Ошто 1-2-март күндөрү шаардын аймагын жакшыртуу, санитардык тазалыгын сактоо жана көрктөндүрүү максатында массалык ишембилик өтөт. Бул тууралуу шаардык мэриянын басма сөз кызматы кабарлады.
Маалым болгондой, ага мамлекеттик жана муниципалдык кызматкерлер, шаар тургундары, жаштар, студенттер катышат. Ошондой эле шаардын тазалыгына, таза жашоого салым кошом деген бардык жарандарды ишембиликке чакырат.
Бишкекте Аламүдүн дарыясынын жанындагы көпүрө тараптан эркек кишинин сөөгү табылды. Бул тууралуу Бишкек ШИИБден билдирди.
Кечээ, 27-февралда Свердлов райондук милициясына каза болгон киши тууралуу маалымат түшкөн.
Маркум 20-25 жаштагы азиат улутундагы жаран экени аныкталды. Тийиштүү экспертиза дайындалып, милиция тергөө амалдарын жүргүзүүдө.
Кыргызстандык балбан Акжол Махмудов тизесине операция жасатты. Ал өзүнүн Instagram баракчасына ооруканадагы жана алгачкы машыгууларынын сүрөт, видеолорун жүктөдү.
Эске салсак, февралдын башында Махмудов футбол учурунда бутунан жаракат алып, операция жасатуу керек экендиги, ал үчүн Германияга бара тургандыгы кабарланган.
Акжол Махмудов – чоңдор арасында Азия чемпиону жана Азия оюндарынын күмүш медаль ээси. Соңку ирет грек-рим күрөшү боюнча Кыргызстандын чемпионатына катышып баш байгени уткан.
Кыргызстанда медреседе окуган жаштарга кесип үйрөткөн социалдык долбоордун кезектеги этабы быйыл жаздан тарта ишке аша баштайт. Респубика аймагындагы медреселердин суроо-талабын, кайсы кесипти үйрөнүүгө маани беришерин анализдеп чыккандан кийин, быйылкы жылдын эсебинен тогуз медресе тандалып алынды. Мындай маалыматты муфтияттан кабарлашты.
Жыйынтыгында 300гө жакын уландар менен кыздар жаңы кесипке ээ болуп чыгышат. Бул тууралуу медреселерде окуган жаштарга кесип үйрөткөн “АВЕП” коомдук фондунун жетекчиси Нурлан Токонов маалымдады.
Долбоор Кыргызстандын бардык облустарын камтып, бир катар диний окуу жайлардын тарбиялануучулары ар кандай багыттар боюнча кесиптик билим алышат. Адистиктер “Ашпозчу-кондитер”, “Ширетүүчү”, “Электромонтажник, “Тикмечи”, “Тиричилик техникаларын оңдоочу адис”, “Эмерек жасоочу уста”, “Слесарь-сантехник” жана “Компьютердик сабаттуулукка үйрөтүүчү адис” багыттары боюнча үйрөтүлөт.
Долбоордун алгачкы этабы 2015-жылы башталып, “АВЕП” коомдук фонду жана Кыргызстан мусулмандар дин башкармалыгы алдында ишке ашырылган. Медреселерде окуган жаштарды кесипке үйрөткөн жабдуулар менен камсыздап, окутуп, үйрөтүүгө кеткен чыгымдарды (методикалык окуу куралдарын иштеп чыгуу, окута турган мугалим-адистерди тандоо, алардын айлык акысы жана башка шарттары) толугу менен грант катары берип, АКШнын Кыргызстандагы элчилиги каржылоодо. Былтыртан тарта долбоор Кыргызстандын бардык аймагын камтыган. Төрт жыл аралыгына “Медресе жаштарын кесипке үйрөтүү” долбоорунун алкагында 1184 окуучу кесип үйрөнүп чыкты. Алардын ичинде 499у кыздар болгон. “Мониторинг кылуунун жыйынтыгында бүтүрүүчүлөрдүн 60-65% пайызы туруктуу жумуш менен камсыз болуп, иштеп жатканы аныкталды.
Жүк жөнөтүүчүлөргө 2019-жылдын 1-майына чейинки мезгилге Кыргызстандын аймагы боюнча картошканы темир жол транспорту менен ташуу боюнча тарифтерге 60 пайыздык жеңилдик жана кошумча кызмат көрсөтүүлөргө 50 пайыздык жеңилдиктер берилди. Тиешелүү чечимге Премьер-министр Мухаммедкалый Абылгазиев кол койгондугун өкмөттүн маалыматтык камсыздоо бөлүмү билдирди. .
Бул чечим айыл чарба продукцияларынын экспортун илгерилетүү жана айыл чарба товар өндүрүүчүлөрүнө мамлекеттик колдоо көрсөтүү максатында кабыл алынды. Ошону менен бирге “Кыргыз темир жолу” улуттук компаниясы” мамлекеттик ишканасы:
– экспорттоого арналган картошканы жөнөтүү планынын көлөмүн жүк жөнөтүүчүлөрдүн табыштамаларынын негизинде түзүүгө;
– Кыргыз Республикасында жүктөө үчүн вагондорду өз убагында камсыздоо үчүн экспортко жиберилип жаткан картошканы вагондордон кечиктирбей түшүрүүнү камсыз кылуу боюнча чараларды көрүүгө тийиш.
