Categories

Казакстанда аялын барымтага алып, граната жардырам деп коркуткан адам кармалды

Орол шаарында граната жардырам деп коркутуп, аялын алты саат бою кеңседен чыгарбай кармап турган адамга каршы «Барымтага алуу» беренеси менен кылмыш иши козголду. Бул тууралуу Батыш-Казакстан облустук полиция департаментинин маалыматына таянуу менен Борбордук Азия жаңылыктар кызматы жазды..

Мекеменин маалыматына караганда, кармалган адам 28-ноябрда аялын нотариус кеңсесинде барымтага алган. Ал бычагы бар экенин жана граната жардырарын айтып, учак жана ири суммада акча талап кылган. Алты сааттык сүйлөшүүнүн жыйынтыгында ал барымтадагы аялды бошотуп, колго түшүп берген.

Полициянын маалыматына караганда, кармалган адам жергиликтүү курал-жарак дүкөндөрүнөн сатып алган гранатанын муляжын колдонгон. Анын буга чейин соттолгону кабарланды.Барымтада кармалып турган аял ооруканага жеткирилди. Анын сол буту бычактан жаракат алган.

 
Categories

Иранда ЦРУга иштейт деген шек менен сегиз киши кармалды

Ирандын атайын кызматы АКШнын Борбордук чалгын башкармалыгына (ЦРУ) тиешеси бар деген шек менен сегиз кишини кармады. Бул тууралуу мамлекеттик IRNA агенттигинин маалыматына таянып, Борбордук Азия жаңылыктар кызматы жазды.

Иран бийлигинин маалыматына караганда, кармалган адамдар жарандык журналист катары иштемиш болуп, тыңчылык менен алектенишкен. Алар өлкөдөгү башаламандыктар тууралуу маалыматтарды топтоп, чет мамлекетке жиберип турушкан.

Азырынча Вашингтон бул боюнча эч кандай жооп бере элек.

Иранда массалык демонстрациялар ноябрдын ортосунан бери уланууда. Нааразылык алгач күйүүчү майдын кымбатташынан улам башталып, тез эле өкмөткө каршы акцияларга айланган. Митинг маалында полиция бир нече жолу демонстранттарга каршы ок-дары жана көздөн жаш агызчу газ колдонгону кабарланууда.

Укук коргоочулардын мааалыматына караганда, акция катышуучуларын таркатуу аракети маалында 100дөн ашык адам каза болуп, миңдеген киши камакка алынды.

 
Categories

Индиялык аялдын колунун 12 манжасы бар(фото)

Анын аты Кумар Наяк, 63 жашта. Гянджам районунда жашайт. Ал абдан кедей бүлөдө жашагандыктан ушу күнгө чейин дарыгерлерге кайрыла албай келет. Дарыгерлердин айтымында анын дартын хирургиялык жол менен айыктырса болот.

Индиялык аялдын  колунун 12 манжасы бар(фото)

Кумар Наяктын дарты абдан сейрек кездешүүчү оору. Ал көчөгө чыккан сайын жергиликтүү элдерден ар дайым өзүнүн адресине карата шылдың сөздөрдү уккандан тажагандыгын айтат.

Индиялык аялдын  колунун 12 манжасы бар(фото)

Индиялык аялдын  колунун 12 манжасы бар(фото)

 
Categories

Өлкөдө өрт кырсыгы өткөн жылга салыштырмалуу 23 пайызга азайды

Өрт кырсыгы өткөн жылга салыштырмалуу 23 пайызга азайды. Бул тууралуу ӨКМдин  басма сөз кызматы билдирди.

Маалыматка караганда, 10 ай ичинде республика боюнча 3 миң 270 өрт кырсыгы (2018-жылы 4 миң 246) катталган.

“Өрттөн келип чыккан материалдык чыгымдар 651 миллион сомдон ашык түздү. Кырсыктан 36 адам каза таап, 46 адам жабыркады”, – деп айтылат маалыматта.

Өрттөн 47 адамдын өмүрү жана 528 миллион сомдон ашык товардык материалдык баалуулуктар сакталып калган.

 
Categories

Өзбекстанда эки аял алган киши соттолду

Бухара облусунун Гиждуван районунун жашоочусу “көп аялдуулук” үчүн бир жылга эркинен ажырыталды. Бул тууралуу Борбордук Азия жаңылыктар кызматы билдирди.

