Categories

Марлен Маматалиев: Чет өлкөдө операция болчу бейтаптардын тизмесин түзүү керек

Кыргызстанда айрым ооруларга операция жасай алышпагандан кийин миңдеген деген жарандар чет мамлекеттерге чыгууга аргасыз болууда. Каражаттары жок. Ар кандай жолдор менен акча издеп убара болуп жатышат. Мындай пикирин эл өкүлү Марлен Маматалиев Жогорку Кеңештин жыйынында айтты.

Депутат Марлен Маматалиев: “Саламаттыкты сактоо министрлиги бейтаптарды кабыл алып, тизмесин түзүү керек. Жардам беребиз дешкен эл аралык фонддор, жеке адамдар чыгып жатат.  Бизге бейтаптардан кайрылгандар көп. Акыркы убактарда арап мамлекеттерден андай бейтаптарга жардам берем дегендер бар. Өкмөт алардын тизмесин тактап, жардам берсе, бир топ жарандарды өлүмдөн аман алып калышмак”,-деди.

Мындан сырткары эл өкүлү биздеги саламаттык сактоо тармагындагы менчик ооруканалар ошол операцияларды жасай аларын билдирип жатышкандыктарын, аларга  мыйзамдын негизинде техникалык каражаттарды алганга көмөк көрсөтүү керектигине токтолду.

 
Categories

Психиатрдык мекемелердеги бейтаптардын укуктары текшерилди

Акыйкатчы аппараты  Психиатрдык мекемелердеги бейтаптардын укуктарынын сакталышы боюнча иликтөө жүргүзүштү. Мындай изилдөө Ош облустук психикалык ден-соолук борборунда, Кадамжай районунда жайгашкан аралаш психоневрологиялык  интернат-үйүндө, Жалал-Абад облустук психикалык ден-соолук борборунда, Кызыл-Жар айылындагы республикалык психиатриялык ооруканада, Жалал-Абаадыгы психоневрологиялык балдар интернат- үйүндө жүргүзүштү.

Жогоруда аты аталган психиатриялык мекемелерде Акыйкатчы аппаратынын кызматкерлери медициналык кызмат колдонуучуларды жана медициналык персоналдарды анкета аркылуу сурамжылоо кылышты жана алар менен сүйлөшүүлөрдү жүргүзүштү, консультациялар берилди. Жашап жаткан бөлмөлөр, жатуучу бөлмөлөр, тамак-аш жайлар, тамак-аштын сактоо нормалары текшерилди. Ошондой эле бейтаптар үчүн маанилүү болгон дары-дармектер сакталган бөлмөлөрдөн дары-дармектердин сактоо, колдонуу нормалары тыкыр текшерүүгө алынды.

 
Categories

1235 жаран гемодиализ алышат

Жогорку Кеңештеги “Ата-Мекен” парламенттик фракциясынын кезектеги жыйыны өтүп, өнөкөт бөйрөк оорулуулары үчүн гемодиализ кызматын көрсөтүү маселелери талкууланды. Бул тууралуу Жогорку Кеңештин Басма сөз кызматы билдирди.

Жыйынга тиешелүү Өкмөт өкүлдөрү, тармактык мекемелер менен уюмдардын жетекчилери жана өнөкөт бөйрөк оорусу менен жабыркаган жарандар катышты. Маселе боюнча учкай маалымат берген саламаттык сактоо министринин орун басары Эркин Чечейбаев өнөкөт бөйрөк оорусу менен жабыркаган жарандардын саны жыл сайын көбөйүп жатканына токтолуп: “Учурда 1235 жаран аталган оору менен ооруйт. Аларга 2018-жылга чейин тендердик негизде бир эле компания гемодиализ кызматын көрсөтүп келген. Бирок, оорулуулардын саны акыркы жылдары көбөйгөндүгүнө байланыштуу башка жеке менчик клиникалардын кызматтарын төлөө менен жеңилдетилген дарылоо системасын киргизүү зарылчылыгы келип чыкты”, – деди. Министрдин орун басары билдиргендей, азыркы тапта бардык оорулуу жарандар гемодиализди мурдагыдай кезек күтпөстөн, керектүү  учурда алууда.

Анткени менен Өкмөттүн кабыл алган жаңы токтомунда оорулуу жаран бир айда 12 гана жолу гемодиализден өтүү мүмкүнчүлүгү каралган. Калган дарылоону өзү чөнтөгүнөн төлөөгө мажбур. Ал эми көпчүлүк учурда оорулуулар бир айда 13-14 жолу гемодиализге муктаж болот.

Ага ылайык, депутаттар аталган чектөөнү алып салуу зарылчылыгын белгилешип, тиешелүү Өкмөттүк мекемелер көйгөйдү тез арада чечүүсү керектигин кошумчалашты. Ал эми эл өкүлдөрү Сайдулла Нышанов менен Абдимуктар Маматов бул сыяктуу өнөкөт оорулардын алдын алуу жагын караштыруу менен калкты маалымат менен камсыздоону колго алууга чакырды.

