Categories

БШК САЙТЫНА ХАКЕРДИК ЧАБУУЛ БОЛГОН

Коопсуздук кеңештин катчысы, парламенттик шайлоону өткөрүү боюнча Республикалык штабдын жетекчиси Марат Иманкулов БШКнын сайтына 20 өлкөдөн хакердик чабуул болгонун билдирди. Ал маалымат борборунда шайлоодон кийинки кырдаал тууралуу билдирүү жасады.

“Коопсуздук кеңешинин төрагасынын орун басары Таалатбек Масадыков менен БШКнын серверин текшергени бардык. Ошол убакта адистер кандайдыр бир чабуул болгонун айтышты. Былтыр да ушундай аракеттер болгон экен, бирок экрандан хакердик чабуулду тосуп жатканын көрсөтүштү. Катуу корголгондуктан таасир эткен жок. Адис “чабуулдарды басаңдатып, жол берген жокпуз” деп айтты”, — деди Иманкулов.

Ошондой эле шайлоонун жыйынтыгын бурмалоого эч кимге жол берилбей турганын кошумчалады. Белгилей кетсек, БШКнын сайты эки жолу иштебей калган. Биринчисинде партиялардын алган добуштарын пайыздык көрсөткүч менен эсептей келгенде 100 эмес, 140 пайызга чыгып кеткен.

Ошондой эле АСУдан түшкөн добуштарды көрсөтүп жаткан сайт маалымат бербей жабылып калган.

 
Categories

КАМЧЫБЕК ЖОЛДОШБАЕВ ШАЙЛООДОН ЧЕТТЕТИЛДИ

Борбордук шайлоо комиссиясы 18-ноябрдагы отурумунда Бишкек шаары боюнча №26 Ленин округунан парламенттик шайлоого талапкер Камчыбек Жолдошбаевдин каттоосун жокко чыгарып, шайлоодон четтетти. Бул чечимди Боршайкомдун 11 мүчөсү бир добуштан колдоду.

Жыйында УКМК Камчыбек Жолдошбаев шайлоочулардын добушун сатып алганын, ал бул ишти кудасы Муктарбек Сыдыков аркылуу ишке ашырганын билдирди. Тергөөнүн маалыматы боюнча, Сыдыков 16-ноябрда төрт шайлоочуга 8 миң сомдон берген.

Тинтүү маалында шектүүнүн автоунаасынан 39 миң сом табылган. Ал 17-ноябрда Жазык кодексинин “Шайлоочуларды сатып алуу” беренесине шек саналып УКМКнын убактылуу кармоочу жайына камалды.

Ошол эле күнү Жолдошбаевдин үгүтчүлөрүнүн үйүндө тинтүү жүргүзүлүп, 138 миң сом жана шайлоочулардын тизмеси табылган. Камчыбек Жолдошбаевдин БШКдагы өкүлү Урмат Орозкулов Муктарбек Сыдыков Камчыбек Жолдошбаевдин үгүтчүсү катары каттоодон өтпөгөнүн, ал бул иштерди өз алдынча эле кылышы мүмкүн экенин айтты.

Ошондой эле добуш сатып алуу боюнча иш сотко өтө электигин кошумчалады.

 
Categories

БШК ЖЕКЕ КОРГОНУУ КАРАЖАТТАРЫН САТЫП АЛУУГА ТЕНДЕР ЖАРЫЯЛАДЫ

Борбордук шайлоо комиссиясы жеке коргонуу каражаттарын сатып алууга тендер жарыялады. Мамлекеттик сатып алуулар порталындагы маалыматка караганда, жеке коргонуу каражаттарын сатып алууга 15 млн. 41 миң сом жумшалат.

