Categories

Май айында аба ырайы кандай болот? ӨКМдин божомолу

Өзгөчө кырдаалдар министрлиги Кыргызстандын аймагында май айында күтүлгөн аба ырайы жана жаан-чачындын көлөмүнүн божомолун жарыялады.

Ага ылайык, келерки айда абанын табы түнкүсүн 6…11° жылуулуктан 12…17° жылуулукка чейин, күндүз 18…23° жылуулуктан 25…30° жылуулукка чейин болушу күтүлөт.

 Чүй облусу

Абанын айлык орточо температурасы климаттык нормадан 1…2º жогору болуп, 15…28° жылуу болот. Жаан-чачын нормадан азыраак жаашы мүмкүн.

Талас облусу

Абанын айлык орточо температурасы климаттык нормадан 1…2º жогору болуп, 14…29° жылуулукка чейин өзгөрүлүп турушу күтүлөт. Жаан-чачын нормадан аз болушу мүмкүн.

Ош, Жалал-Абад, Баткен облустарында

Бул чөлкөмдө айлык температура нормага жакын болуп 17…19°, тоо этектериндеги райондордо 14…16° жылуу болушу күтүлөт.

Ай ичинде абанын температурасы түнкүсүн 6…11° жылуулуктан12…17° жылуулукка чейин, күндүз 19…24° жылуулуктан 26…31° жылуулукка чейин өзгөрүлүп турушу күтүлөт.

Жаан-чачындын айлык көлөмү өрөөндөрдө нормага жакын, тоо этектериндеги райондордо нормадан арбын болушу күтүлөт.

Ысык-Көл облусу

Орточо температура климаттык нормага жакын болуп,  11…13° жылуу болушу күтүлөт. Абанын күндүзгү температурасы 9…14° жылуулуктан 16…21° жылуулукка чейин өзгөрүлүп турушу мүмкүн. Жаан-чачындын айлык көлөмү нормага жакын болушу күтүлөт.

Нарын облусу

Абанын орточо табы 11…13º жылуу болушу болжонууда. күтүлөт. Кээ бир күндөрдө түнкүсүн жана эртең менен Ат-Башы районунда 0…-2° жеткен үшүк жүрүшү мүмкүн. Абанын күндүзгү температурасы 13…18° жылуулуктан 21…26° жылуулукка чейин өзгөрүлүп турушу күтүлөт. Жаан-чачын аз жаайт.

Алай өрөөнү

Абанын айлык орточо температурасы 2…4º жылуу болушу күтүлөт. Ай ичинде абанын түнкү температурасы  0…-5° суук,  абанын күндүзгү температурасы  -2…7° жылуулуктан, 10…15º жылуулукка чейин өзгөрүлүп турушу күтүлөт. Жаан-чачын аз болушу мүмкүн.

Суусамыр өрөөнү 

Бул өрөөндө абанын табы 7…9° жылуу болушу күтүлөт. Абанын температурасы ай ичинде түнкүсүн 0…-5° сууктан, 1…6° жылуулукка чейин, күндүз 13…18° жылуулуктан 20…25° жылуулукка чейин өзгөрүлүп турушу күтүлөт. Жаан-чачын көбүрөөк жаашы күтүлүүдө.

 
Categories

КСДП Юстиция министрлигинин алдында акция өткөрөт

Экс-президент А. Атамбаев лидерлик кылган КСДП партиясынын саясий кеңешинин мүчөсү Адил Турдукулов Юстиция министрлигинин алдында «Адилетсиз министрлик» аталышындагы акция өткөрүшөрүн маалымдады. Акция 22-апрелде өтүп, ага жарандык активисттер, коомдук бирикмелердин өкүлдөрү катышмакчы.

Ал маалыматына караганда, өлкөдөгү мыйзамдуулукту  аталган министрлик сакташы керек эле. Тилекке каршы, Юстиция министрлиги мыйзамсыз иштерге жол берип жатат.

