Categories

Жээнбеков Абылгазиев менен өлкөнүн социалдык-экономикалык өнүгүүсү боюнча чараларды талкуулады

Президент Сооронбай Жээнбеков бүгүн, 28-июнда Премьер-министр Мухаммедкалый Абылгазиев менен жолукту. Бул тууралуу өлкө башчысынын маалымат кызматы билдирди.

Учурдагы жыйынтыктар, өлкөнүн мындан аркы социалдык-экономикалык өнүгүүсү боюнча чаралар, үстүбүздөгү жылдын биринчи жарым жылдыкта бюджеттин киреше бөлүгүнүн аткарылышы, ошондой эле пенсияларды жогорулатуу жана социалдык тармактын кызматкерлерине айлык акыларын көбөйтүүнүн көлөмдөрү жана мөөнөттөрү талкууланды.

Президент аймактык өнүгүү, мамлекеттик органдардын ишмердигин санариптештирүү, анын ичинде салыктык процедураларды фискализациялоо жана «Түндүк» ведомство аралык электрондук системаны киргизүү, «Коопсуз шаар» долбоорунун экинчи фазасын ишке ашыруу боюнча чараларды тездетүү зарылдыгына көңүл бурду.

Ошону менен катар эле Коопсуздук кеңешинин санариптештирүү жана жер казынасын пайдалануу маселелери боюнча чечимдеринин аткарылышы жетиштүү көзөмөлдөнбөй  жатканын айтты. Мындан тышкары,  Россия, Кытай, Индия, Германия тараптары менен мамлекет башчыларынын деңгээлинде жетишилген макулдашууларды ишке ашыруу боюнча министрликтердин жана ведомстволордун ишин координациялоо маанилүү экендигин өзгөчө баса белгиледи.

Муну менен биргеликте үстүбүздөгү жылдын аягына чейин ири инвестициялык долбоорлорду ишке киргизүү үчүн алардын тизмеси түзүлүшү керектиги эске салынды. Мындан тышкары  райондук борборлордо жолдорду оңдоо, Түндүк-Түштүк, Бишкек-Кара-Балта, Ош-Баткен-Исфана-Худжант жана башка республиканын негизги автожолдорун куруунун жүрүшүнө көзөмөлдү күчөтүү зарылдыгы баса белгиленди.

Премьер-министр Мухаммедкалый Абылгазиев Жогорку Кеңеш экономикалык долбоорлорду ишке ашырууга жана социалдык-экономикалык өнүгүүгө багытталган мыйзам демилгелеринин бардык пакетин колдоп бергенин билдирди. Президент  көңүл бурган багыттардын бардыгын ишке ашыруу катуу көзөмөлгө алынаарын белгиледи.

 
Categories

Атамбаевдин банкта 30 миң доллары болгон

Мурдагы президент Алмазбек Атамбаев Кой-Ташта кол тийбестигинин алынышы боюнча алгачкы жолу журналисттердин суроолоруна жооп берди.

-Мен чынымды айтайын. Менин банкта 33 миң долларым бар болчу. Анын 30 миңин банктагы эсептерди тоңдурганга чейин алып койгом. Келинчегимдин эсебин камакка алып коюшуптур.Анын Бакиевдин тушунда эле млн. доллары бар болчу.

Андан соң Атамбаев бийликтин мындай кадамга барышын кышында эле билгенин, бул тууралу жакын санаалаштарына алдын ала айтканын, саясатта тажрыйбасы арбындыгынан мындай артыкчылыгы бар экенине токтолду.

Эске сала кетсек, ал эми башкы прокурор Жамшитов  буга чейин  Жогорку Кеңеште маалымат берип жатып, Атамбаевдин банктагы эсептери камакка алынбаганын айткан болчу.

 
Categories

Парламенттик журналисттер клубу түзүлдү

22-23-июнда Ысык-Көлдө отузга жакын жалпыга маалымдоо каражаттарынын өкүлдөрү катышкан жыйын болуп өттү. Анда Парламенттик журналисттер клубун түзүү жөнүндө чечим кабыл алынды. Бул тууралуу Жогорку Кеңештин Басма сөз кызматы билдирди.

