Categories

Президент Сооронбай Жээнбеков: “Кызыл-Омполдогу окуя жөн жерден саясатташып кетти

“Кызыл-Омполдогу окуя жөн жерден саясатташып кетти. Анын артында кимдер турганын билебиз. Ысык-Көлдө туристтик сезон башталып, даярдык көрүп жаткан кезде дүрбөлөң салуу – туризм тармагына балта чапкандай эле болду. Өкмөт дагы убагында аракеттерди жасабай, ушундай кырдаалга келдик. Муну жөн жерден эле козгоп алдык, бул козголбой турган нерсе болчу”, – деп белгиледи Президент Сооронбай Жээнбеков бүгүн, 17-майда, Ысык-Көл облусунун Балыкчы шаарынын жашоочулары менен болгон жолугушуусунда.

Мамлекет башчысы Кызыл-Омполдо уран казуу маселеси коомдо кызуу талкууланып, эл кабатыр болгонун эске салып, уран казылбай турганын дагы бир жолу баса белгиледи. Президент Кызыл-Омполдогу окуя кен казуу тармагындагы башаламандыктын далили деди.

Сооронбай Жээнбеков: “Президенттик кызматка киришкенден бери тоо-кен тармагына катуу талап кое баштадым. Лицензия берүүдө кадимки базардагыдай эле алып сатарлыкка жол берилип келген. Азыр бул боюнча иштер жүргүзүлүүдө. 2018-жылы лицензия берүү тармагын кылдат текшерип, инвентаризация кылуу сунушталган, мораторий жарыялаганбыз. Биздин келечек таза экологияга байланышкан. Биз таза экологиялык азыктарыбыз менен дуйнөлүк атаандаштыкка туруштук бере алабыз. Аны өндүрүү жана сыртка сатыкка чыгаруу боюнча аракеттерди көрүп жатабыз.  Кыргызстандын экологиясын сөзсүз таза сактап калабыз”, – деди.

Мамлекет башчысы учурда кум, шагыл, топурак казуу боюнча региондорго эң керектүү кендерге лицензия берилип жатканын, бирок чоң кендерге лицензия берүү токтотулганын айтты.

 
Categories

Монолиттик биметаллдык радиоторлорду чыгаруучу завод ишке кирди

Премьер-министр Мухаммедкалый Абылгазиев монолиттик биметаллдык радиоторлорду чыгаруучу заводдун ачылыш аземине катышып, өндүрүштүк базасы жана чыгарылган продукциялардын үлгүлөрү менен таанышты. Бул тууралуу өкмөттүн маалымат кызматы билдирди.

Мухаммедкалый Абылгазиев: «Биз инвесторлорду колдоп, мындай өндүрүштөр көп болушу үчүн алардын маселелерин чечүүдө көмөктөшүүгө тийишпиз. Быйыл өлкөдө бир катар жаңы өндүрүштөрдүн ачылышы пландалууда. Либералдык салык тутумун эске алганда, өндүрүштү өстүрүү жана экономиканы бекемдөө үчүн бизде бардык шарттар бар», – деп ырастады.

«Бишкек» Эркин экономикалык аймагында жайгашкан монолиттик биметаллдык радиоторлорду чыгаруучу заводдун Борбор Азия боюнча аналогу жок. Заводдо куюучу цех, механикалык цех, боёо цехи, таңгактоо цехи жана даяр продукциянын кампасы бар. Толук кандуу ишке берилгенде завод 500дөн ашуун жумуш ордун түзөт. Заводдун продукциясы ЕАЭБ жана КМШ өлкөлөрүнө экспорттоого багытталган.

Учурда «Бишкек» ЭЭА аймагында 303 субъект экономикалык ишмердүүлүгүн жүргүзөт, алардын ичинен 69 субъект – өндүрүшчүлөр. «Бишкек» ЭЭА субъекттери 123 аталыштагы товарларды өндүрүшөт, анын ичинде 63 түрү чет жактарга экспорттолот.

 
Categories

Өткөн жылы Кытайдан келген инвестициялар төмөндөгөн

Алдын ала маалыматтар боюнча 2018-жылдагы Кытайдан келген чет өлкөлүк түз инвестициялардын келип түшүү агымы 2017-жылга салыштырмалуу 19 пайызга азайып,  245 млн. АКШ долларынан ашты. Бул тууралуу Улуттук статистикалык комитеттин маалымат кызматы билдирди.

Анын ичинде 96 пайызы – тазаланган мунайзат продуктуларын иштетүү өндүрүшү ишканаларына, кендерди казууга жана геологиялык чалгындоого жумшалган. Негизинен Чүй жана Жалал-Абад облустарынын ишканаларына багытталган.