Жыйын соңунда “Ата-Мекен” парламенттик фракциясы гемодиализге муктаж жарандарга керектүү каржылык маселелерди тез арада жолго коюуну жана дарылоо санын чектөө тартибин жоюуну тиешелүү министрликтерге тапшырышты.

 
Categories

Жалал-Абад облустук клиникалык ооруканасында жаны имараттын курулуш иштери башталды

Жалал -Абад облустук клиникалык ооруканасындагы жаңы салына баштаган 100 керебеттүү оорукананын курулушунун капсуласын салуу аземи болуп өттү. Мындай маалыматты аталган министрликтен кабарлашты.

Бул иш-чарага  Саламаттык сактоо министри Космосбек Чолпонбаев жана бир катар бийлик өкүлдөрү катышышты.

Оорукана республикалык бюджеттин эсебинен каржыланып, жалпы суммасы 76368,4 миң сомду түзөт. 100 орундуу, 2 кабаттуу жаңы имараттын курулушу 2020-жылы октябрь айында аяктайт.

 
Categories

Зыяндуу боектор менен басылган окуу китептери табылды

Бишкек шаарынын билим берүү мекемелери үчүн дайындалган китептерден контрафакттык оку китептери табылып алынды. Бул тууралуу УКМКнын маалымат кызматы билдирди.

Москва шаарынын “Просвещение” басмаканасынын, И.Раззаков атындагы Кыргыз техникалык университетинин, КР Саламаттык сактоо министрлигинин ооруларды алдын алуу департаментинин жана мамлекеттик санитардык-эпидемиологиялык көзөмөлүнүн адистери тарабынан жүргүзүлгөн экспертизанын жыйынтыгында, алынган китеп үлгүлөрүндө колдонулган боек компоненттери зыяндуу аралашмалардан тургандыктан окуучулар үчүн коркунучтуу деп табылды жана алынган китептер мыйзамсыз басылып чыккандыгы аныкталды.

2019-жылдын 3-сентябрында Дордой базарында тинтүү жүргүзүлүп, анда билим берүү мекемелери үчүн Москва шаарынын “Просвещение” басмаканасынын атынан дайындалган 28 аталыштагы 8000 контрафакттык көчүрмө китептер табылган. Ыкчам-издөө иш чарасынын жүрүшүндө табылган китептердин бир бөлүгү Бишкек шаарынын жеке басмаканаларында («Аль Салам» жана «Турар» ЖЧК) чыгарылган.

Азыркы учурда жасалма китептердин даярдаган уюштуруучуларды   аныктоо максатында тиешелүү тергөө иш-чаралары жүрүп жатат.

 
Categories

Мавлянова: Ноокатта өсмө оору менен ооругандар көбөйүп бара жатат

Бүгүн эрте менен Жогорку Кеңеш депутаттары ар кандай маселелерди айтышты. Депутат айым Махабат Мавлянова эс алуу учурунда Ноокат районунун эли менен жолугушуп келгенин айтып, алардын көйгөйүнө токтолду.

Депутат Махабат Мавлянова: Ноокатта өсмө (рак) оору менен ооругандар көбөйүп бара жатат. Кулатов айыл өкмөтүнүн түндүк тарабына цемент заводу курулган. Аны менен катар эле анда карьери да жайгашкан. Андан чыккан таза эмес аба элдин ден соолугуна терс таасирин тийгизүүдө.  Ошондуктан тийешелүү мамлекеттик мекемелерге тапшырма берип, ошол жерде мониторинг жүргүзүү керек”,-деди.

 
Categories

Араван аймактык ооруканасында төрөт үйү курулуп жатат

Ош облусунун Араван аймактык ооруканасында “Асса-Фа” Кувейт фондунун каржылыгы менен 2 кабаттуу имараттан турган төрөт үйү курулуп жатат. Анын сметалык наркы 100 млн. сом. Бул тууралуу Саламаттыкты сактоо министрлигинин маалымат кызматы билдирди.

Курулуш 2019-жылдын май айында башталган, аны куруп бүтүп, иштөөгө өткөрүү кийинки жылдын май айына максатталган. Азыркы убакта курулуштун пайдубалы тургузулуп, биринчи кабаттын каркастык бөлүгү курулуп бүткөн.

 
Categories

Чүй облустук Ички иштер башкы башкармалыгынын жетекчиси Самат Курманкулов акыл эсине келди

Чүй облустук Ички иштер башкы башкармалыгынын жетекчиси Самат Курманкулов бир нече күн эс учун жоготуп жатып, эми акыл эсине келди. Аны учурда жалпы палатага которуу караштырылууда.

Дарыгерлердин маалыматына караганда, ал азырынча сүйлөй элек. Бирок, айтканды угуп, кыймылга келе баштады.