Сынактык арыздарды берүү мөөнөтү 30-мартка белгиленди. Анын ичинен 1 млн. 170 миң сомго санитайзер, 3 млн. сомго төрт кабаттуу бир жолу колдонулуучу бет кап, 1 млн. 585 миң сомго респитатор, 1 млн. 806 миң сомго кол кап, 4 млн. 950 миң сомго шайлоо комиссиянын мүчөлөрү үчүн кийимдер, 1 млн. 680 миң сомго шайлоочулар үчүн спирттүү кол аарчылар сатылып алынат.

Кыргызстанда 11-апрелде жергиликтүү кеңештерге шайлоо өтөт.

 
Categories

БШК ДАГЫ 7 ҮГҮТ ТОБУН КАТТАДЫ

Борбордук шайлоо комиссиясы 23-декабрдагы жыйында алдыдагы референдумга байланыштуу дагы жети үгүт тобун каттады. Буга чейин БШК парламентаризмди колдогон бир топту жана референдумда коюлган эки суроого тең каршы болгон үгүт тобун каттаган. Боршайкомдун маалыматына караганда, ушул убакка чейин жалпы тогуз үгүт тобу каттоодон өттү. Алардын төртөө президенттик башкарууну, экөө парламенттик башкарууну колдогондор, бирөө президенттик республикага каршы, экөө бардык варианттарга каршы чыккан топ. Мыйзам жалпы элдик добуш берүүнүн алдында референдумга коюлган маселелерди колдогондордун жана каршылардын үгүт тобун түзүүгө уруксат берет. Алар референдумду утурлай парламенттик же президенттик башкарууну тандоо үчүн элди үгүттөшөт. Мамлекетти башкаруу формасын аныктоо боюнча референдумда жарандарга үч суроо коюлат. Ага катышкандар президенттик же парламенттик башкаруу ыкмасын колдой турганын же бардык варианттарга каршы экенин билдириши керек.

 
Categories

БШК БЕКЕШЕВ ТҮЗГӨН ДЕМИЛГЕЛҮҮ ҮГҮТ ТОБУН КАТТАДЫ

Борбордук шайлоо комиссиясы 21-декабрдагы жыйынында Кыргызстандын башкаруу ыкмасын аныктоо боюнча референдумга карата үгүт жүргүзө турган топторду каттоо маселесин талкуулады. Анда Жогорку Кеңештин депутаты Дастан Бекешев түзгөн “Парламенттик башкаруу үчүн” демилгелүү үгүт тобу катталды. Бекешев эми референдумду утурлай парламенттик башкарууну тандоо үчүн элди үгүттөй турганын, социалдык тармактар аркылуу парламентаризмдин артыкчылыктарын түшүндүрүп бергенге аракет көрөрүн билдирди. Мыйзам жалпы элдик добуш берүүнүн алдында референдумга коюлган маселелерди колдогондордун жана каршылардын үгүт тобун түзүүгө уруксат берет. Мамлекетти башкаруу формасын тандоо боюнча референдумда жарандарга үч суроо коюлат. Ага катышкандар президенттик же парламенттик башкаруу ыкмасын колдой турганын же бардык варианттарга каршы экенин билдириши керек.

 
Categories

БШК 43 ЧЕТ ЭЛДИК БАЙКООЧУНУ КАТТАДЫ

Борбордук шайлоо комиссиясы мөөнөтүнөн мурда өтчү президенттик шайлоого көз салуу үчүн 43 чет элдик байкоочуну каттады. Мекеменин басма сөз кызматы жети өлкөнүн жана алты эл аралык уюмдун эксперттерине аккредитация берилгенин маалымдады. Ханнс Зайдел фондунун, Шайлоо түзүмдөрү эл аралык фондунун (IFES) өкүлчүлүгүнүн өкүлдөрү, Азербайжан БШКсынан бир, Молдова БШКсынан эки, КМШ Миссиясынан төрт эксперт бар. Калган 34 киши КМШнын Парламенттер аралык ассамблеясынын өкүлдөрү. Кыргызстанда мөөнөтүнөн мурда президенттик шайлоо 10-январда өтөт. Шайлоого катышууга башында 65 адам ниетин билдирип, документ тапшыруу жараянынан соң 20 киши калды. Үгүт өнөктүгү 15-декабрдан 9-январга чейин болот.