Эске сала кетсек, Юстиция министрлиги “КСДП Атамбаевсиз” кыймылынын лидери Сагынбек Абрахмановду партиянын лидери катары  расмий каттоодон өткөзгөн.

 
Categories

Төрт метр чыт (Аңгеме)

Үйлөнүп алдык. Айлык берген күнү атайы магазинге барып, Букешке арнап, роза гүлү бар көгүлтүр түстөгү 4 метр чыт сатып келдим. Келинчегим алып келген белегимдин жупунулугуна карабай мулуңдап сүйүнүп, чыттын бир учунан кармап, боюна ченеп көрдү да:

— Абдан сонун чыт экен. Эртең көйнөк тигип алам. Карасаң, кандай жарашыктуу,— деди жан-алы калбай.

— Кана,— деп бурула бергенимде, колумдагы авторучкамдан бир тамчы сыя чачырап кетип, жанагы чыттын кыргагына бармак басымдай көк-жашыл так болуп калды. — Каап, булгап койбодумбу…

— Ой, эчтеке эмес, бычканда эле бул жерин кесип таштайм,— деп Букеш дегеле кайгырган жок.

«Ана-мына» деп көйнөктү тиккенче Букештин «жеңеси келген жатыптыр» деген кабар угуп калдык. Эми эмне кылдык. Шаарда турабыз. Кызматка орношконума жарым жыл да боло элек. Букеш болсо, али окуусун бүтө элек. Алган айлыгымдын да бир тобун эңшерип салганбыз. Бирок жеңебизди түзүктөп күтпөсөк да болбойт.

— Билесиңби? — деди Букеш азыр эле таба койгон акылын ортого салып,— жеңем келсе колубуздан келишинче коноктойлу да, кетээринде мына бул чытты берели.

— Жупуну болуп калбас бекен?

— Жупуну болсо канттик? Тим эле келип-кетсе деле алыбызга жараша сыйыбызды көрмөк. Бирок жеңем куру келбейт. Демек, биз дагы бирдеке берип жөнөтүшүбүз керек.

— Мейлиң анда, өзүң эле билчи!

Ошентип, Букештин жеңеси келди. Букешке деп көйнөктүк 4 метр «креп-де-шин» алып келиптир. Жеңекелеп асты-үстүнө түшүп коноктогон болдук. Эртеси кетээринде 4 метр чытты алдына койсок, жеңеси:

— Тим эле койбойсуңар да. Мен чыт үчүн келиптирминби? — деп мурдун чүйрүдү.

— Жеңе, кечирип коюңуз, шарт ушундай болуп калды, аман болсок дагы сыйлашып аларбыз, капа болбой кетиңиз,— деп болбой атып, 4 метр чытты колуна карматып жөнөттүк.

Жеңеси бизге таарынгансып кетти. Көп узабай, эми менин жеңем бизди куттуктаганы келип калды. А да куру кол эмес, келиниме деп 4 метр «креп-жор-жет» алып келиптир. Муну да мурунку эле жеңебиздей коноктоп, кетээринде «баягы» Букештин жеңеси алып келген «креп-де-шинди» берип жөнөттүк. Менин жеңем кубанып кетти.

— Эми, Букеш жанагы жеңем алып келген кездемеден көйпөк тигип ал, өңү да түзүк экен,— дедим.

— Жо, тикпей калайын! — деп Букеш айтканыма көнгөн жок. — Али бизди куттуктап келе тургай тууган-уруктун чети оюла элек. Алардын ар бирине бирден көйнөк ала берсек, дайныбызды таппай калабыз. Андан көрө мына бул «креп-жор-жетти» «жүжүр» кылып коёлу.

— Эмне, эмне?

— Хм… «жүжүр» кылып коёлу дейм. Жанагинтип келип калгандарга «жүжүр» кездемени берип, алмаштыра беребиз.

— Ой, ырас айтасың?