Парламенттик журналисттер клубу (ПЖК) ЖКтин Басма сөз кызматынын демилгеси менен ЖКтин Коммуникациялык стратегиясынын алкагында түзүлдү. Уюмга адегенде жыйырмадан ашуун кабарчы мүчөлүккө кирди.   Жогорку Кеңештин Басма сөз кызматынын жетекчиси Ибраим Нуракун уулунун айтымында, бул клубдун негизги максаты Жогорку Кеңештин ишинде ачык-айкындуулукту камсыздоо, аккредитациядан өткөн жана ЖКнын ишин активдүү чагылдырган кабарчыларга тренингдерди өткөрүү.

Ибраим Нуракун уулу: “Клубга позиция-оппозиция дебестен, баардык ЖМК өкүлдөрү кошула алат. Биз аларга эл аралык өнөктөштөрүбүздүн колдоосу менен парламенттик демократияны өнүктүрүү боюнча эң мыкты адистерди тартып, окууларды өткөрмөкчүбүз” – деди.

 
Categories

Президент Сооронбай Жээнбеков: Кыргызстан балдардын өлүмүн үчтөн экиге кыскартууга жетишкен 62 мамлекеттин бири

«Балдардын гармониялуу өнүгүүсү —  мамлекеттин артыкчылыктуу багыты бойдон калат», — деп баса белгиледи Президент Сооронбай Жээнбеков бүгүн, 25-июнда, Баланын укугу жөнүндө БУУнун конвенциясынын кабыл алынгандыгынын 30 жылдыгына жана Кыргызcтандын бул Конвенцияга кошулганынын 25 жылдыгына арналган Улуттук форумда.

Президент Сооронбай Жээнбеков: «Урматтуу Улуттук форумдун катышуучулары! Урматтуу  Рената Винтер айым! Урматтуу коноктор!

Кыргызстандын балдарды коргоо боюнча азыркы учурдагы көрсөткүчтөрү да жаман эмес. Бириккен Улуттар Уюму белгилеген — Миӊ жылдыктын өнүгүү максаттарынын бири —  балдардын өлүмүн үчтөн экиге кыскартууга жетишкен 62 мамлекеттин бири. Кичинекей балдардын өнүгүү көрсөткүчү 72 пайыздан ашты. Мектепке чейин, 5 жаштан ылдый окутулуп жаткан балдардын саны 64 пайызды түздү. Мектепке кирүү алдындагы билим 91 пайыз балдар үчүн жеткиликтүү болуп калды.  Биздин өлкөдө балдардын укуктук негиздери жетиштүү деӊгээлде камсыз болгон“,-деди.

Андан соң өлкө башчысы 2006-жылы Кыргызстан Борбордук Азия мамлекеттеринин ичинен биринчилерден болуп балдар жөнүндө кодексти кабыл алгандыгына, Кодекс балдардын укугун бекемдеп, балдарды коргоого мүмкүнчүлүк берген принциптерди жана механизмдерди түзгөндүгүнө токтолду.

 
Categories

Президент Сооронбай Жээнбеков учкуч-космонавт Салижан Шарипов менен жолугушту

Президент Сооронбай Жээнбеков бүгүн, 18-июнда учкуч-космонавт, Кыргыз Республикасынын Баатыры, өлкөнүн Ош областында туулуп-өскөн Салижан Шариповду кабыл алды. Бул тууралуу өлкөнүн маалымат кызматы билдирди.

Мамлекет башчысы Кыргызстанга өз кичи Мекенине келген Салижан Шарипов менен жылуу учурашты. Ал Кыргызстан космосту багындырган атактуу мекендешин ар дайым кубаныч менен тосуп алууга даяр экенин белгиледи.

Космонавт-учкуч Салижан Шарипов жылуу кабыл алуу үчүн ыраазычылык билдирип, Кыргызстандын ар тараптуу өнүгүүсүнө болгон жардамын берүүгө даяр экенин билдирди.