 
Categories

Роза Отунбаева: ” Биринчи вице-премьер – министрдин өлкөнү санариптештирүү боюнча отура турган офиси жок”

Экс-президент Роза Отунбаева 5-каналга маек берип, өлкөнү санариптештирүү боюнча кетирилип жаткан кемчиликтерди сынга алды.

Роза Отунбаева: “Биринчи вице-премьер – министр өлкөнү санариптештирүү боюнча ишти алып барат. Анын атайын отура турган офиси жок. Дүйнөлүк практикада  санариптештирүү боюнча комитеттер иштейт.

Карапайым элдин өлкөнү санариптештирүү боюнча маалыматтары жок. Бала бакчаларда электрондук каттоо жаңыдан башталды. Биз ачык өлкөбүз деген менен чындыгында жабык өлкөбүз. Бул жагынан Казакстан, Өзбекстандан калып калдык. IT программисттер өнүккөн өлкөлөрдө да жетишсиз. Бизде 45 жашка чейинкилердин 22 пайызы сыртка чыгып кетишти. Мындай кесиптик кадрларды даярдоо боюнча дүйнөдө арткы  орунда экенбиз. Белоруссиянын Ички Дүң Продукциясынын 5 пайызы IT өндүрүшүнүн эсебинен түшөт.Молдовада ушундай эле көрсөткүч. Биз да адам ресурсун ушул жакка жумшашыбыз керек.

Украина  жылына 3 млрд. АКШ доллар пайда көрөт IT өндүрүшүн экспортоодон.

Казакстанда, Россияда, Кытайда калктын 90 пайызы мобилдик капчык колдонушат. Бизде калктын беш пайзы гана колдонушат. Улуттук банк бул тармакта иш жасаган жок, уктап жатат”, – деди.

Андан ары Экс-президент Армениянын премьер-министри технологиялык өлкө болобуз деп, демилге көтөрүп жатканына токтолуп, ушундай лозунгдар керек экенин айтты.

Отунбаев: “Биз баардык күчтү коомду өнүктүрүүгө жумшашыбыз керек. Өлкөнү санариптештирүү бир жыл эмес көп жылдык программа болушу зарыл”,-деди.

 
Categories

«Газпром» Кыргызстанга 26,5 млрд рубль инвестиция жасаган

Премьер-министр  Мухаммедкалый Абылгазиев «Газпром» ААК башкармалыгынын төрагасы Алексей Миллер менен жолугушту.

Премьер-министр баса көрсөткөндөй, компания өлкө үчүн ири инвестор катары гана эмес, анын көптөгөн социалдык маселелерин дагы чечүүдө. Мухаммедкалый Абылгазиев кошумчалагандай, кыргыз тарап биргелешкен кызматташуунун алкагында жаңы долбоорлорду талкуулоого жана ишке ашырууга даяр.

«Газпром» ААК башкармалыгынын төрагасы Алексей Миллер баса белгилегендей, компания өлкөнүн ички рыногуна кирүүдө беш жылдын ичинде 20 млрд рубль инвестиция салууга милдеттенген. Анын айтымында, бүгүнкү күнү «Газпром» ААК инвестицияларынын жалпы суммасы 26,5 млрд рублди түзөт.

Ошондой эле Алексей Миллер «Газпром балдарга» социалдык долбоорунун ийгиликтүү ишке ашуусун белгиледи, анын алкагында Кыргызстандын аймактарында тогуз заманбап дене тарбия-ден соолукту чыңдоочу комплекстер курулган.

Тараптар өлкөнүн газ бөлүштүрүү чөйрөсүнө инвестиция салуу боюнча компаниянын мындан аркы пландарын кеңири талкуулашты жана келечектүү жемиштүү кызматташууга өз ара даярдыктарын билдиришти.

 
Categories

Быйыл 23 жол оңдолот, жалпы узундугу 38 чакырым

Бишкекте Кытай өлкөсү тарабынан бөлүнгөн гранттын алкагында “Бишкек шаарынын жолдорун калыбына келтирүү” долбоору боюнча шаардын алты көчөсү оңдолот. Бул тууралуу мериядан билдиришти.

Алар: Абай, Нуркамал, Алтымышев, Репин, Токтогул и Жайыл Баатыр көчөлөрү.

Оңдоо иштери бул айда башталат. Учурда жолдордун жабылуу эрежелери каралууда. Жолдор кезек менен жабылат. Кээ бир жерлерде жылуулук берүүчү трубалар да оңдолот. “Бишкек шаарынын жолдорун калыбына келтирүү” долбоорунун алкагында 23 жол оңдолот, жалпы узундугу 38 км.

2018-жылы, жалпы 17 жолдун оңдоо иштери жүргүзүлгөн, алардын ичинде Манас, Айтматов, Чүй жана Жибек Жолу проспектилери, Эркиндик бульвары, 7 апрель, Айни, Термечиков, Садырбаев (Баха), Үсенбаев, Үметалиев жана башка көчөлөр.

