Categories

Катуу жааган кардан улам кырылган мал ээлерине өкмөт көмөк көрсөтөбү?

Буга чейин Ысык – Көл, Нарын облустарында катуу жааган кардан, сууктан бир нече миңдеген кой, эчкилер жана бодо малдар кырылган. Анда бир нече малчылар бир заматта мал жандыктарынан кур жалак калышты. Албетте, бул жаратылыштын айттырбай келген кырсыгы болду. Бирок, өкмөт ал келтирилген материалдык чыгымдардын ордун толтуруу боюнча азырынча ооз ача элек.

Ошентсе да бүгүн,  Жогорку Кеңештин “Ар кыл маселелер” саатында бир жума мурда жааган карда мал чыгымдарына кабылган фермерлердин маселеси көтөрүлдү. Бул маалыматты ЖКнын пресс кызматы билдирди.

Депутат Данияр Аттокуров 24-25-май күндөрүндө Ысык-Көл облусунун сырт жайлоолорунда жааган карда малчылар чоң чыгымга учурап, миңдеген малдар кырылгандыгын маалымдады. Данияр Аттокуров “Фермерлер Өкмөттөн жардам күтүп жатышат. Менчик мал болсо дагы кандайдыр бир көмөк көрсөтүү керек. Алар дагы өлкөнүн айыл чарбасына, экономикасына өз салымдарын кошуп келишкен. Андыктан, Өкмөттүн тиешелүү министрликтерин чакырып, кандай жардам көрсөтө алат, угуп койсок”,- деди.

Депутат Чыныбай Турсунбеков дагы 24-25-майдагы жаратылыш кырсыгы тоолуу Нарын облусунун жайлоолорундагы мал жандыктарын каптап өткөндүгүн ортого салды. Анын айтымында, миңдеген мал чыгымга учураган. Алардын бир тобу мал жандыктарын насыяга акча алып, сатып алышкан экен. Айрымдарынын акыркы малдары экен.

Чыныбай Турсунбеков: “Мындай шартта аткаруу бийлиги кол кабыш кылбаса, анда алсыздыгын көрсөткөн болот”,- деди.

 
Categories

Экс–президенттердин кол тийбестигин алуу боюнча мыйзам долбоору коомдук талкууга коюулду

ЖЭБдеги чуудан улам экс – президенттердин кол тийбестигин алуу боюнча ЖК депутаттары тарабынан көтөрүлгөн демилгени ишке ашыруу депутаттардын жайкы эс алууларына чейин бүткөрүлүшү керек экени айтылган эле. Ал үчүн атайын мыйзамдык шарттарды даярдоо керек болгон.

Атайын маалыматтарга караганда, парламентте экс-президенттердин кол тийбестигин алып салуу боюнча мыйзам долбоору иштелип чыгып, коомдук талкууга коюлганы маалым болду. Бул мыйзам долбоорунда “Кыргыз Республикасынын президентинин ишмердигинин кепилдиктери жөнүндө” мыйзамдагы экс-президенттин кол тийбестиги тууралуу 12-берене толугу менен өзгөртүлгөн.

Ал өзгөртүүлөргө ылайык, “экс-президент кызматта турган учурдагы аракети жана аракетсиздиги үчүн жоопко тартылбайт” деген бөлүгү толугу менен алынып салынып, экс-президентти жоопкерчиликке тартуу Баш прокуратуранын сунушу менен Жогорку Кеңеште добуш берүү аркылуу жүзөгө ашырылары киргизилген. Эгерде мурда иштеп кеткен президент кандайдыр бир кылмыш ишине тиешеси бар деп айыптала турган болсо, анда аны изилдөө үчүн депутаттык комиссия түзүлөт.