Эске сала кетсек, 7-август күнү Алмазбек Атамбаевди күч менен суракка алып келүү учурунда анын тарапташтары Самат Курманкуловду таш менен уруп, эстен тандырышкан. Андан соң ага эки ирет операция жасалган. Бирок, ал эс учуна келбей жаткан болчу. 12-августа Москвага дарылоого алып кетишкен.

 
Categories

Жай – күздө ичеги-карын жугуштуу ооруларынан этият болуу керек

Ушул кундөрү шаарыбыздын жугуштуу оорулары ооруканасында кезекке тургандардын катары арбын. Бул тууралуу интернет булактарында маалымдалууда. Айрыкча мындай ооруга ымыркайлар көбүрөөк чалдыгууда.

Курч кармаган ичеги-карын инфекциялары – бул  жугуштуу  ооруларынын тобу (ич өткөк (дизентерия), сальмонеллез, ич келте, гепатит А ж.б).

Бул оорунун белгилерин кантип байкоого болот?

Ичегинин иштөө функциясы бузулат – ичтин оорушу, көбүшү, күнүнө 3-4 жолу ичтин өтүшү;  Уулануунун белгилери – адамдын дене табынын жогорулоосу, алсыздык, табитти жоготуу, көңүл айнуу, кусуу.

Эмне себептен жай, күздө бул ооруларды жуктуруп алуу күчөйт?

Ачык же крандагы кайнабаган сууларды ичүүлөр көбөйөт, аларга инфекция козгогучтар жуккан болушу мүмкүн;

Жаңы бышкан жашылча-жемиштер көп колдонулат, алар дайым эле таза жуулбайт;

Тамак-аш азыктары (өзгөчө эт, сүт, балык) жай-күз тез бузулат. Бузулганы таптакыр байкалбашы мүмкүн;

Инфекцияны таркатуучу – чымын-чиркейдин саны көбөйөт;

Жайында микробдор тез көбөйүшөт.

Ичеги-карын ооруларын жуктуруп албоо үчүн эмне кылуу керек?

Кайнатылган же бөтөлкөдөгү гана сууну ичүү;

Колду тамактануунун астында жана дааратканадан келгенден кийин самын менен жуу;

Жашылча-жемиш, көктөрдү таза жуу;

Тамак-аш азыктарын чымын-чиркей жана курт кумурскалардан коргоо;

Тамак-аш азыктарын муздаткычта сактоо (этти даяр тамактардан өзүнчө сактоо);

Жаңы жасалган тамактарды гана колдонуу;

Тамак-аш сактоочу жана жасоочу жайды таза кармоо;

Тамак-аштарды көрсөтүлгөн күнүнө карап сатып алуу.

Колду кайсыл учурда жууш керек?

Тамак жасоо алдында;

Тамактанаар алдында;

Көчөдөн үйгө келген соң;

Унаада жүргөндөн кийин;

Акча колдонгондон кийин;

Клавиатура колдонгондон кийин;

Дааратканадан кийин;

Көчөдөн үйгө келген соң;

Тазалоо иштеринен кийин.

Тазалыктын жөнөкөй эрежелерин сактоо – ичеги-карын инвекцияларынан ишеничтүү коргойт!

 
Categories

Бешинчи баскычтагы бөйрөк жетишсиздиги менен жабыркагандар гемодиализди акысыз алышат

Өкмөт  өнөкөт бөйрөк жетишсиздиги менен жабыркаган бейтаптар үчүн гемодиализ кызматын уюштуруу жана аны жүзөгө ашыруунун тартибин бекитти. Тиешелүү чечимге Премьер-министр Мухаммедкалый Абылгазиев кол койду. Бул тууралуу өкмөттүн маалымат билдирди.

Тагыраагы алар бюджеттик жана жеңилдетилген категорияларга бөлүнбөйт. Бейтаптарга гемодиализ кызматын көрсөтүүчү саламаттык сактоо уюмун жеке менчик түрүнө жана жайгашкан жерине карабастан эркин тандоо укугу берилет.

Берилген арыз жана документтердин негизинде бешинчи баскычтагы өнөкөт бөйрөк жетишсиздиги менен жабыркаган бейтаптардын электрондук тизмеси түзүлүп, «Бирдиктүү реестрге» киргизилет. Бул дартка чалдыккандардын тизмесин бекитүү туруктуу түрдө атайын комиссия тарабынан жүргүзүлмөкчү.

Гемодиализ кызматы дарттын оордугуна ылайык жумасына 3 сеанс жана айына 12 сеанстан ашык эмес жолу көрсөтүлөт. Гемодиализ кызматы үчүн төлөм тиешелүү келишимдин негизинде республикалык бюджеттин каражаттарынын эсебинен жүргүзүлөт.

Белгилей кетсек, гемодиализ кызматы тийиштүү лицензиясы бар мамлекеттик жана жеке менчик саламаттык сактоо уюмдары тарабынан көрсөтүлөт.