 
Categories

Президент Сооронбай Жээнбеков банк төрагаларын кабыл алды

Президент Сооронбай Жээнбеков Россия-Кыргыз өнүктүрүү Фондунун  төрагасы Эркин Асрандиевди, «Кепилдик фонд» ААК төрагасы Малик Абакировду, «Айыл Банк» ААК төрагасы Мурат Акимовду жана «РСК Банк» ААК төрагасы Азизбек Оморкуловду кабыл алды. Бул тууралуу президенттин маалымат кызматы билдирди.

Мамлекет башчысы жолугушууда аймактардагы бизнести, экспортко багытталган ишканаларды колдоону улантыш керектигин баса белгиледи.

Сооронбай Жээнбеков:  «Ишкерлердин жаңы долбоорлоруна колдоо көрсөтүү, каржылоо, ошол эле маалда аларга туура бизнес алып барууну үйрөтүш керек. Бул жерде финансы-кредиттик мекемелер алдыңкы ролду ойнойт», — деди.

Ошондой эле учурда логистикалык борборлор бардык облустарда ачылбаганын белгилеп, логистикалык борборлорду куруу долбоорлоруна көӊүл бурууну сунуштады. Жакында өндүрүштү жандандыруу боюнча программа иштелип чыгарын, буга байланыштуу өндүрүш ишканаларын каржылоо боюнча сунуштар берилиши зарылдыгына токтолду.

Президент Сооронбай Жээнбеков кредиттерди берүүдө соодага эмес, Улуттук стратегияда белгиленген өнөр жай, кайра иштетүү, энергетика, туризм, айыл-чарба сыяктуу приоритеттүү тармактарга, кепилдик берүүдө аймактарга көбүрөөк көӊүл буруу зарылдыгын белгиледи.

Мындан тышкары, «Региондорду өнүктүрүү жана өлкөнү санариптештирүү» жылынын алкагында кредит алуу маселеси жер-жерлерге санарип технологиялар аркылуу жеткиликтүү, арзан жана кыска убакытта бюрократиясы жок берилүүсү камсыздалышы керектигин баса белгиледи.

 
Categories

Президент Сооронбай Жээнбеков: Башка мамлекеттердин облус-шаарлары менен бир туугандык мамилени жандантуу керек

«Башка мамлекеттердин бир тууган облус-шаарлары менен мамилени жандантып, алар менен кызматташуудагы толук потенциалды колдонуу керек», — деп белгиледи  Президент  Сооронбай Жээнбеков  Т.Сатылганов атындагы Кыргыз улуттук филармониясында өтүп жаткан «Кыргыз Республикасы: региондук өнүктүрүү боюнча улуттук диалог» конференциясында.

Мамлекет башчысы белгилегендей, мамлекеттик органдардын жана жергиликтүү бийликтин өнүктүрүү боюнча өнөктөштөр менен аракеттенүүсү начарлап кетти.

Сооронбай Жээнбеков:  «Дээрлик баардык облустарыбыз, ири шаарларыбыз башка мамлекеттердин облус, шаарлары менен бир туугандык мамилелерди түзүшкөн, орусча айтканда „побратимы“ болгон. Эки облустун ортосундагы келишимдерге кол коюлган. Шаарларды, облустарды өнүктүрүү үчүн өнөктөштөрдү, инвесторлорду издөө керек. Биргелешкен бизнес-долбоорлорду ишке ашыруу керек. Мына ушул мүмкүнчүлүк да пайдаланылбай келүүдө. Өнүккөн мамлекеттер, облустар бар силер дос болгон, ошол жактан инвестор тартып, биздин бизнес менен алардын бизнестерин тааныштырып, алдыңкы технологияларды тартыш, алар менен иштеш дагы көз жаздымда калып кетти», — деди.

Ал айрыкча Россия, Кытай мамлекетинин, коңшу Казакстан, Өзбекстандын жакшы технологияларын колдонуу керектигин белгиледи.

«Бул маселени колго албай, чыныгы аракет жасабастан, муну дагы таштап койдуңар, ал эми бул абдан чоң потенциал. Бул биздин мамлекеттик бийликтин биринчи негизги милдети, айрыкча жергиликтүү бийликтин, ыйгарым укуктуу өкүлдөрдүн, акимдердин милдети. Ошол аймактарда иштеп жаткан бизнесмендерди өнүгүп жаткан башка мамлекеттердин бизнесмендери менен тааныштырып, жолугушуусуна шарт түзүп, чогуу ээрчитип барып тааныштырыш керек. Жок дегенде жылына сыртка чыгып бирден долбоор алып келсеңер дагы 40 районго жылына 40 долбоор менен сырттан инвесторлор келет. Мына ушуну дагы колго алгыла», — деп баса белгиледи Президент Сооронбай Жээнбеков.