 
Categories

“ИХЛАС” ийилсе да сынбайт

Акыркы убактарда айрым белгилүү да, белгисиз да тараптардан «Ихлас» курулуш компаниясына карата атайын бир беткей каралоо, чагымчылдык иш- аракеттери активдүү жүргүзүлүүдө. Албетте, мындай жийиркеничтүү, арам иш-аракеттер атайын бир кара ниет Аллахтан коркпогон арсыз адамдардын бир тобу тарабынан уюштурулуп, коомчулукту удургутуп, козутуу максатын көздөйт. Анткен менен адал эмгек, аруу тилек, акыйкаттыкты бек тутуп акырет үчүн астейдил ак мээнетибиз менен күн санап өсүп бараткан биздин курулуш мекемебиздин бедели түшүп же, белибиз бошоп калбайт!

Тек гана коомчулуктун башын айлантып, кардарларыбызды күдүк ойлорго түртүп, түрдүү шек саноолорго жем ташталууда. Ошондуктан, биз мындай ыплас каралоо компаниясын  “көрө албастык жана көрпенделик” деп атап, кескин айыптайбыз! Бизди өкүндүргөнү, аталган каралоо компаниясына айрым Эл өкүлдөрү, тактап айтканда, Жогорку Кеңештин илим- билимдүү аттуу-баштуу, биз сыйлаган кээ бир депутаттардын жагдайды, маселенин чоо-жайын аңдап талдабай аралашып, парламент трибунасынан үстүккө-босток улам кайталап көтөрүп жатышат. Тактап айтканда, баш калаабыздын түштүк магистралынын аймагындагы 2, 8 га жер жөнүндө көбүрөөк сөз болууда. Бул жер маселеси алгач көтөрүлгөндө эле баары мыйзам  чегинде жасалган иш экендигин айтып, так маалымат бергенбиз. Ошондой эле ал жер тилкесиндеги курулуш иштери да бардык уруксат берүүчү органдардын мыйзамдуу уруксаты менен жүргүзүлүп жаткандыгын шаар мэри Албек Ибраимов да, курулуш агенттигинин жетекчилиги да бир нече жолу бышыктаган.

Шаарыбыздын ушул эле аймагында канчалаган курулуштар курулуп жатат. Акыркы 10-15 жыл аралыгында жүздөгөн ар түрдүү имараттар курулду. Атап айтканда, бир катар турак үйлөрдөн сырткары бир нече чет өлкөлөрдүн элчиликтеринин жаңы кеңселери курулду. Ошондой эле чет элдик белгилүү бир университетке 100 га тегеригиндеги эбегейсиз чоң жер тилкеси бөлүнүп берилгендигин баарыбыз көрүп-билебиз. Эмнеге ошолор боюнча бир сөз жок. Ал эми бизге окшогон ата-мекендик кыргыз мекемесин баса калышат? Эгерде дал ошол бизге берилген жер тилкесинде дагы да чет элдик элчилик, же чет өлкөлүк курулуш компаниясына берилип, курулуштар курулса эч ким ооз ачмак эмес. Азыркы бизге асылып жаткан жарма патриоттордун мекенчилдик сезимдери неге козголуп, эмнеге эбегейсиз көп сандаган гектар жерлер башкаларга берилгенде унчугушпаган? Кейиштүү жагдай, ушундай удургугуган ушактардын айынан курулуш иштерибиз аксап, түрдүү текшерүүлөргө туш болуп отурабыз. Керек болсо аталган жер тилкесиндеги курулуш иштери да убактылуу токтотулууда. Мында иштеп, туруктуу маяна алышып, үй-бүлөсүн баккан миңдеген адамдар ишсиз калышууда. Алардын көпчүлүгү көр оокаттын айынан Орусия өңдүү өлкөлөргө үй-бүлөлөрүн таштап, иш издеп кетүүгө аргасыз болушууда. Алардын убал-сообунан корксоңор боло, көрө албас көр пенделер! Ушинтип катуу айтууга аргасызбыз. Өз өлкөбүздө жумушчу орундарын түзүп, жаштарды иш менен камсыздап, миграция агымын азайтууга эбегейсиз зор салым кошуп, өлкөбүздүн экономикасына миллиондогон салык төлөмдөрүн төлөп жаткан бизге ушундай кыянаттык кыласыңарбы, бай болгурлар?! Карасанатайлыктын да чеги болот да! Кыргыз эли, айрыкча шаарыбыздын тургундары азыркыдай заманбап үйлөрдө жашап, таза абада жашоосуна неге кам көрбөшүбүз керек? Же ошол жерге да чет элдиктерге “чоң имараттарды” курууга берип коюп унчукпай олтура берсек боло береби? Дагы бир өкүнүчтүүү жагдай, биздин “Ихлас” курулуш компаниясына айтылуу шоопур Икрамжан Илмияновдун такыр тиешеси эзели болбогонун жана жоктугун биз бир нече ирет тилибиз тешилгенче безилдеп айтсак да айрым ушакчы маалымат каражаттары такыр ишенгилери келишпейт. Ошол эле учурда Икрам Илмиянов өзү дагы биздин компанияга тиешеси жок экенин тынбай айтып келет. Таң калычтуу жагдай, бул жалган дүйнөдө коомубуздагы айрым адамдар кашкайган чындыкты көрүп, билип турса да акыйкатка ишенбей, куру доомат, жалган жалаага ишенип жатышы өкүндүрөт. Азыр улуу рамазан айы. Аллах кармаган орозолорубузду кабыл кылып, берекесин берсин! Орозо кармаган бардык мусулман бир туугандарыбызды орозоңор кабыл болсун дейбиз. Рамазандын аякташы менен бизди ыксыз каралаган бардык тараптар менен, айрыкча маалымат айдыңындагы бир нече адамдар менен укуктук талаада күрөшөбүз. Тактап айтканда, сотко кайрылып, өзүбүздүн чындыгыбызды жана акыйкатыбызды далилдейбиз!