Букештин оюнун орундуу экенин, биздин үйдү эжебиз, жеңебиз, жеңебиздин сиңдиси, таажеңебиз, таажеңебиздин кудасы, анын келини дагы ушул сыяктуу «сыйлуу» коноктор сел жүргөндөй каптай баштаганда бир билдим.

Биздин үй өзүнчө бир мейманкана болуп калды. Кээде базарлап келгендер атайылап эле бизге келишпесе да, кечигип калышса дүкөндөн төрт метр кездеме ала коюп келип калышат, анткени, шаарда турабыз да. Жанагы төрт метр чыт: бирде 3 метр «креп-де-шин» болсо бирде 6 метр «шта-пельге» же 5 метр «атласка» айланып калат. Өзүбүз болсо товар алмашуунун кынуусун таап, бир конок алып келген кездемени эмки келчүсүнө арнап коёбуз.

Кээ бир коногубуз таарынып кетсе, кээси кубанып кетет же анын тескерисинче. Анткени бирөө — «креп-де-шин» алып келип, чыт алып кетип жатса, экинчиси — «штапель» алып келип «креп-жор-жетке» ээ болуп жатпайбы.

Биз аркылуу республиканын түштүгүндөгү менин туугандарым менен, түндүгүндөгү Букештин туугандары да таанышышып, катташышып, жанагы биздикиндей «товар алмашуунун» ыкмасын бизден да өркүндөтүп алышкан. Биздин үй болсо эки жактан келгендер үчүн — «автовокзал».

Жакында дагы бир жаңы конок келди.

— Баланча акеңиздин зайыбы, түкүнчө жеңеңиздин эжесинин кайынсиңдиси болом,— дегенде тааныбасам да: — Аа, амансыңарбы? Баланча акем күүлүбү? — деп бабырап-сабырап үйгө киргиздим.

Чай ичип отурганыбызда келинчегим эле ымдап сырткы үйгө чакырат. «Эмне болду экен»,— деп чыгып келсем, жанагы коногубуздун бизге деп алып келген кездемесин колуна кармап алып боору эзилгенче күлүп жатыптыр.

— Тааныдыңбы?

— Эмнени?

— Жакшылап карачы…

— Э-эй, ошобу?

— Ошол.

Баягы биздин, кыргагына сыя тамган, роза гүлү бар, көгүлтүр түстөгү 4 метр чытыбыз. Колдон-колго өткөндүгүнөнбү, айтор, өңүнөн азып кирдебирээк калганына карабастан, баягы биздин чыт экенин жазбай тааныдык.

Байкуш чыт! Туптуура бир жылдан кийин өзүнүн алгачкы ээлерин издеп келгенин карасаң! Бул чыт канча кишини таарынтып, канча кишинин көңүлүн алып, канча кишинин колунан өттү экен? Биз, Букеш экөөбүз, чытка ыраазыбыз, анткени, бир жыл бою «жүжүр» болуп, келген конокторубузду күзөтүп, «саякаттап» жүрүп акыры өзүбүзгө кайра келбедиби. Эми Букеш мындай «малтабар» чытты колдон чыгарбай, жакшылап жууп туруп, көйнөк тигип алат.

КРнын Эл артисти Дооронбек Садырбаев

 
Categories

Кыргыз авиациялык институтуна жаңы директор шайланды

Улан Курманов И.Абраимов атындагы Кыргыз авиациялык институтуна директор болуп шайланды. Бул тууралуу Транспорт жана жолдор министрлигинин басма сөз кызматы билдирди.

Аталган кызмат орунга Курманов добуш берүүнүн жыйынтыгы менен дайындалган.  Директорлукка экинчи альтернативалуу талапкер катары Кыргыз-Орус Славян университетинин автоунаа транспорту кафедрасынын доценти Мирлан Алсеитов сунушталган.

Жетекчини шайлоо Кыргыз авиациялык институтунун жамаатынын добуш берүүсү аркылуу ишке ашырылды. Улан Курманов буга чейин аталган институтта директордун милдетин аткарып жаткан.

