Categories

КЫРГЫЗ-КАЗАК ЧЕК АРАСЫНДАГЫ КЫРДААЛ

Кыргыз-казак чек арасынан өтө албай турган фуралардын айдоочулары үчүн чатырлар тигилип, тамак берилүүдө. Бул тууралуу ӨКМдин маалымат кызматы кабарлады.

Билдирмеге караганда, министрлик “Ак-Тилек” чек ара постунда жана Бишкек — Нарын — Торугарт жолунун 31-33-чакырымдарында төрт чатыр орноткон.

Ал жерде сегиз куткаруучу, Тез жардам кызматынан бир бригада жана ИИМдин үч кызматкери нөөмөттө турат. 18-апрель күнү 300 айдоочуга тамак-аш берилгени айтылды. ӨКМ 19-апрель саат 07:00гө карата “Ак-Тилек” постунда кезекте 268 оор жүк ташуучу унаа турганын белгиледи.

Буга чейин Чек ара кызматы казак тарап машиналарды жай өткөрүп жаткандыктан чек арага жүк ташуучу транспорт топтолуп калып жатканын айткан. Ошондой эле казак тарап маал-маалы менен жолду бир тараптуу жаап салып жатканы да маалым болгон.

Министрлер кабинетинин төрагасынын биринчи орун басары Арзыбек Кожошев казак тарап фуралар боюнча келишимди аткарбаса мамилеге кесепети тиерин белгилеген.

 
Categories

«ТЫНЧТЫККА КАРШЫ КЫЛМЫШ». ОК АТЫШУУГА БАЙЛАНЫШТУУ КЫЛМЫШ ИШИ КОЗГОЛДУ

Баткенде кыргыз-тажик чек арасындагы 12-апрелдеги ок атышууга байланыштуу “тынчтыкка каршы кылмыш” беренеси менен кылмыш иши козголду. Прокуратуранын билдиришинче, мекемелер аралык тергөө тобу түзүлдү.

Кыргыз-тажик чек арасында 12-апрелде ок атылган окуя катталган жана тараптар үч ирээт жолугуп сүйлөшкөн. Анда тараптар чек арага тартылган кошумча күчтөрдү жана каражаттарды кайра кайтарууну улантууну, бул чечимдин аткарылышын көзөмөлдөө үчүн тиешелүү органдардардан турган комиссия түзүүнү макулдашкан.

Ошондой эле күзөтчүлөрдүн каттамын тактоо үчүн эки өлкөнүн чек арачыларынан турган жумушчу топ түзүлөрү айтылган. Бул жаңжалда Кыргызстандын алты жараны жараат алган.

 
Categories

«МӨӨНӨТҮМ БҮТКҮЧӨ ЧЕК АРАНЫ ЧЕЧҮҮ НИЕТИМ БАР»

Президент Садыр Жапаров Кыргызстан менен Тажикстандын чек арасында болгон акыркы чыр-чатак боюнча 13-апрелде Фейсбуктагы расмий баракчасына билдирүү жазды. Ал өлкө демократиялык жолдон тайбай турганын, сөз эркиндиги, адам укугу сөзсүз сакталарын билдирди.

“Бирок жалпы журналисттерден, өздөрүн блогер деп эсептеген жарандарыбыздан бир нерсени суранам. Кошуна мамлекеттер менен болгон чыр-чатактарда маалыматты өзүңөр каалагандай бурмалап жана алардын жетекчилерин мазактап, ар кандай видео-фотоматериалдарды таратканды токтоткула. Бул кылыгыңар моралдык этикага туура келбейт. Мындай кылыгыңар менен абалды ого бетер курчутканга, эки элди кайраштырууга түрткү болуп жатасыңар. Ооба, чек ара көйгөйү бар. 30 жылдан бери чечилбей келген маселе. Абдан кылдаттыкты, кыраакылыкты талап кылат. Такташуулар жүрүп жатат. Миңдеген километр такталбаган жерлер бар. Убакыт керек. Менин президенттик мөөнөтүм бүткүчө, бул маселени чечип кетем деген ниетим бар”, – деп жазды Садыр Жапаров.

Президент сөз эркиндиги деген шылтоо менен жалган маалыматтарды таратпоого чакырды.