“Ихлас” компаниясынын негиздөөчүсү- Нурбек Осмонов.

 
Categories

Башкы прокурор Ө. Жамшитов “Тергөөдө күнөөсү далилденүүдө, чекитти сот коет”

Учурда Башкы прокурор Ө. Жамшитов Жогорку Кеңештин жалпы жыйынында өткөн жылда жасалган укуктук иштер боюнча отчет берип жатат. Ошону менен катар эле депутаттардын да суроолоруна жооп берүүдө.

Ал “Республика Ата-Журт” фракциясынын депутаты Руслан Казакбаевдин “Айрымдар саясий куугунтук болуп жатат дешүүдө. Анын себеби барбы”?   деген суроосуна жооп берди.

Өткүрбек Жамшитов: Айрым кылмыш иштер боюнча тергөө органдары күнөөсүн таап жатат. Далилдер жетиштүү болгондо, айыбы угузулуп жатат. Тараптардын укук-милдеттерин түшүндүрүү менен Кылмыш-процессуалдык кодекстин негизинде жүргүзүлүүдө. Аягына чекитти сот коюшу керек”, – деди.

Эске сала кетсек, мурдагы премьер-министр Сапар Исаков кечээ УКМКнын алдында, журналисттерге “алгач ММКларда С. Исаковдун наамын булгашып, анан кылмыш ишин козгоого кам көрүп жатышкан экен да”- деп, айткан эле.

 
Categories

М. Абылгазиев  Музейдеги каржылык мыйзам бузууларды текшерүү анын ачылышына таасирин тийгизбөөсү зарыл

Кыргыз Республикасынын Премьер-министри Мухаммедкалый Абылгазиев Улуттук тарых музейин реконструкциялоону аяктоо маселеси боюнча кеңешме өткөрдү. Бул маалыматты Өкмөттүн басма сөз кызматы билдирди.

Ал маалыматка караганда, өкмөт башчыга курулуш иштеринин жүрүшү, экспонаттар менен камсыздоо, ошондой эле экспозициялар концепциясы жана музейдин бизнес-планы тууралуу маалымдалды.

Мамлекеттик тарых музейинин директору Кеңешбек Алмакүчүков азыркы учурда реконструкция дээрлик аяктап калганын, медиастанцияларды жана интерактивдик үстөлдөрдү бир нече тилдеги кеңири маалымат менен ишке киргизүүгө даярдык жүрүп жатканын билдирди.