 
Categories

12 ТАЛАПКЕР ЖАРЫШТАН ЧЕТТЕТИЛДИ

Борбордук шайлоо комиссиясы Кыргызстандын президенттигине ат салышуу ниетин билдирген 12 талапкерге документтерин кайтарып берди. Чечим БШКнын жыйынында кабыл алынган. Соттуулугу жоюлбаган үч кишинин талапкерлиги алып салынды. Алар: Кубанычбек Кадыров, Бектур Асанов, Нурлан Мотуев. Ал эми мамлекеттик тилди билүү деңгээлин текшерген “Кыргызтесттин” сертификатын көрсөтпөгөн дагы 9 кишиге документи кайтарылды. Алар: Анар Зарипова, Анаркүл Араева, Тынчтык Акжолтоев, Юлия Лилиенталь, Елена Клипачева, Султан Ажиматов жана Куттумидин Базаркулов.

 
Categories

БШК СОТТУН ЧЕЧИМИНЕ ДАТТАНАТ

Борбордук шайлоо комиссиясы парламенттик шайлоону өткөрүүгө тыюу салган соттун чечимине каршы даттанат. Бул туурасында БШКнын маалымат кызматы билдирди. Белгилей кетсек, буга чейин Боршайком Жогорку Кеңештин депутаттарын кайра шайлоону өткөрүү күнүн 20-декабрга белгилеген. Бирок Биринчи май райондук соту БШКнын ал токтомун жокко чыгарып салган. “Учурда кийинки инстанцияга даттануу боюнча документтер даярдалып жатат”, — деп билдиришти маалымат кызматтан. Конституция боюнча, парламенттик шайлоону кайра өткөрүү эки айдын аралыгында уюштурулушу шарт. Бирок Жогорку Кеңеш шайлоонун мөөнөтүн жылдыруу боюнча, башкача айтканда, БШК таянып иш алып барып жаткан беренени 1-июнга чейин токтото туруу мыйзамын кабыл алган. Ал документке президенттин милдетин аткаруучу Садыр Жапаров да кол койгон. Ал арада парламенттик шайлоого катышуу ниетин билдирген партиялардын саны 48ге жетти.

 
Categories

БШК Кыргыз Республикасынын Жогорку Кеңешинин депутаттарын кайра шайлоону дайындады

Кыргыз Республикасынын Шайлоо жана референдум өткөрүү боюнча борбордук комиссиясы 2020-жылдын 21-октябрындагы өз жыйналышында жаңы чакырылыштагы Кыргыз Республикасынын Жогорку Кеңешинин депутаттарын шайлоону жекшембиге, 2020-жылдын 20-декабрына дайындоо жөнүндө токтом кылды.

Жыйналышта БШК мүчөлөрү Кыргыз Республикасынын Жогорку Кеңешинин депутаттарын кайра шайлоону даярдоо жана өткөрүү боюнча негизги уюштуруу-практикалык иш-чараларынын календардык планын бекитти.

Токтом “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын конституциялык Мыйзамынын 63-беренесинин негизинде, “Кыргыз Республикасынын шайлоо жана референдум өткөрүү боюнча шайлоо комиссиялары жөнүндө” Кыргыз Республикасынын Мыйзамынын 3, 7, 18-беренелерин, Кыргыз Республикасынын Шайлоо жана референдум өткөрүү боюнча борбордук комиссиясынын “2020-жылдын 4-октябрына дайындалган Кыргыз Республикасынын Жогорку Кеңешинин депутаттарын шайлоодо добуш берүүнүн жыйынтыктарын жараксыз деп таануу жөнүндө” токтомун жетекчиликке алуу менен кабыл алынды.

