Categories

ПРЕЗИДЕНТ ЧЕК АРАЧЫЛАРДЫ КЕСИПТИК МАЙРАМЫ МЕНЕН КУТТУКТАДЫ

Президент Садыр Жапаров чек арачыларды кесиптик майрамы менен куттуктады. Өлкө башчынын куттуктоосунда 2019-жылы чек арада курман болгон прапорщик Равшан Муминовду эстеп, кыргыз-тажик чек арасындагы акыркы кандуу окуяда капитан Нурсултан Манасбек уулунун, капитан Эсентур Кубанычовдун, прапорщик Бекзодбек Юлдашевдин каармандыгы кыргыз элинин эсинде түбөлүк сакталары айтылат.

«Мамлекеттик чек аранын кыргыз-тажик тилкесинде болуп өткөн кайгылуу окуянын сабактары талдоого алынып, улуттук чектерди ишенимдүү кайтарууну жогорулатууга, чек арага жакын райондордо жашаган тургундардын тынч жашоосун коргоого жана эки мамлекеттин, элдердин ортосундагы коңшулук жана достук мамилелерди калыбына келтирүүгө багытталган так чечимдер кабыл алынып жатат. Биздин ата-бабаларыбыздын кылымдар бою калыптанган өз ара ишенимин калыбына келтирүү өтө маанилүү жана мындан ары ушуга окшогон чек ара чыр-чатактарынын кайталанышына жол бербөө керек», – деп айтылат куттуктоодо.

 
Categories

ЧЕК АРАГА МИЛИЦИЯНЫН БИРГЕЛЕШКЕН ПОСТУ КОЮЛДУ

Кыргыз-тажик чек арасында, Баткен облусунун Ак-Сай айылы менен Согди облусунун Ворух айылы чектешкен жерге эки айылга кирип-чыккан тургундардын коопсуздугун камсыздоо максатында милиция кызматкерлеринин биргелешкен посту коюлду. Бул тууралуу 18-майда өкмөттүн Баткен облусундагы өкүлчүлүгү кабарлады.

Мекеменин маалыматына караганда, 17-майда Баткен облусунун жетекчиси Абдикарим Алимбаев менен Согди облусунун жетекчиси Ражоббой Ахмадзода кыргыз-тажик чек арасында жолугушту. Эки айылдын тургундарынын кармалышы боюнча окуяны талкуулап, жыйынтыгында кыргыз жарандарын сабаган тажик жарандарын мыйзам чегинде жоопко тартуу макулдашылды.

Чек арадагы маселелерди ыкчам чечип туруу максатында облус башчылары күч түзүмдөрүнүн жетекчилери менен биргеликте чек арада жума сайын жолугууну макулдашышты. Эки мамлекеттин чек арачыларынын биргелешкен патрулу түзүлдү. Учурда Баткен облусунун чек ара аймактарында абал тынч.

17-майда Ак-Сай айылынын тургундары бул айылдан үч тажикстандыкты, ал эми тажик жарандары Ворух аркылуу жайлоодон келе жаткан үч кыргызстандыкты кармап алган. Облус жетекчилеринин сүйлөшүүлөрүнөн кийин алар алмаштырылган. Тажикстан тарап кармаган Ак-Сай айылынын үч тургуну ар түрдүү жараат менен Баткендеги аймактык ооруканага жеткирилген.

 
Categories

ПРОТОКОЛ БОЮНЧА ТҮШҮНДҮРМӨ

Өкмөттүн маалымат кызматы Кыргызстан менен Тажикстан чек араны бөлө турган чийин сызыла турчу тилкелерди көрсөттү. “1924-1927-жылкы улуттук-аймактык чектеп бөлүү жана 1989-жылкы паритеттик комиссиянын документтери Лейлек районунун аймагында жайгашкан № 43 чек ара чекитинен № 61 чек ара чекитине чейинки тилкени жана Баткен районунун Кара-Бак айыл аймагында жайгашкан № 135 чек ара чекитинен № 141 чек ара чекитине чейинки тилкесин тактоодо гана пайдаланылат”, – деп айтылат маалыматта.

Буга чейин Ташиев аталган жылдардагы карталар ушул гана чек ара чекиттерин тактоодо колдонула турганын айтып, Ворух анклавынын буга эч кандай тиешеси жок экенин белгилеген. Эскерте кетсек, 17-майга чейин топографиялык иштер жана кыргыз-тажик чек ара линиясын аныктоо Лейлек районундагы Максат, Кулунду айылдарында, Баткен районундагы Көк-Терек, Көк-Таш, Ак-Сай айылдарында, мындан сырткары, коңшу өлкөнүн Бабаджан Гафуров районундагы Овчи Калача айылында, Согди облусуна караштуу Чоркух, Сомониён, Ходжаи Аъло айылдарында жана Исфара шаарында жүргүзүлөт.