 
Categories

Кыргызстанда ар бир үчүнчү бала кедей турмушта жашайт

Улуттук статистика комитетинин маалыматтарына ылайык, өлкөнүн калкынын 38 %ын балдар жана өспүрүмдөр түзөт. Бирок 32%ы же 787 000 бала Кыргызстанда кедейликте жашайт жана өсөт, алардын ичинен 200 000ге жакын бала кедейликтен башы чыкпай келет.  Учурда Жогорку Кеңеш, БУУнун Балдар фонду (ЮНИСЕФ) жана «Роза Отунбаеванын демилгеси» Эл аралык Коомдук фонду балдарга инвестициялоонун келечектерин талкуулоо боюнча ачык диалог өткөрүп жатат.

Кыргызстандык балдардын экинчи мууну кедейликте өсүп жатат, бул алардын интеллектуалдык жана денебой жактан өнүгүшүнө таасир этүүдө. Балдардын 12%ынын бою жапыз (2018), булар 80 000ге жакын бала. Бойдун жапыздыгы тамакты тое жебегендиктин жана өнөкөт кедейликтин тикелей белгисинен тышкары, когнитивдик өнүгүү 2-3 жылга создугушунун кыйыр белгиси болуп саналат. Интеллектуалдык өнүгүүдө көптөгөн кечигүүлөр жаш өткөн сайын жана детекция тутуму жок болгон учурда кийин социалдык өзгөчөлүгү болушу менен майыптыкка айланат. Кедейлик ден соолуктун начардыгы жана сабактагы жетишүүсүнүн начардыгы, өзүнө ойдогудай баа бере албагандыгы жана татыктуу эмгекке мүмкүнчүлүктүн аздыгы менен байланышкан.

Роза Отунбаева: «Биз азырынча региондогу аз сандагы «жаш» өлкөлөрдүн бири болуп саналабыз, анын экономикалык өсүш үчүн «мүмкүнчүлүктөрдүн демографиялык терезесин» ишке ашыруу керек. Ошондуктан бизде эбегейсиз жоопкерчилик жана балдар жаңы көйгөйлөргө жана эртеңки күндө өз учурундагы эмгек рыногунун керектөөлөрүнө даяр болушу үчүн бүгүнкү күндөн тартып аларга өз учурунда жана адекваттуу инвестициялоо аркылуу ушул  демографиялык дивидендди экономикалык дивидендге айландыруунун маанилүү миссиясы турат» – деди.

 
Categories

Президент Сооронбай Жээнбеков Энелер күнүнө карата көп балалуу энелерге мамлекеттик сыйлыктарды тапшырды

Президент  Сооронбай Жээнбеков бүгүн, 18-майда Энелер күнүнө карата өлкөнүн бардык аймактарынын келген көп балалуу энелер менен жолугушту.Бул Өлкө башчысынын маалымат кызматы билдирди.  Ошондой эле жолугушууга Кыргызстанды эл аралык аренада татыктуу тааныткан кыргызстандык жаштардын апалары дагы катышты.

Мамлекет башчысы көп балалуу энелерди «Баатыр Эне» ордени менен сыйлап, ийгиликтүү жаш кыргызстандыктардын энелерине ыраазычылык каттарды тапшырды.

Сооронбай Жээнбеков: Эненин сүтүн актаган адам гана бейишке кирет. Биздин улуу жазуучубуз Чыңгыз Айтматов айткан: «Мен бул дүйнөдө кандай бийиктикке жетсем, ал ийгилигиме энемдин салымы чоң», деп. Чындыгында Эненин орду коомубузда эбегейсиз зор. Эне — бул жашоонун символу. Эненин мээримине бөлөнүп чоңойгон, эненин таалим-тарбиясын көргөн балдар эч качан жаман жолго барбайт. Мына ушундай балдар гана биздин мамлекеттин келечеги болот. Биздин негизги максат — энелердин социалдык кадыр-баркын эң бийик деңгээлге көтөрүү», — деди.

Ал өлкөнүн бардык аймактарынан жолугушууга келген ар бир эненин ысмын ыраазычылык менен атап, өзгөчө кароосуз калган 128 баланы тарбиялаган жана учурда 18 баланы тарбиялап жаткан Наталья Аслаповскаяны, азия жана дүйнөлүк чемпионаттарда байгелүү орундарга ээ болгон жаш спортчулар Жоламан Шаршенбеков жана Эрбол Бакировдун апалары Гүлнар Жумалиева жана Айнура Турабаеваны белгиледи.