 
Categories

БАТКЕНДЕГИ КЫРДААЛ

Чек арадагы чырда октун чачырандысы тийген жоокердин абалы орто. Бул тууралуу Лейлек райондук ооруканасынын башчысы Алымкул Абдиев билдирди. Анын айтымында, жоокердин бутуна, санына жана таманына октун чачырандылары тийген, абалы орто, операция жасалган жок.

Саламаттыкты сактоо министрлиги Баткенде кыргыз-тажик чек арасындагы соңку ок атышууда Кыргызстандын эки жараны, бир жоокер менен жергиликтүү тургун жараат алганын билдирген. Жараат алган жергиликтүү тургунга алгачкы медициналык жардам көрсөтүлгөндөн кийин анын абалы канааттандырарлык болгондуктан амбулатордук дарыланууга жөнөтүлдү.

Президенттин Баткен облусундагы өкүлү Абдикарим Алимбаев билдиргендей, аймакта абал салыштырмалуу туруктуу. Баткендеги абалды көзөмөлдөп, күч кызматтары менен жергиликтүү бийликтин ишин координациялоону жеринен Коопсуздук кеңешинин катчысы Марат Иманкулов жүргүзүүдө.

Эскерте кетсек, 12-апрелдин кечинде кыргыз-тажик чек арасында эки жолу ок атышуу болду. Кыргызстандын расмий маалыматына караганда, алгач Лейлек районунун Максат айылына жакын жерде Кыргызстан менен Тажикстандын чек арачыларынын ортосунда ок атышуу катталды. Тажик тарап Кыргызстандын Достук айылын миномёттон аткылаганы маалымдалды.

 
Categories

КЫРГЫЗ-КАЗАК ЧЕК АРАСЫ АЧЫЛДЫ

Казакстан 11-апрелде түнкү саат 12:00дөн кийин чек арасынан автоунаа өткөрүүгө коюлган чектөөлөрдү алып салды. Бул тууралуу Кыргызстандын Чек ара кызматы билдирди.

Чек арадан өткөндө эки тараптан тең жарандардан ПЧР тести жана COVID-19га каршы эмдөөнүн, ревакцинациялоонун толук курсунан өткөнүн тастыктаган документи/паспорту талап кылынат.

 
Categories

ЧЕК АРА ЖАҢЖАЛЫНДА ЖАБЫРКАГАНДАРГА ЭЛДЕН 123 МЛН. СОМ ЧОГУЛГАН

Президенттин Баткендеги өкүлү Абдикарим Алимбаев былтыр апрелдеги чек ара жаңжалында жабыркагандарга коомчулуктан атайын эсепке 123 миллион сомго жакын акча топтолгонун билдирди.

Ал 22-февралда Министрлер кабинетинин көчмө жыйынында топтолгон каражатты бөлүштүрүү үчүн атайын комиссия түзүлгөнүн, куралдуу кагылышта жабыркаган айылдарды калыбына келтирүү үчүн курулуш компанияларга 90 миллион сом которулганын маалымдады.

“Ал эми жаракат алган жарандарга үч миллион сомдон ашык акча бөлүнгөн. Ошондой эле 229 миң сом жабыркаган айылдардагы балдарды эс алдырууга жумшалган. Жалпысынан 94 миллион сомдон ашык акча керектелди, учурда атайын эсепте 28 миллион сом турат”, – деди ал.

Алимбаев былтыр жазындагы чек ара жаңжалынын жалпы чыгымы 1 миллиард 350 миллион сомдон ашты деп эсептелгенин кошумчалады.

 
Categories

ЧЕК АРА: КЫРГЫЗ-ТАЖИК СҮЙЛӨШҮҮЛӨРҮ ЖЫЙЫНТЫКТАЛДЫ

Баткен шаарында 15-февралда кыргыз-тажик мамлекеттик чек арасын делимитациялоо жана демаркациялоо боюнча эки өлкөнүн өкмөттүк делегацияларынын топографиялык жумушчу топторунун кезектеги жолугушуусу жыйынтыкталды.

Өкмөттүн басма сөз кызматы билдиргендей, сүйлөшүүлөр 10-февралда башталган. Эки өлкөнүн өкүлдөрү тактала элек тилкелердеги чек ара сызыктары боюнча пикир алмашып, кийинки жолугушууну Тажикстандын аймагында өткөрүүнү макулдашышты.