 
Categories

Путиндин сапарынын минус – плюстары

Орусия президенти Путиндин март айынын аягында Кыргызстанга болчу мамлекеттик сапарын кыргыз бийлиги чыдамсыздык менен күтүүдө. Себеби, Путиндин  Кыргызстанга өткөн жылдын күз айларында эле келиши күтүлгөндөй болгон. Мындай маалымат ошол күндөрү  Кыргызстандын Тышкы иштер министрлиги тарабынан айтылган менен күнү так белгилене электиги маалымдалган болчу. Путин өткөн жылдын октябрь айында Өзбекстанга жана Казакстанга келип,  үч президент Казакстандын Сарыагач шаарында жолугушкан.

Кыргызстанга келет- келбейт болуп, кыйгап өтүп кеткен. Андан соң жыл жаңырып келээри айтылган. Бирок, мындан кандайдыр бир кыйкым издеп кереги жок. Анткени, эки лидердин жолугушуусу үчүн алдын ала даярдыктар керек экенин эске алганда мыйзам ченемдүүлүк катары кабыл алышыбыз кажет.

Маселе, Кыргызстан үчүн канчалык пайдалуу болот дегенде? Анткени, буга чейинки эки өлкөнүн ортосундагы эки тараптуу келишимдерде  жана Евразия экономикалык биримдигине кирген өлкөлөр ичинде Кыргызстандын кызыкчылыгы эске алынбай калган деген кептер арбын айтылып келе жаткандыгы талашсыз.

Миграциянын деңгээлинде калган кызматташтык

Орусия – Кыргызстан кызматташтыгын эстегенде эле кыргыз чиновниктеринин эсине эмгек мигранттарыбыз эске келет. Атайын расмий түрдө жарым миллион деп айтылса, бир миллионго жакын атуулдарыбыз ал жакта оокат кылып жүрүшөт. Алардын эсебинен Кыргызстанга 2 млрд АКШ доллар жыл сайын келүүдө. Айрым саясатчылардын маалыматына караганда, ИДПнын өсүшүндө да которулган акчанын үлүшү бар экендиги айтылып келет. Бирок, тилекке каршы мындай маалыматка тийешелүү мамлекеттик мекемелер так жооп бербей келишет.

Эми биздин айтайын дегенибиз, эки өлкөнүн ортосундагы кызматташтык да миграция маселесинен тыңгылыктуу жогору көтөрүлө албай келе жатканында. Кара тизме деген балээге баары барып байланып калгандай таасир калтырат.

Эмгек мигранттарга жеңилдик берилип жатат деген менен ал деле анча байкала бербейт. Учурда Казакстандык эмгек мигранттары менен биздин эмгек мигранттарыбызга ал жакта бирдей эле шарт  экендиги айтылып келет.

Путиндин келиши менен жергебизде аскердик багыттагы ишкананын ачылышына шарт түзүлөрүн эске албаганда, Жогорку Нарын ГЭСтер каскадынын курулушун кайра баштоо, Кытай-Кыргызстан-Өзбекстан темир жолунун курулушу бизге караганда Орусия үчүн кызыкчылыктуу экендиги талашсыз. Айрыкча жогорудагы темир жолдун курулушунун бир топ жылдардан бери кармалып келе жаткандыгынын негизги себеби да Орусиянын кызыкчылыгын эске алуу болуп келгендиги талашсыз. Президенттибиз Сооронбай Жээнбеков да Кытай- Кыргызстан – Өзбекстан темир жолун курууда Орусиянын көз карашы менен эсептешүү керек экенин айтканы бар. Кичинекей өлкөбүз үчүн мындай кадамга баруу зарылчылыгын четке кагууга болбойт.

Ал эми азырынча кыргыз бийлиги  Путиндин Кыргызстанга болчу сапарынын негизги жемиши катары орусиялык 500 гө чамалуу ири жеке ишкерлердин катышусунда форум өтөрүн жар салышууда. Маселе,  форумдан кийин канчалык ири долбоорлого кол коюуга жетише алабыз?

Инвесторлордун кызыгуусу артабы? Же болбосо Орусия лидери менен келип, кайра кете береби? Бул да азырынча суроо болуп туру.

Өткөн жылдын аягында Путиндин Өзбекстанга болгон сапары коңшуларыбыз үчүн бир топ жемиштүу болуп, жалпысынан 20 млрд доллардан ашык суммага бааланган долбоорлорго кол коюлду.

Өзбек туугандар 11 миллиарддык Атомдук электрстанциясын куруу долбооруна кол коюшту.

Ал эми жергебиздеги «Дастан», «Шквал», «Нур» өңдүү мурда аскердик куралдарды чыгарган заводдорду эске алганда аскердик ишкана ачууга анча деле ири инвестиция жумшалбашы белгилүү.