Categories

КУРСАН АСАНОВ КАМАККА АЛЫНДЫ

Ички иштер министринин мурдагы орун басары Курсан Асанов кармалды. Бул тууралуу ИИМдин маалымат кызматы билдирди. Маалыматка ылайык, Ички иштер министрлигинин Тергөө кызматы Кылмыштардын жана жоруктардын бирдиктүү реестрине катталган Жазык кодексинин 309-беренесинде көрсөтүлгөн кылмыштын курамы боюнча жаңы сотко чейинки өндүрүштү баштады.

Сотко чейинки өндүрүштүн алкагында тергөө Ички иштер министринин мурдагы орун басары Курсан Асанов башка адамдар менен алдын ала сүйлөшүү жолу менен бийликти күч менен басып алууга даярданып жана уюштуруп жүргөндүгү аныкталган.

Ушуга байланыштуу Асанов шектүү катары кармалып, Бишкек шаардык ички иштер башкы башкармалыгынын убактылуу кармоочу жайына киргизилди. Эске салсак, Курсан Асанов өткөн жылдын 5-6-октябрындагы окуяларда Ички иштер министрлигин басып алууга айыпталып, 26-январда камакка алынган.

Ага Жазык кодексинин 245-беренесинин 1-бөлүгү – «имараттарды жана курулуштарды басып алуу» менен айып тагылган. 12-апрелде Бишкек шаардык сотунда баш коргоо чарасы өзгөртүлүп, үй камагына чыгарылган.

 
Categories

АБАКТАН КАЧУУГА АРАКЕТ КЫЛГАНДАРДЫН БИРӨӨ КАЗА БОЛДУ

Чүй облусунун Молдовановка айылында жайгашкан Жаза аткаруу боюнча мамлекеттик кызматка караштуу №27 колониядан качууга аракет кылган эки адамдын бирөө өлтүрүлдү. Бул тууралуу аталган кызматтын басма сөз катчысы Элеонора Сабатарова кабарлады.

25-майдан 26-майга караган түнү абакта жаза мөөнөтүн өтөп жаткан 1963-жылы жана 1999-жылы туулган жарандар тосмодон секирип, качууга аракет кылышкан. Колонияны кайтарган аскер кызматкерлери алгач абага ок аткан.

Кийин ок атуу уланып, качып бараткандардын бирөө каза болуп, экинчиси кармалган. Экөө тең адам өлтүрүү, жашы жете электерди зордуктоо боюнча оор кылмышка айыпталып, он жылдан 21 жылга чейин мөөнөткө камалгандар болгон.

Ыкчам тергөө тобу качууга аракет кылган учурду иликтей баштады. Окуя кылмыш жана жазалардын бирдиктүү реестрине катталды.

 
Categories

М.КАЗАКПАЕВ 14-ИЮНГА ЧЕЙИН КАМАККА АЛЫНДЫ

Мамлекетке чыккынчылык кылууга шектелип жаткан Марат Казакпаев 14-июнга чейин камакка алынды. Мындай чечимди Бишкектин Биринчи май райондук соту 14-апрелде кабыл алды. Соттун басма сөз кызматы кабарлагандай, шектүү Улуттук коопсуздук боюнча мамлекеттик комитеттин тергөө камак жайына киргизилди.

Мындан тышкары, мамлекеттик чыккынчылыкка айыпталган дагы бир шектүү Т.М.А. аттуу жаран 13-июнга чейин камакка алынды. Анын бөгөт чарасы да 14-апрелде аныкталды. УКМК мамлекетке чыккынчылык кылууга шектүү катары эки адам кармалганын 13-апрелде кабарлаган.

Кийин шектүүлөрдүн бири Марат Казакпаев экени расмий кабарланган. УКМК мыйзамдарда бул кылмышты жасагандыгы үчүн 10 жылга эркинен ажыратуу түрүндө кылмыш жоопкерчилиги каралгандыгын белгилейт.

 
Categories

ЖУМАЛИЕВ 14-АПРЕЛГЕ ЧЕЙИН КАМАКТА КАЛТЫРЫЛДЫ

Тергөө абагында жаткан Жогорку Кеңештин депутаты Кубанычбек Жумалиев 14-апрелге чейин камакта калтырылды. Мындай чечимди Бишкек шаарынын Биринчи май райондук соту 31-мартта кабыл алды.