 
Categories

“Дарак ыры” тасмасы эл аралык кинофестивалда баш байге утту

“Дарак ыры” тасмасы Орусиянын  Самара шаарында  өткөн “Балдарга – кино” эл аралык кинофестивалда баш байге утту. Бул тууралуу Кыргызстандын Кинематографияны өнүктүрүү фонду билдирди.

Бул боюнча тасманын режиссеру Айбек Дайырбеков социалдык тармактагы баракчасында пикирин калтырып, тасма баардык курактагы адамдарга түшүнүктүү экенин белгилеген.

“Калыстар тобунда балдар да болгон. Балдар тасмага татыктуу баасын беришти”, – деп жазган режиссер.

Белгилей кетсек, учурда “Дарак ыры” тасмасы 18-26-апрель күндөрү Иранда өтүп жаткан “Фажр” эл аралык кинофестивалында көрсөтүлүүдө.

 
Categories

Кыргызстандык жаран чек арада жасалма паспорт менен кармалды

Чек арада кыргызстандык жаран жасалма паспорт менен кармалды. Бул тууралуу Мамлекеттик чек ара кызматынан билдирди.

Маалыматка ылайык, 19-апрель күнү “Токмок-унаа жолу” көзөмөл өткөрмө пунктунда 30 жаштагы Ш.У. аттуу адам жасалма документ менен Казакстанга өтүп кетип жатып кармалган.

Ал, паспорт көзөмөлүнөн өтүп жатып ID-card көрсөткөн. Бирок, документти текшерген чек арачылар ал жасалма экенин аныкташкан.

Кыргызстандык кармалып, тийиштүү документтер түзүлгөндөн кийин ал Улуттук коопсуздук мамлекеттик комитетинин аймактык кызматкерлерине өткөрүлүп берилген.

 
Categories

Бийлик курултайчыларга кулак түрдү

Президенттин Жогорку Кеңештеги өкүлү  Курманбек Дыйканбаевдин жетекчилиги астында Конституциянын элдик курултайларды өткөрүүгө болгон жарандардын укугу жөнүндө жоболорун ишке ашыруу боюнча жумушту топтун жыйыны болуп өттү.

Жыйында жумушчу топтун мүчөсү, «Кыргыз жолу» бириккен руханий коомунун терагасы Кадыр Кошалиев Курултай институтун түзүүнүн концептуалдык маселелери боюнча баяндама жасады. Ал Кыргызстандагы Курултай институтун түзүү жана мыйзамдык макамын аныктоо сунушу илимий-чыгармачыл интеллегенция тарабынан демилгеленгенин эске салды. Ошондой эле Курултай институтунун статусун аныктоо үчүн «Элдик курултай жөнүндөгү» мыйзам кабыл алуу зарылдыгын белгиледи.

Жыйында КР Юстиция министринин орун басары Максат Есеналиев Элдик Курултай жыйындарын өткөрүүнүн укуктук аспектилерине токтолду.

Максат Есеналиев:  «Элдик курултай жөнүндөгү» КР мыйзам долбоорун иштеп чыгуу үчүн анын концепциясын тактоо менен элдик курултайды чакыруунун жана уюштуруу, өткөрүү тартибинин мыйзамдык мехнизмдерин аныктоо — максатка ылайык« — деди.

Ал баса белгилегендей, Элдик курултайдын милдети эл менен бийликтин ортосундагы эки тараптуу байланыштарды жана пикир алмашууну орнотуу, ар түрдүү деңгээлдеги мамлекеттик органдарга чечимдерди кабыл алууда сунуштарды жана кеңеш берүү болуп саналат.

Талкуунун жыйынтыгында кийинки жыйында „Элдик курултай жөнүндөгү“ мыйзам долбоорун тийиштүү тараптардын катышуусунда талкууну улантуу чечими кабыл алынды.