 
Categories

Президент Сооронбай Жээнбеков Башкы прокурор Ө. Жамшитовду кабыл алды

Президент Сооронбай Жээнбеков бүгүн, 13-майда өлкөнүн Башкы прокурору Өткүрбек Жамшитовду кабыл алды. Бул тууралуу өлкө башчысынын маалымат кызматы билдирди.

Кабыл алууда мамлекеттик органдарда жана укук коргоо тутумдарында мыйзамдардын сакталышын көзөмөлдөө боюнча 2018-жылы жана 2019-жылдын 1-кварталындагы прокуратура органдарынын күндөлүк ишмердиги жөнүндө маселелер талкууланды.

Башкы прокурор Өткүрбек Жамшитов Кыргыз Республикасынын Коопсуздук кеңешинин 2018-жылдын 8-февралындагы жана 2019-жылдын 30-январындагы чечимдерин аткаруу, Кыргыз Республикасынын Президентине караштуу Сот реформасы боюнча Кеңештин 2018-жылдын 17-майындагы жана 27-декабрындагы чечимдерин жана  “Сот реформасын жүргүзүүнүн алкагында көрүлүп жаткан айрым чаралар жөнүндө” Кыргыз Республикасынын Президентинин 2018-жылдын 22-майындагы Жарлыгын ишке ашыруу боюнча маалымат берди.

Президент Сооронбай Жээнбеков мындан ары да мыйзамдардын сакталышына көзөмөлдү күчөтүүнү ошондой эле жаңы жазык-укуктук мыйзамдарда көрсөтүлгөн чараларды толук көлөмдө ишке ашыруу маанилүү экенин белгиледи.

 
Categories

Президент Сооронбай Жээнбеков ардагерлер Усубакун Байсалов жана Алексей Варавинге барды

Президент Сооронбай Жээнбеков бүгүн, 8-майда, Жеңиш күнүнө утурлай Улуу Ата Мекендик согуштун ардагерлери Усубакун Байсаловго жана Алексей Варавинге барды. Бул тууралуу өлкө башчысынын маалымат кызматы билдирди.

Мамлекет башчысы ар бир ардагердин үйүнө барып, алар менен жылуу баарлашты. Ардагерлер согуш жылдары жана өзүнүн турмуштук жолу тууралуу айтып беришти. Усубакун Байсаловдун айтымында, ал аскерге 18 жашында чакырылып, согуш бүткүчөктү связист болуп кызмат өтөгөн, эки жолу жарадар болгон, 2-топтогу майып. Жеңишти Польшадан тоскон. Мекенине 1946-жылы кайтып келгенден бери билим берүү жаатында мектеп директору, элдик билим берүүнүн райондук бөлүмүнүн жетекчиси болуп эмгектенген. 95 жаштагы Усубакун Байсаловдун 8 уул-кыздары, небере, чөбөрө, кыбыралары бар.

98 жаштагы Алексей Варавин 1942-жылы Воронеж фронтуна жөнөтүлгөн. Ал артиллериялык полктун курамында согушуп, жарадар болуп, дарылангандан кийин 1944-жылы Звенигород танк дивизиясынын мина ыргыткыч кызыл туу полкуна которулуп, ал жакта согуштун аягына чейин кызмат өтөгөн. Улуу Ата Мекендик согуш жылдарында күжүрмөн эмгеги үчүн «Кызыл жылдыз» ордени жана «1941–1945-жылдардагы Улуу Ата Мекендик согушта Германиянын үстүнөн жеӊиш үчүн» медалы менен сыйланган. Согуштан кийин музыкалык мектепте аскердик-дене тарбия даярдыгы мугалими, Украин ССРи жана Кыргыз ССРинде мамлекеттик коопсуздук органдарында эмгектенген.

Президент Сооронбай Жээнбеков эркиндик жана тынчтык үчүн күрөшкөн Улуу Ата Мекендик согуштун ардагерлеринин турмуштук жолу, каармандыгы жана эрдиги кийинки муундар үчүн үлгү экендигин белгиледи.