Муну менен катар жүк алуучуларга жана жүк жөнөтүүчүлөргө жүк салуу максатында вагондорду өз убагында берүүнү камсыздоо үчүн вагондордон экспорттолуучу картошканы кечиктирбей түшүрүү сунушталды.
Илим Карыпбеков КТРКнын башкы директорлугунан талапкерлигин алып салды. Бул тууралуу ал өзүнүн соцтармактагы баракчасына жазып, бир катар адамдарга ыраазылыгын билдирди.
Карыпбековдун айтымында, адам бир жерде үч жылдан ашык жетекчи болбошу керек. Мындай чечимди да дал ушундай ой менен кабыл алганын, башка тараптардан басым-кысым болбогонун кошумчалады.
Никогда не скажу тебе – прощай, говорю до новых встреч КТРК…Ну, вот и закончилась моя миссия в КТРК. Из отведенных мне…
Опубликовано Ilim Karypbekov Четверг, 28 февраля 2019 г.
Борбор калаада бала сатууга шектелип отуз бир, элүү жана жыйырма алты жаштагы үч аял кармалды. Бул тууралуу шаардык милициядан билдирди.
Кечээ, 27-февралда Биринчи Май райондук милициясына белгисиз аял жаңы төрөлгөн баласын сатууга аракет кылып жаткандыгы тууралуу маалымат түшкөн.
Наристесин сатып жаткан аял 31 жаштагы келинге төрөт үйүнүн эки кызматери жардам берген. Алдын ала маалымат боюнча баланы 190 миң сомго баалашкан.
Укук коргоо органдары сатып алуучу катары барып, шектүүлөрдүн үчөөсүн тең жеринен кармаган.
Аталган окуя боюнча Жазыктар кодексинин 171-беренеси (“Адам сатуу”) менен кылмыш иши козголуп, шектелүүчүлөр убактылуу кармоо жайына киргизилди.
Бүгүн эрте менен Жогорку Кеңеш депутаттары тарабынан ар кандай маселелер айтылды.
Депутат Аида Касымалиева: “Чаткалда жер байлыктарын сатууда коррупциялык иш- аракеттер боюнча материалдар мага келди. 2017 – жылы 10 –апрелде 20 тонна кени бар Турпак – Түштү кенине аукцион өткөн. “Асман – Таш” компаниясы 200 миң долларга утуп алган. Чаар- Таш кенинде 10 тонна алтын запасы бар. Аны “Алтын- Жон” компаниясы 71 миң долларга уткан. Мындайчасын айтканда эки бөлмөлүү квартиранын акысына бааланып калган.
Жарым тонна алтыны бар Коргон- Төбө кенин 2013- жылы 513 миң долларга “Чаткал Голд” компаниясы уткан. Эмне үчүн мындай? Ошол жылдары коррупция болгон эмеспи? Андан кийин кени бар жерлер бара бара арзандаган.
Ошол эле учурда Чаткалга барганыбызда эл эч кандай аукциондорго катышпай жатканын айтышууда. Алардын колдору катышты болуп, жасалма түрдө коюлат.
Жакында өкмөт башчы бир нече акимдерди алмаштырды. Чаткал акими жакшы иштеп жатабы? Президент Коопсуздук кеңешинде кен байлыктары боюнча туура жана катуу айтты. Текшерүү дегенде акимдер өздөрүн текшерип жатат. Мындай болбойт. Бул иштерди текшерүү максатында ведомство аралык комиссия түзүлүүсү керек. Бул боюнча жоопту күтөм”-деди.
Өлкөдө үстүбүздөгү жылдын башынан бери жашы жете элек өспүрүмдөрдүн жоголушу боюнча 99 учур катталган.
ИИМдин маалымат кызматы билдиргендей, жоголгон балдардын 91 табылып, 8 жашы жете элек өспүрүмдү издөө уланууда.
Алардын мындай кадамдарга баруусунун себептери ата-энелери менен келишпестик болсо, айрымдары адашып кеткендиги такталган.
Милиция учурда жоголгон сегиз өспүрүмдү издеп жатат. Жалпысынан жоголгон 99 баланын 53ү эркек балдар, 46сы кыздар.
Бүгүн борборубуздагы Октябрь райондук сотунда саясатчылар Азимбек Бекназаровдун, Ахматбек Келдибековдун жана Кеңешбек Дүйшөбаевдин экс-президент Алмазбек Атамбаевге жана «Апрель» телеканалына каршы берген доо арызын кароо уланды. Сот ишине жогоруда белгиленген үч саясатчы тең катышышты.
Жыйынтыгында сот жабырлануучулар Азимбек Бекназаровдун, Кенешбек Дуйшебаевдин жана Ахматбек Келдибековдун талаптарын жарым жартылай канаттандырган чечим чыгарды.
Соттун чечими боюнча экс-президент А. Атамбаевдин булардын ар бирине 100 миң сомдон төлөп берүүсү милдеттендирилди. Жалпысынан А. Атамбаев 300 миң сом айыпка жыгылды.