Өзбек басылмалары билдиргендей, соттолгон киши расмий никесине карабай, 2016-жылы экинчи жолу үйлөнгөн. Ал аялы ооруп калып, уул төрөп бере албагандыктан ушундай кадамга барганын айткан. 2018-жылы экинчи аялы уул төрөгөн. Сот жараяны учурунда айыпталуучу күнөөсүн мойнуна алган. Бирок экинчи ирет никеге турганына карабай, биринчи үй-бүлөсүнө да жакшы шарт түзүп бергенин, эки кызын багып келгенин белгилеген.

Өзбекстандын Кылмыш кодексинин “Көп аялдуулук” беренесине ылайык, сот аны бир жылга эркинен ажыраткан

 
Categories

Казакстанда бөйрөктү мыйзамсыз алмаштырууга шектелип дарыгер кармалды

Казакстандын Чымкент шаардык № 1 клиникалык ооруканасынын башкы дарыгери мыйзамсыз иштерди жасаган, деп кармалды. Бул туурасында казак басылмалары жазып чыкты.

Маалыматка ылайык, Абылай Донбай аттуу ак халатчан акчага муктаж жарандардын бөйрөгүн чет өлкөлүк адамдарга сатып, салып берип жүргөн. 

Операциялар 2017-2018-жылдары жасалган. ИИМ бул схеманын уюштуруучулары чет мамлекеттердин жарандары экенин билдирди.

Донбай Абылай Кылмыш Кодексинин «Трансулуттук кылмыштуу топтун ишине катышуу», «Кишинин органдарын мыйзамсыз алуу» беренелери боюнча айыпталууда.

 

 

 
Categories

Иранда демонстрациялар учурунда 100дөн ашык киши өлгөндүгү айтылууда

Иран президенти Хассан Роухани шаршембиде “душмандардын кутумун жеңүүгө мүмкүн болгонун” жарыялады. Жергиликтүү телеканалдар аркылуу көрсөтүлгөн өкмөттүн жыйынында ал жапырт башаламандыктарды басуу тууралуу пикирин билдирди. Бул тууралуу Борбордук Азия жаңылыктар кызматы жазды.

– Иран эли кайрадан сыноодон өтүп, душмандарга абалдан пайдаланууга жол бербей турганын көрсөттү, – деди ал. Роухани эл бийликтин аракетине нааразылык билдирүүгө укуктуу экенин да кошумчалады. Мамлекеттик ММКлар демонстрация учурунда кармалгандардын арасында Германия жана Түркия жарандары да ар экенин маалымдашты. Нааразылык акциялары башталганда Иран бийлиги Интернетти өчүргөн. Буга байланыштуу социалдык түйүндөрдө протесттер учурундагы видео жана сүрөттөр дээрлик жок.

Amnesty International укук коргоо уюму күбөлөргө жана активисттерге таянуу менен нааразылык акциялары 20дай шаарда өткөнүн, демонстранттарды кууп таратуу учурунда бери дегенде 106 киши өлгөнүн, 1000дей адам камалганын билдирди. Иран бийлиги бул маалыматтарды четке кагууда.

Иранда наразылык акциялары 15-ноябрда башталган. Буга бензиндин баасынын көтөрүлүшү, май куюуга чектөө киргизүү себеп болгон. Бийлик экономикалык көйгөйлөрдү ушундай жол менен гана чечүү мүмкүн экенин айтууда.

 
Categories

Ташкенттин акими тарабынан басмырланган эки журналист жумуштан кетти

Өзбекстанда Kun.uz агенттигинин эки журналисти – Зафарбек Солижонов менен Баходир Ахмедов​ 18-ноябрда жумуштан өз каалоолору менен кеткенин билдиришти. Алардын айтымында, буга Ташкент шаарынын башчысы Жахонгир Артыкхожаев менен чырдашуу себеп болгон. Бул тууралуу Борбордук Азия жаңылыктар кызматы жазды.

Журналист Баходир Ахмедов​ Telegram-каналына: «Бүгүн биз утулган жокпуз. Жаңыдан ойгонуп келе жаткан сөз эркиндиги утулду, пресса утулду. Жахонгир-ака, мен сизге айтып коеюн, мен иттин баласы эмесмин, мен макулук эмесмин. Мага иш табылат деп ишенем! Сиздерден болсо журналисттердин укугу корголбогон, пресса алсыз болгон доордо Kun.uz басылмасын күнөөлөбөөнү суранам», –​ деп жазды.

