕМКОРЛУККА ШЕКТЕЛИП КАРМАЛДЫ

Улуттук коопсуздук боюнча мамлекеттик комитети Чек ара кызматынын кызматкерлери жемкорлукка шектелип кармалганын 28-мартта билдирди. Мекеменин маалыматына караганда, Баткен облусунун Кадамжай районуна караштуу Пүлгөн айылында жайгашкан автомашиналар өтүүчү “Кадамжай” көзөмөл-өткөрмө бекетиндеги чек ара кызматкерлери товар ташыган айдоочуларды опузалап, пара алып жүргөнү аныкталды. Жазык кодексинин “кызмат абалынан кыянаттык менен пайдалануу” беренесинин негизинде кылмыш иши козголуп, Башкы прокуратура Аскер прокуратурасынын жана УКМКнын тергөөчүлөрүнөн турган мекеме аралык тергөө тобун түздү. Жалпысынан алты адам кармалып, атайын кызматтын тергөө абагына камакка алынды.

 
Categories

«БИШКЕК ЖАШЫЛ ЧАРБАДАГЫ» ЖЕМКОРЛУК

Бишкек шаарынын мэриясынын түзүмдүк бөлүмдөрүндө акча каражатын уурдоо боюнча коррупциялык схема аныкталды. Бул тууралуу Улуттук коопсуздук мамлекеттик комитеттен кабарлашты.

«Коммерциялык же башка уюмдардын кызматчыларынын ыйгарым укуктарын кыянаттык менен пайдалануу» беренеси боюнча катталган сотко чейинки өндүрүштүн алкагында Бишкек мэриясынын түзүмдүк бөлүмдөрүндө акча каражатын уурдоо боюнча коррупциялык схема аныкталды.

«Бишкек жашыл чарба» муниципалдык ишканасынын башкы эсепчиси жана эсепчи белгиленген нормадан ашыкча эмгек акыны мыйзамсыз чегерүү максатында бухгалтердик документтерди системалуу түрдө жасалмалап, анын негизинде мамлекеттик бюджетке 800 миң сом өлчөмүндө зыян келтирилгени тастыкталды.

Бул факты боюнча УКМК кылмыш ишин козгоп, тергөөнүн жүрүшүндө жогорудагы мыйзамсыз аракеттер документтештирилип, кылмышка тиешеси бар жаран күнөөсүн толугу менен мойнуна алган.

Ошондой эле жүргүзүлгөн тергөө иш-чараларынын алкагында келтирилген зыян күнөөлүү адамдар тарабынан толугу менен толтурулган.

 
Categories

ПРОКУРОРДУН ОРУН БАСАРЫ КАРМАЛДЫ

Опузалап пара алуу фактысы менен Бишкек шаарынын Октябрь райондук прокурорунун орун басары кармалды. Бул тууралуу 17-ноябрда Улуттук коопсуздук мамлекеттик комитети кабарлады.

Шектүү укук коргоо кызматкерлеринен 5000 АКШ доллары өлчөмүндө акча талап кылганы, “болбосо кылмыш жоопкерчилигине тартам” деп коркутканы айтылууда. Колго түшкөн учурда 200 миң сомдон ашуун акчаны алганы тууралуу далилдер табылган.

Атайын кызмат кармалган адамдын аты-жөнүнүн баш тамгаларын атады. Ал инициалдар район прокурорунун орун басары Алтынбек Айдаровдун ысымына дал келүүдө.

Шектүү УКМКнын убактылуу кармоочу жайына киргизилди.

 
Categories

ПАРА АЛУУГА ШЕКТЕЛИП МИЛИЦИЯ КЫЗМАТКЕРИ КАРМАЛДЫ

Пара талап кылуу фактысы боюнча Биринчи май райондук ички иштер бөлүмүнүн Экстремизмге жана мыйзамсыз миграцияга каршы күрөшүү кызматынын кызматкери кармалды. Улуттук коопсуздук боюнча мамлекеттик комитеттин басма сөз кызматы шектүү 9-сентябрда Ички иштер министрлигинин Ички иликтөө кызматы менен биргеликте жүргүзгөн операциянын негизинде колго түшүрүлгөнүн билдирди.

Маалыматка ылайык, шектүү Аламүдүн районунун тургунун алдамчылык кылды деп жоопко тартарын айтып коркутуп, баалуу сувенир жана 500 доллар талап кылган. Бул факт боюнча Жазык кодексинин “Пара талап кылуу” беренеси менен сотко чейинки өндүрүш иши башталып, кармалган милиция кызматкери атайын кызматтын убактылуу кармоочу жайына киргизилди.