БШК Кыргыз Республикасынын Өкмөтүнө карата төмөнкүдөй токтом кылды:

1) Кыргыз Республикасынын Шайлоо жана референдум өткөрүү боюнча борбордук комиссиясы бекиткен чыгымдардын сметасына ылайык кайра шайлоону өткөрүү үчүн зарыл болгон финансы каражаттарын бөлүп берсин;

2) кайра шайлоону даярдоо жана өткөрүү мезгилинде мыйзамдуулуктун, жарандардын укуктарын жана эркиндиктерин, санитардык-эпидемиологиялык коопсуздукту камсыздоо жана жарандардын саламаттыгын, укук тартибин жана коомдук коопсуздукту сактоо, анын ичинде шайлоо комиссияларынын жайларын жана добуш берүү үчүн жайларды кайтаруу, алардын өрт коопсуздугун, шайлоо документтерин ташыган транспорт каражаттарын коштоо жана кайтаруу боюнча зарыл чараларды көрсүн;

3) шайлоо процессинде колдонулуучу маалыматтык электрондук тутумдардын киберкоопсуздугун, ведомстволор аралык электрондук өз ара аракеттешүү тутуму аркылуу маалыматтарды алмашууну камсыздоодо, ошондой эле мыйзамдарда белгиленген маалыматтарды берүү процесстерин жүргүзүү үчүн байланыштын үзгүлтүксүз жана коопсуз каналдары менен камсыздоодо, шайлоочулардын тизмесин түзүүдө жана аны Калктын бирдиктүү мамлекеттик реестринин негизинде актуалдаштырууда Кыргыз Республикасынын Шайлоо жана референдум өткөрүү боюнча борбордук комиссиясына көмөктөшсүн.

Кыргыз Республикасынын Башкы прокуратурасы кайра шайлоону даярдоодо жана өткөрүүдө Кыргыз Республикасынын Конституциясынын жана мыйзамдарынын сакталышын камсыздоо тапшырылды.

Жергиликтүү мамлекеттик администрациялардын башчылары, Бишкек жана Ош шарларынын мэрлери, жергиликтүү өз алдынча башкаруунун аткаруучу органдарынын жетекчилери тиешелүү органдардын жана шайлоо комиссияларынын кайра шайлоону даярдоодо жана өткөрүүдө шайлоочулардын тизмелерин түзүү, тактоо, уюштуруу-техникалык маселелерди чечүү боюнча ишине көмөктөшүүгө тийиш.

КР БШК маалымат бөлүмү 

 
Categories

БШК: “Добуш берүүнүн алдын-ала жыйынтыгы саат 22:00гө чейин чыгарылат”

Добуш берүү саат 20:00дө аяктап, саат 22:00гө чейин Жогорку Кеңештин депутаттарын шайлоонун алдын-ала жыйынтыгы чыгарылат. Бул тууралуу бүгүн, 4-октябрда БШКнын төрайымы Нуржан Шайлдабекова маалымат жыйында билдирди.

Анын айтымында, добуш берүү процесси саат 8:00дө башталды. Кыргызстанда 2475 шайлоо участкалары ачылды, анын 45и чет өлкөлөрдө.

Кыргызстанда 3 миллион 523 миң 554 шайлоочу катталса, дагы 32 миң 602 шайлоочу чет өлкөлөрдө.

«Шайлоочулардын арасында 47 пайызын эркектер, 52 пайызын аялдар түзөт. Ал эми 30 жашка чейин жаш шайлоочулар 29 пайыз», – деди Нуржан Шайлдабекова.

Бүгүн, 4-октябрда Кыргызстанда Жогорку Кеңешке шайлоо өтүп жатат. Парламенттик шайлоого 16 партия ат салышууда.


NewTV телеканалы  парламенттик шайлоого катыша турган партиялар арасында көз карандысыз сурамжылоо жүргүзүүдө. ЖОГОРКУ КЕҢЕШТИН ДЕПУТАТТЫК МАНДАТЫНА АТТАНГАН КАЙСЫ ПАРТИЯ ҮЧҮН ДОБУШ БЕРЕСИЗ?