Анын кесиптеши Зафарбек Солижонов да ушундай эле өңүттө билдирүү калтырган.

Kun.uz интернет-басылмасы журналисттердин жумуштан бошотулушу боюнча комментарий бере элек.

16-ноябрда интернетке үнү Ташкенттин мэри Жахонгир Артыкхожоевдикине окшош адам журналисттерди кемсинтип, коркутуп жатканы жазылган аудиотасма жарыяланган.

— Деги алар ким? Алар – макулуктар!!! Алар адамдын баласыбы же иттин баласыбы? Принциби жок байкуштар, корооздор. Мен силерге көрсөтөм. Силерди кумса деп эле койсом болду. Таксиге кумса менен отургузуп, сүрөткө тартып койсом бүттү, кумса болуп каласыңар, — деген ал.

Ташкент шаарынын башчысы Жахонгир Артыкхожаев коркутуп-үркүткөн журналисттер Kun.uz сайтында иштей турганы аныкталган.

18-ноябрда Kun.uz басылмасы Жахонгир Артыкхожаев менен болгон талаш-тартыш жөнгө салынганын маалымдаган.

Бул арада социалдык түйүндөрдүн өзбек сегментинде Ташкент шаарынын башчысын отставкага кетирүү чакырыктары уланууда. Facebook, Twitter жана Telegram колдонуучулары журналисттерин басмырлап, коркутуп-үркүткөнүнө карабай, Kun.uz басылмасы Ташкент башчысы менен элдешип алганын кескин айыпташууда.

 
Categories

Гонконг полициясы университет имаратындагы акция катышуучуларын чыгарды

Гонконг полициясы акыркы күндөрү нааразылык акциялардын катышуучулары жайгашып турган Политехникалык университеттин имаратын чабуул менен алды. Бул тууралуу Борбордук Азия жаңылыктар кызматы билдирди.

Жергиликтүү басылмалардын маалыматына караганда, операция маалында кармалгандар жана жаракат алгандар бар. Учурда алардын саны такталууда. Студентер полицияга күйүүчү май куюлган бөтөлкөлөрдү ыргытып, буга жооп катары укук коргоо кызматкерлери көздөн жаш агызчу газ менен желим окторду колдонушкан. Окуу жайдын ректору операцияны токтотуу боюнча бийлик менен макулдашып, студенттерди имараттан чыгып, багынып берүүгө көндүргөн. Бирок активисттер полиция имараттан чыккандардын бардыгын кармап кеткенин билдирүүдө.

Полиция имартка чабуул жасалганын четке кагып, радикал маанайдагы активисттер гана кармалганын билдирди. Гонконгдо нааразылык акциялар быйыл жайында башталган. Алгач нааразы болгондор кылмышка шектүүлөрдү Бээжинге өткөрүп берүү тууралуу мыйзам долбоорун артка кайтарууну талап кылып чыгышкан. Бийлик бул тарапты аткарганына карабастан, активисттер акция маалындагы полициянын аракеттери боюнча иликтөө, кармалгандарды бошотуу, автономиянын башчысы Кэрри Ламды кызматтан кетирүү жана Бээжинден көз карандуулукту азайтуу талаптарын айтып келишет.

Нааразылык акциялар башталгандан бери Гонконг администрациясы автономияда бир нече чектөөлөрдү киргизген. Алсак, октябрдын башында беткаптарды кийип жүрүүгө тыюу салынган. Бул эрежени бузгандарга бир жыл камакка алуу жазасы каралган. Мындай чектөөлөр нааразылыктардын жаңы толкунун жараткан. 18-ноябрда Гонконгдун Жогорку соту бул чечим парламенттин макулдугусуз кабыл алынганын билдирип, аны жокко чыгарган.

 
Categories

Аскар Акаевге кытайлар кызмат сунуштады

Кыргызстандын мурдагы президенти Аскар Акаевге кытайлар Илимдер Академиясынын Физика жана космос технологиялары институтунда иштөөнү сунушташты. Бул туурасында запастагы генерал-полковник, КРнын Улуттук гвардиясынын биринчи командачысы Абдыгул Чотбаев  фейсбук баракчасында жарыялады.

Мындай сунунш Шанхайда өтүп жаткан академиктердин форумунда берилген. Азырынча Акаев жооп бере электиги айтылат.