Жумалиевге карата тандалган баш коргоо чарасынын мөөнөтү узартылды. Кубанычбек Жумалиев УКМК тарабынан коррупцияга шектелип кармалган. Атайын кызматтын маалыматына караганда, Жумалиевге таандык Эл аралык медициналык университетке лицензия берүүдө коррупциялык схема аныкталган.

Мындан тышкары, Жумалиевге байланыштуу адамдар тарабынан кылмыштуу кирешелерди легалдаштыруу жана салык төлөөдөн баш тартуу, мыйзамсыз баюу фактылары аныкталган. 4-февралда сотко чейинки өндүрүштүн алкагында Жумалиевге Кылмыш-жаза кодексинин 319-беренесинин 1-бөлүмү – «коррупция» менен иш ачылган.

 
Categories

КАМАКТАГЫ ДЕПУТАТ ПАРЛАМЕНТКЕ КЕЛДИ

Жогорку Кеңештин коррупцияга шектелип кармалган депутаты Дүйшөн Төрөкулов парламенттин бүгүнкү, 11-марттагы жыйынына катышууда. Ал Биринчи Май райондук сотунун чечими менен кечээ, 10-мартта үй камагына чыкканын журналисттерге айтып берди.

Дүйшөн Төрөкулов коррупцияга шек саналып 15-январда кармалган. Сот анын бөгөт чарасын карап, эки айга камакка алган. Депутат Улуттук коопсуздук боюнча мамлекеттик комитеттин тергөө абагында отурган. Ал абактан боштулганы тууралуу расмий маалымат бериле элек болчу.

 
Categories

Ж. АТАМБАЕВ ҮЙ КАМАГЫНА ЧЫГАРЫЛДЫ

Мыйзамсыз баюуга шектүү катары кармалган милициянын отставкадагы полковниги Жалил Атамбаев үй камагына чыгарылды. Бул тууралуу Улуттук коопсуздук комитети 5-мартта билдирди. Маалыматка караганда, анын бөгөт чарасын Бишкектин Биринчи май райондук соту 4-мартта карады.

Атамбаев жана анын адвокаттары тергөө менен кызматташууга, айтылган зыянды республиканын бюджетине төлөп берүүгө даяр экени тууралуу өтүнүч келтиришкен. Сот муну эске алуу менен аны үй камагына бошотту.

УКМК Атамбаев депозиттик эсепке 50,5 миллион сомдон ашык акча которгонун, калган 50 миллион сомду ушул айдын аягына чейин төлөп берүүгө милдеттендирилгенин кошумчалады. Маалыматты райондук соттун басма сөз кызматы да ырастады.

Жалил Атамбаев 4-мартта кармалып, УКМКнын убактылуу кармоочу жайына киргизилген. Ал ички иштер органдарынын кызматкери болуп иштегенде мыйзамсыз ишкердик менен алектенип, жалпы суммасы 100 миллион сомдон ашуун кыймылсыз мүлк алганын, аны жакын туугандарына каттап койгону аныкталганын атайын кызмат билдирген.

 
Categories

«ЖЕНГО» АТАЙЫН КЫЗМАТКА ӨЗҮ БАРДЫ

«Женго» каймана аты бар уюшкан кылмуштуу топтун мүчөсү Кадыр Досонов УКМКнын Оштогу башкармалыгына өзү барды. Бул тууралуу Досоновдун адвокаты Назгүл Сүйүнбаева билдирди. Анын айтымында, Досоновду убактылуу кармоочу жайга киргизишкен. Сот бүгүн анын баш коргоо чарасын карамакчы. Маалыматка ылайык, Кадыр Досонов жер тилкесин мыйзамсыз басып алуу боюнча суракка чакырылган. Анткени анын мурунку жубайына тийиштүү үй кошунасынын жер тилкеси тарапка мыйзамсыз кирип кеткен деп айтылууда.