Сооронбай Жээнбеков: «Улуу Ата Мекендик согуш жылдарындагы Сиздердин эрдигиңер, согуш бүткөндөн кийин өлкөнү калыбына келтирүү боюнча күжүрмөн эмгегиңер мамлекеттин андан аркы өнүгүүсү жана бекемдөөсүнө негиз болуп берди. Биз эч качан ардагерлерибиздин каармандыгын жана Ата Мекенге өтөгөн кызматын унутпайбыз. Эртең, 9-майда, мен жылдагыдай „Өлбөс  полктун“ жүрүшүнө катышам. „Өлбөс полк“ — бул биз үчүн, Мекен үчүн жана адамзаттын келечеги үчүн өмүрүн бергендерди түбөлүккө эскерүү», — деди.

Мамлекет башчысы ардагерлерге Улуу Ата Мекендик согуштагы Жеңиш майрамына карата символикалуу белектерди берди. Усубакун Байсалов Президентке өзүнүн турмуштук жолу жөнүндө жазган китебин тартуулады.

 
Categories

Президент Сооронбай Жээнбеков Апрель революциясында курман болгондордун туугандары менен жолугушту

Президент Сооронбай Жээнбеков бүгүн коомдук уюмдардын 2010-жылдагы Элдик Апрель революциясына катышкан өкүлдөрү, жабыр тарткандардын жана курман болгондордун туугандары менен жолугушту.

Мамлекет башчысы 2010-жылдагы Элдик Апрель революциясы элдин эркиндикке умтулуусун жана үй-бүлөлүк башкарууга каршы күрөшүүдөгү майтарылбас эркин, өлкөнүн жаркын келечеги үчүн өмүрүн курмандыкка чалууга даяр экенин көрсөткөн тарыхый окуя экенин белгиледи.

Сооронбай Жээнбеков: «Кайгылуу окуялардын учурунда курман болгондордун ысымдарын жана жаркын элестерин түбөлүккө калтыруу максатында 2020-жылы Элдик Апрель революциясынын 10 жылдык мааракесин өткөрүү жөнүндө» тийиштүү Жарлык даярдалууда. Уюштуруу комитети түзүлүп, даярдык иштери башталат», — деп баса белгиледи.

Жолугушуунун катышуучулары Апрель революциясынын 10 жылдык мааракесин улуттук деңгээлде өткөрүү боюнча Жарлыктын концепциясын колдошуп, өз сунуштарын жана пикирлерин айтышты жана аны ишке ашырууда бардык жардамдарын бере турганын белгилешти.

Ошондой эле алар бул сыяктуу окуялар Кыргызстанда экинчи кайталанбай, өлкөгө тынчтык, туруктуулук жана ынтымак керек экенин баса белгилешти.

Андан тышкары, жолугушуунун катышуучулары социалдык-экономикалык маселелерге, маданият жана спортту өнүктүрүүгө, аймактарды өнүктүрүүгө, өлкөнү санариптештирүүгө, сот реформасын жүргүзүүгө, коррупцияга каршы күрөшкө байланыштуу каалоо-тилектерин жана өтүнүчтөрүн айтышып, Президент Сооронбай Жээнбековдун Кыргызстандын өнүгүүсүнө жана мамлекеттүүлүктү, элдин биримдигин бекемдөөгө багытталган саясатын ар тараптан колдой тургандыктарын баса белгилешти.

Жолугушууга «Мекен Шейиттери», «Эр Теги», «Баатырларга таазим», «Жаркын Элес», «Апрель Баатырлары», «Айкөл Ала-Тоо», «Апрель. Элим. Кыргызстан», «Айкөл Таза Коом», «Апрель Баатырлар Биримдиги», «Апрель байрагы», «Элдик сакчы», «Элдик кайрат», «Мекен үчүн», «Орток шамы» коомдук уюмдарынын, «Патриот» элдик кошуундар кыймылынын өкүлдөрү, КР биринчи вице-премьер-министри Кубатбек Боронов, Президенттин Аппаратынын Жетекчисинин биринчи орун басары Алмаз Кененбаев катышты.