Сүйлөшүүгө кыргыз тараптан Министрлер кабинетинин чек ара маселелери боюнча атайын өкүлү Назирбек Бөрүбаев баштаган делегация катышты.

 
Categories

ШАКИЕВ ЧЕК АРА ТУУРАЛУУ МААЛЫМАТТЫ ЖАБЫК ЭШИК АРТЫНДА УГУУНУ СУНУШТАДЫ

Эл өкүлү Нурланбек Шакиев УКМКнын төрагасы Камчыбек Ташиевди парламентке чакырып, чек ара тууралуу маалыматты жабык эшик артында угууну сунуштады. Бул тууралуу ал бүгүн, 2-февралда Жогорку Кеңештин жыйынында билдирди.

“Биз 31-январда комитет отурум өткөрүп, анда чек ара боюнча УКМКнын төрагасы жабык эшик артында бир топ маалыматтарды берген. Коомчулукта №39 протокол боюнча сөз болуп жатат. Бул маселе боюнча УКМКнын төрагасы Жогорку Кеңештин жалпы жыйынында айтып берем деген”, – деди ал.

Ошондой эле депутат бул маселени күн тартибине киргизүүнү сунуштады.

 
Categories

ЧЕК АРАЛАШ АЙЫЛДАРДА ПЕНСИЯ КӨБӨЙӨТ

Февраль айынын экинчи жарымында министрлер кабинетинин биринчи көчмө жыйыны Баткен облусунда өтөт. Бул туурасында өкмөттүн маалымат кызматы кабарлады.

Министрлер кабинетинин төрагасынын биринчи орун басары Арзыбек Кожошев “Баткен облусунун статусу жөнүндө” мыйзамды ишке ашыруу боюнча кеңешме өткөрдү. Жыйындын жүрүшүндө 62 преференциялык чек ара конуштарынын тизмеси бекитилип, аларга айрым салык, жер, экономикалык жана башка жеңилдиктер берилери айтылган.

“Министрлер кабинети жеңилдетилген мамлекеттик жана муниципалдык кызматтардан тышкары Баткен облусунун чек арага жакын жайгашкан 62 айылынын тургундарынын пенсиясын 2 000 сомго көтөрөт. Ошондой эле жөлөк пулдун көлөмүн эки эсеге көбөйтүү, электр энергиясын жеңилдетилген шартта берүү, социалдык кызматкерлердин, укук коргоо органдарынын кызматкерлеринин эмгек акысын жогорулатуу мүмкүнчүлүгү да каралууда”, – деди Кожошев.

Бул боюнча бардык ченемдик-укуктук актылар өкмөттүн көчмө жыйынында бекитүү үчүн 15-февралга чейин даяр болушу керектигин белгилеген.

 
Categories

КЫРГЫЗ-ТАЖИК ЧЕК АРАCЫНДА ОК АТЫЛДЫ

Улуттук коопсуздук боюнча мамлекеттик комитетинин Чек ара кызматы 16-декабрда кыргыз-тажик чек ара аймагында ок атылган окуя катталганын кабарлады. Маалыматка ылайык, Кыргызстандын жарандары Баткен районунун Көчө-Бою аймагында курулуш иштерин жүргүзүп башташкан.

Ал жерге Тажикстандын чек арачылары келип, курулушту токтотууну талап кылышкан. Кайым айтышуу чырга айланып, тажик күч кызматкерлери “Макаров” үлгүсүндөгү тапанчадан төрт жолу асманга ок чыгарышкан.

Эки өлкөнүн жергиликтүү чек ара кызматынын өкүлдөрү окуя боюнча жолукту. Атайын кызмат кыргыз жарандары чек арага өтө жакын эмес, Көчө-Бою айылынын ичинде курулуш жүргүзгөнүн белгилеп, тажик тарап курал колдонгону туура эмес болгонун моюнга алганын билдирди.

Тажикстандын Чек ара кызматынын өкүлү чырга жол берген аскерге чара колдонулаарын маалымдаган. Эки тарап окуяны иликтеп, жыйынтыгы боюнча жолугушуу өткөрүүнү макулдашканы кабарланды.

УКМК учурда чек арада абал тынч экенин билдирди.