 
Categories

ЧЕК АРАДА АБАЛ ТЫНЧ

7-майга карата Баткен облусундагы бардык айылдарда жана кыргыз-тажик чек арасында абал тынч. Чек арага жайгашкан айылдар милиция кызматкерлеринин көзөмөлүндө турат. Бул туурасында ИИМдин маалыматы кызматынан кабарлашты.

“Ички иштер органдары менен ички күчтөрдүн аскерлери коопсуздук чараларын күчөтүп, чек арага жакын жайгашкан айылдардын жашоочуларына түшүндүрүү иштерин жүргүзүүдө”, – деп билдирди маалымат кызматы. Өзгөчө көңүл коомдук тартипке, жарандардын коопсуздугуна бөлүнүп жаткандыгы айтылды.

 
Categories

ТАШИЕВДИ КИМДЕР “КЕЧИРИМ СУРАТТЫ?”

Деги биздин коомчулук чындап эле кокуй болуп бараткандыгы абдан өкүнүчтүү.

Башкасы бүтүп, эми кыргыз-тажик чек ара жаңжалынан ар кандай айла-амалдар менен арам “упай” алгысы келгендер арбып баратыр.

Учурда кайсы бир нойон соцтүйүндөргө “Ташиев тажиктерден кечирим сурады” деген монтаждалган арсыз видеону таратып, өзүнчө жыргап отурат.

Мынчалык акылга сыйбаган арсыз жорук менен атайылап Камчыбек Ташиевдин кадыр-баркына доо кетиргиси келген адамдар ыйык Рамазан айында абдан оор күнөө иш кылып жаткандыктарына кейибешке аргасызбыз.

Аттиң десе, ушунчалык кара өзгөйлүк менен Камчыкеге кыянатчылык кылуу абдан осол иш болууда.

Эми ошончолукка баргандар жок дегенде элди бир аз болсо да ишендиргилери келсе жакшылап эле монтаждаса болмок экен.

Анткен менен «калптын казаны кайнабайт» дегендей, элибиздин дээрлик көпчүлүгү чын менен калпты айдан ачык ажыратып билген учур азыр.

Анан да Камчыкенин катаал мүнөзү, элим-жерим деп соккон жүрөгү душмандардан эзели кечирим сурагыс экендигин кыргыз эли жакшы билет…

 
Categories

УКМК «ТАЖИК ЖАРАНДАРЫ АЭРОПОРТТОН КАРМАЛУУДА» ДЕГЕН МААЛЫМАТТЫ ТӨГҮНДӨДҮ

УКМКнын Чек ара кызматы укук коргоочу Валентина Чупиктин “Бишкек жана Ош аэропортторунда Тажикстандын жарандары кармалып, аларга туура эмес мамиле жасалып жатат” деген видео кайрылуусунда айтылгандар чындыкка туура келбесин билдирди. Укук коргоочу буга чейин YouTube каналы аркылуу Кыргызстандын чек арачылары транзиттик негизде өтүп бара жаткан тажик жарандарын себепсиз кармап жатат деген билдирүү тараткан.

“Укук коргоочунун айткандары жалган жана улуттар аралык кастыкты козутуу катары бааланат. Чек ара кызматынын өкүлдөрү эл аралык укуктук келишимдердин жана Конституциянын негизинде иш алып барышат. Мамлекеттик чек арадан өткөрүүдө адамдын жарандыгы, улуту, расасы маанилүү эмес”, – деп айтылат УКМКнын билдирүүсүндө.

Ошондой эле кыргыз-тажик чек арасындагы жаңжалдан кийин жарандардын коопсуздугу үчүн өткөрүү пунктунан адамдарды, автоунааларды жана жүк өткөрүү убактылуу токтотулган.

“Мындан улам аэропорттун кызматын пайдаланган тажик жарандарынын коопсуздугун камсыздоо үчүн кыргыз тарап аларды эки жол менен өлкө аймагынан чыгарып коюуда. Өзбекстан аркылуу кетүүнү каалагандар коңшу өлкөнүн чек арасындагы өткөрүү пунктуларына жөнөтүлүп жатат. Ал эми дароо өз өлкөсүнө өтүүнү каалагандар “Бордөбө” жана “Карамык” өткөрүү пунктуларына жеткирилип, тажик чек арачыларына өткөрүп берилүүдө”, – деп айтылат түшүндүрмөдө.