 
Categories

АЗЫРКЫ ЖАНА МУРДАГЫ ТӨРТ ДЕПУТАТ КАМАЛДЫ

Жогорку Кеңештин депутаттары Асылбек Жээнбеков жана Төрөбай Зулпукаров 31-июлга чейин УКМКнын тергөө абагына камалды. Мындай чечимди 31-майда Бишкектин Биринчи май райондук соту чыгарды. УКМКнын маалыматына ылайык, депутаттарга Кумтөр кениндеги коррупциялык иштерге байланыштуу Жазык кодексинин 319-беренесинин (Коррупция) негизинде айып тагылды.

Эки эл өкүлүнүн баш коргоо чарасы каралып жаткан учурда сот имаратынын алдында алардын ондогон тарапкери чогулуп, бошотууну талап кылып турду.

Жээнбеков менен Зулпукаров 31-майда атайын кызматка сурак беришкен.

Мурдагы президент Сооронбай Жээнбековдун бир тууган иниси Асылбек Жээнбеков 2011-2016-жылдары Жогорку Кеңештин төрагасы болгон. Ал эми Төрөбай Зулпукаров КСДП фракциясынын лидеринин орун басары болчу.

31-майда “Кумтөр” долбоорун ишке ашырууда жемкорлук фактысы боюнча Жогорку Кеңештин экс-депутаттары Исхак Пирматов менен Талантбек Узакбаев дагы камалды. Пирматов менен Узакбаев Жазык кодексинин 319-беренесинин 2-бөлүгүнүн (Коррупция) негизинде кылмышка шектелип, УКМКда сурак бергенден кийин кармалды.

 
Categories

УКМК: ӨМҮРБЕК БАБАНОВ КАРМАЛДЫ

“Кумтөр” долбоорун ишке ашырууда коррупциялык ишке барган деген шек менен экс-премьер-министр Өмүрбек Бабанов кармалды. Бул тууралуу УКМКдан билдиришти.

“Тергөө учурунда алынган далилдердин негизинде, 2021-жылдын 31-майында Кылмыш-жаза кодексинин 319-беренесинин 2-бөлүмү боюнча кылмышка шектүү делип мурдагы премьер-министр Өмүрбек Бабанов кармалды”, — деп айтылат маалыматта.

УКМК бул кылмыш ишин иликтөөнүн жүрүшү жана натыйжалары жөнүндө коомчулукка маалымдап турат.

Башкы прокуратура жана Ички иштер министрлиги Кумтөр кенин иштетүү боюнча долбоорду жүзөгө ашыруудагы коррупциялык фактылар тууралуу козголгон кылмыш иши боюнча тергөөнү улантууда.

 
Categories

СУРАКМАТОВ ЭМНЕ ҮЧҮН КАРМАЛГАНЫ АЙТЫЛДЫ

Бишкек шаарынын мурдагы мэри Азиз Суракматов коррупция жана мыйзамсыз баюу фактысы боюнча кармалды. Бул тууралуу УКМКнын маалымат кызматы кабарлады. Эске салсак, экс-мэр 26-майда суракка чакырылып, андан кийин камалганы айтылган.

УКМК Бишкек шаарынын мэриясында жана анын түзүмдүк бөлүмдөрүндө кылмыштарды аныктоо жана бөгөт коюу боюнча иш-чара жүргүзгөн. Натыйжада айрым курулуш компанияларынын өкүлдөрүнө элиталык көп кабаттуу турак үйлөрдү куруу үчүн муниципалдык жер тилкелери берилгендиги боюнча коррупциялык жана мыйзамсыз баюу фактылары аныкталганы айтылды.

“Азиз Суракматов мэр болуп турганда кызматтык абалынан пайдаланып муниципалдык кызматтын кызыкчылыгына каршы иш алып барып, мэриянын айрым кызмат адамдары жана ири курулуш компанияларынын өкүлдөрү менен коммерциялык имараттарды жана көп кабаттуу турак жайларды курууга муниципалдык жер тилкелерин алуу үчүн туруктуу коррупциялык схема түзүшкөн”, – деп жазылат маалыматта.

Мындан сырткары, мурдагы мэр кызмат абалынан пайдаланып муниципалдык ишканалардын жана курулушту көзөмөлдөөчү органдардын жооптуу кызматкерлерине кысым көрсөтүү менен көп кабаттуу объектилерди курууга уруксат берген.

“Коррупциялык схеманын натыйжасында Суракматовдун активдери жана анын жакын туугандарынын кирешелери кескин көбөйүп, болжол менен 50 миллион АКШ долларына бааланган”, – деп айтылат УКМКнын маалыматында. Буга байланыштуу экс-мэр УКМКнын тергөө камак жайынын убактылуу кармоочу жайына киргизилген.