 
Categories

П. Порошенко менен В. Зеленский бири – бирин мыскылдады

Украин президенттигине талапкерлер Петр Порошенко менен актер жана куудул Владимир Зеленскийдин дебаты  Киевдеги 70 миң кишилик “Олимпийский” стадионунда өттү.  Эки талапкердин кол кысышуусунан кийин эл күткөн дебат башталды.

Дебатта талапкерлер Украинанын келечеги, жасалган иштер, өздөрүнү программалары тууралуу сөз кылышып, жеке жоруктарына чейин түшүп кеткен учурлар болду.

В. Зеленский:  “Президент олигарх болбошу керек. Ал Украина элинин өкүлү болушу зарыл. Сиздин айланаңыздагылардын бирин да саясатта болтурбоо үчүн муштум түйүп, бекем турам. Сиз мени мүшөктөгү мышыксың дедиңиз. Кой терисин жамынган карышкырдан көрө мүшөктөгү мышык болгон артык”, – деген сыяктуу атаандашына багытталган катуу сөздөрү менен айырмаланды.

Петр Порошенко:  “Үйрөнгөнү отурдум деген учкучтун самолетуна түшмөк белеңиз? Эми гана окуп жаткан хирургдун бычагынын алдына жатмак белеңиз? Өлкөбүздү шылдың кылбаңыз.  Сиз украиндерди хохолдор, Украинаны сойку дедиңиз эле. Бир ирет Кадыровду таарынтып алып, дароо кечирим сурагансыз. А украиналыктардан качан кечирим сурайсыз?”-деди.

Ал эми эртең 21-апрелде президенттик шайлоонун экинчи айлампасы өтөт.

Эске сала кетсек, Петр Порошенко 53 жашта. Украинанын учурдагы президентти.

Актер жана куудул Владимир Зеленский 41 жашта.  Мамлекеттик кызматта иштеген эмес.

 
Categories

Ошто милиция күчөтүлгөн тартипте иштеп жатат

Ошто шаардык милиция коомдук коопсуздукту камсыз кылуу үчүн күчөтүлгөн тартиптеги кызмат өтөп жатат. Бул тууралуу Ош шаардык ички иштер башкармалыгынын коомчулук менен иштөө бөлүмүнүн башчысы Замир Сыдыков билдирди.

Анын айтымында, “Ош — Түрк дүйнөсүнүн маданий борбору” эл аралык салтанатын утурлай милиция күчөтүлгөн тартипте иштөөгө өткөн.

“Мындай чечим коомдук коопсуздукту камсыз кылуу максатында кабыл алынган. Шаардагы маданий иш-чаралар өтүүчү коомдук жайлар көзөмөлгө алынат. Мындан тышкары, Ош шаарынын тургундарына жана конокторуна салтанат күндөрү иш-чаралар өтүүчү аймактарга жакын жайгашкан айрым көчөлөр убактылуу жабыларын да эскертебиз”, — дейт Сыдыков.

Белгилей кетсек, бүгүн , 20-апрель күнү Ош шаарында «Ош — Түрк дүйнөсүнүн маданий борбору» эл аралык салтанатынын расмий ачылышы болуп жатат.

 
Categories

Түркияда кыргыз кыздарды сойкулукка мажбурлагандар кармалды

Түркиянын Анкара шаарында полиция кызматкерлери 13 чет элдик кызды сойкулукка мажбурлап жүргөн адамдарды кармады. Бул тууралуу haberler.com жазып чыкты.

Маалым болгондой, атайын операциянын негизинде шектүүлөр кармалып, жыйынтыгында 2 тапанча, 42 патрон, 17 телефон, планшет жана 10 миң 995 лира алынган.

Чет элдиктердин арасында 6 кыргызстандык, 4 өзбекстандык жана 3 казакстандык жаран болгон. Көрсөтмө берүү үчүн аларды полиция бөлүмүнө алып кетишкен.