 
Categories

ЧЕК АРАДА АБАЛ ТЫНЧ

Баткен облусунда жана бардык райондордо, ошондой эле кыргыз-тажик чек арасында абал тынч. Бул тууралуу ИИМдин маалымат кызматы кабарлады. Билдирмеге караганда, чек арага жакын жайгашкан айылдар аскер кызматкерлери, милиция жана башка күч органдарынын көзөмөлүндө.

Алар жергиликтүү тургундарга түшүндүрүү иштерин жүргүзүп жатат. Тергөө кызматынын өкүлдөрү чек арадагы куралдуу кол салуудан жабыркаган социалдык жана башка объектилер боюнча иликтөө иштерин жүргүзүп жатканы айтылды. Күч органдары күчөтүлгөн тартипте иштеп жатканы кошумчаланды.

 
Categories

Садыр Жапаров Түркиянын TRT AVAZ телеканалына маек берет

Кыргыз Республикасынын президенти Садыр Жапаров
5-май, шаршемби күнү Стамбул убагы менен 13:00дө Түркиянын TRT AVAZ телеканалына маек берет.
Президенти Жапаров ТРТ Аваз экрандарында бүтүндөй түрк дүйнөсүнө кайрылуу жасайт.
Акыркы убакта, өлкөнүн стратегиялык жайгашуусу жана региондогу өлкөлөр менен болгон мамилеси Кыргызстанды болуп көрбөгөндөй эл аралык коомчулуктун көңүл борборуна айландырды. Жапаров Кыргыз Республикасына байланыштуу орчундуу маселелерден тышкары, күндөн-күнгө өнүгүп келе жаткан Түркия-Кыргызстан мамилелерине баа берет.
Булак: trthaber
 
Categories

БАТКЕН: ЖАБЫРКАГАНДАРДЫН САНЫ 189ГА ЖЕТТИ

Баткендеги кол салуудан жабыркагандардын саны 189 адамга жетти. Бул тууралуу Саламаттыкты сактоо жана социалдык өнүктүрүү министринин биринчи орун басары Ализа Солтонбекова билдирди.

Ал эми 36 адам курман болду. Учурда ооруканаларда 100 адам дарыланууда. Буга чейин Бишкекке 59 жабырлануучу жеткирилген. Баткен облусундагы бейтапканаларда 41 киши жатат, калгандары амбулатордук түрдө дарылануусун улантууда.

Солтонбекова Баткенде 81 медкызматкер, 20 психолог иштеп жатканын белгиледи. Алар жеринде 11-майга чейин иштээри белгилүү болду.

Эскерте кетсек, 28-апрелде Баткен районунун Көк-Таш айылындагы суу бөлүштүрүүчү жайга Тажикстандын жарандары видеокөзөмөл орното баштаган. Ага кыргызстандыктар каршы чыгышкан, көп өтпөй эки элдин жарандары бири-бирине таш ыргытуудан абал курчуп кеткен.

Өзгөчө кырдаалдар министрлигинен билдиришкендей, Баткен аймагында жалпы 107 турак үй, 2 мектеп, 1 ФАП, 1 бала бакча, 10 май куюучу жай, 8 дүкөн, 4 соода түйүнү, 4 социалдык объект жана 5 башка мамлекеттик имарат өрттөнгөн жана талкаланган.

 
Categories

ЧЕК АРАДА АБАЛ ТУРУКТУУ

Баткен районундагы Ак-Татыр айыл өкмөтүнө караштуу Орто-Боз аймагында Коргоо министрлигинин сапёрлору жарылбай калган снаряддарды таап, аларды зыянсыздандырууну баштады. Бул тууралуу УКМКнын Чек ара кызматы кабарлады. Орган мындан улам жергиликтүү тургундарды эгер жарылуунун үнү угулса чочулап, дүрбөлөңгө түшпөөгө чакырды.

Чек ара кызматы 4-май, 09.30га карата кыргыз-тажик чек арасындагы абал туруктуу экенин жана түндө кандайдыр бир окуялар катталбаганын билдирди. Чек арачылар, тартип коргоо органдарынын кызматкерлери күчөтүлгөн тартипте иштеп жатат.

28-30-апрель күндөрү кыргыз-тажик чек арасындагы куралдуу жаңжалда набыт болгон кыргызстандыктардын саны 36га жетип, 183 киши жараат алды. Үй-жайын таштап, коопсуз жайга көчүрүлгөндөрдүн саны 58 миңге чамалады. Жүздөн ашык турак жай талкаланып, өрттөлдү.