Белгилей кетсек, кечээ УКМК билдирүү таратып, Кадыр Досоновго 2020-жылдын ноябрында издөө жарыялаганын айткан. Кримтөбөл «Женго» Ошто милиция Толкунбек Шоноевдин өлүмүнө шектелип 2017-жылы кармалган. Бирок былтыр эркиндикке чыккан болчу.

 
Categories

САЙПИДИНОВ ҮЙ КАМАГЫНА ЧЫКТЫ

Ош шаардык соту 13-январда Кара-Суу районундагы Савай айыл өкмөтүнүн башчысы Мунарбек Сайпидиновдун бөгөт чарасын жабык карап, аны үй камагына чыгарды. «Азырынча шек гана, расмий түрдө айып коюла элек. Алдыда дагы эки айлык тергөө бар», – деди жактоочусу Динара Турдумаматова. Мунарбек Сайпидинов Жазык кодексинин 320-беренеси («Кызмат абалынан кыянаттык менен пайдалануу») менен сотко чейинки башталган териштирүү ишинин алкагында 11-январда кармалганын УКМКнын басма сөз кызматы кабарлаган. Расмий маалыматка ылайык, Савай айылындагы орто мектептин спорт залынын курулушунун суммасы 1 млн. сомдон ашуун акчага ашыра бааланган жана Сайпидинов башка жооптуу жетекчилер менен кошо спорт залды сапатсыз бүтүрүлгөнүнө карабай, кабыл алган. УКМК ошондой эле Ош шаарындагы жана Ош облусунун аймагындагы түрдүү кылмыштарды жасаган уюшкан топту түзүү фактысы боюнча сотко чейинки териштирүүдө да Сайпидинов күбө катары өтүп келе жатканын билдирген.

 
Categories

ТАИРОВ 2-ФЕВРАЛГА ЧЕЙИН КАМАЛДЫ

Экономикалык кылмыштарга каршы күрөшүү мамлекеттик кызматынын мурдагы төрагасы Бакир Таиров 2021-жылдын 2-февралына чейин камакка алынды. Маалыматтарга караганда, анын баш коргоо чарасы 11-декабрда аныкталды. Улуттук коопсуздук мамлекеттик комитетинин маалыматы боюнча, мамлекеттик органдардын биринин жетекчисинен өзгөчө ири өлчөмдө акча каражаты келип түшкөн факты аныкталган. Сотко чейинки өндүрүштүн алкагында быйыл октябрь айында өткөн парламенттик шайлоо алдында Финполдун мурдагы жетекчиси саясий партияны каржылоо керек деген шылтоо менен мамлекеттик орган жетекчилеринин бирин ири суммадагы акча которууга мажбурлаган. 10-декабрда Жазык-процесстик кодексинин 98-беренесинин негизинде кармалып, Улуттук коопсуздук мамлекеттик комитетинин убактылуу кармоочу жайына киргизилген.

 
Categories

ИРСАЛИЕВ ЭКИ АЙГА КАМАЛДЫ

Бишкектин Биринчи Май райондук сотунун чечими менен Социалдык фонддун төрагасы Медер Ирсалиев эки айга камалды. Бул тууралуу Жогорку соттун басма сөз кызматы кабарлады. Мекеменин маалыматына караганда, ал Улуттук коопсуздук боюнча мамлекеттик комитеттин тергөө абагында 17-январга чейин кармалат. УКМК 19-ноябрда расмий маалымат таратып, «Соцфонддун кызмат адамдарынын тобу материалдык жана башка артыкчылыктарга мыйзамсыз ээ болуу максатында мекеменин аймактык бөлүмдөрүнүн башчыларынан системалуу түрдө мажбурлап акча чогултуп турушкан» деп билдирген. Атайын кызмат сотко чейинки териштирүү жүргүзүп, Ирсалиевдин акча талап кылууга катышы тууралуу төгүндөлгүс маалыматы бар экенин жарыялаган. Чогулган материалдардын негизинде ал 18-ноябрда Жазык-процесстик кодекстин 98-беренесинин негизинде кармалып, УКМКнын убактылуу кармоочу жайына 48 саатка отургузулган. Бөгөт чарасы сотто 20-ноябрда аныкталды.