Премьер-министр Мухаммедкалый Абылгазиев музейдин реконструкциясын аяктоо жана бюджеттик каражаттарды сарамжалдуу сарптоону камсыздоо иштерин күчөтүүнү тапшырды.

Мухаммедкалый Абылгазиев: «Бардык күч-аракеттерге карабастан, тарых музейин реконструкциялоо абдан узакка созулуп кетти. Бул маселеде башаламандыкка жол бербөө кажет. Музейди оңдоонун жүрүшүндө каржылык бузуулар фактыларын укук коргоо органдарынын текшерүүсү анын ачылыш мөөнөтүнө таасирин тийгизбөөсү зарыл. Учурда реконструкция жүрүп жатканда, музейди стратегиялык объектилер тизмесине киргизүү маселесин иштеп чыгуу керек. Бул музейдин фондун сактоону шарттайт», – деди.

 
Categories

Мектепте балдарды окутуу 10-сентябрда баштап, 31-майда аяктоо сунуш кылынууда

Мектеп окуучулары үчүн окуу жылынын башталышын 10-сентябрга жылдыруу жөнүндө сунуш өкмөттө каралган соң, июнь айында чечилет. Министрлик окуу жылынын башталышын 10-сентябрда баштап, 31-майда аяктоону сунуш кылууда. Бул тууралуу Билим берүү жана илим министри Гулмира Кудайбердиева  билдирди.

Билим берүү жана илим министрлиги окуу жылынын аякташы менен аткарылган иштери боюнча коомчулукка маалымат берди.

Андагы маалыматтарга караганда, акыркы жылдары өлкөдө мугалимдердин саны кескин түрдө көбөйүп кеткен. Билим берүүнүн сапатын жакшыртуу максатында аз саат менен иштеген мугалимдерди кыскартуу боюнча январь айында буйрук чыккан. Учурда кыскартылган мугалимдерди кайрадан окутуп, даярдоо маселеси каралууда.

Аймактарды өнүктүрүү максатында республика боюнча 60 “Өсүү борборлору” түзүлсө, алыскы аймактарда жалпы саны 10 миңге жакын балдарды камтыган 120 бала-бакча ачылган.

Башталгыч класстын окуучулары үчүн атайын “Билим кж” сайты иштей баштады. Сайт мугалимдерге сабакты чыгармачылык менен түшүндүрүүгө, өздөштүрүүнүн кызыктуу жана пайдалуу жолдорун ачат. Ал эми окуучулар үчүн материалдарды өз алдынча үйрөнүүгө, сабакка даярданууга, билимин бекемдөөгө жана дүйнө таанымын кенейтүүгө шарт түзөт.

Сайттан мугалимдер менен окуучулар 2 тилдеги көп сандаган видеоматериалдарды, кеңири аудиотеканы, интерактивдүү тексттерди  жана көнүгүүлөрдү, дүйнө таанымды кеңейтүүчү кызыктуу фактыларды табууга болот. Ошону менен катар эле билим берүү системасы үчүн, окуу китептеринин, ошондой эле  мугалимдердин жетишсиздигин жеңилдетет.

Эске сала кетсек, ЖКнын төрагасы Дастанбек Жумабеков окуу жылын 20-сентябрда баштоону сунуш кылган эле.

 
Categories

Бүгүн Жогорку Кеңеш  Башкы прокурор Өткүрбек Жамшитовдун отчетун угат

Бүгүн Жогорку Кеңеш 2017-жылга карата КР Башкы прокурорунун отчетун, ал эми эртең 31-майда КТРКнын Байкоочулар кеңешинин отчетун угат. Бул маалыматты Жогорку Кеңештин Басма сөз кызматы мурдатан эле билдирген болчу.

Ал маалыматтарга караганда, мыйзамдуулуктун абалы жана аны чыңдоо боюнча прокуратура органдары тарабынан аткарылган иштер тууралуу Кыргыз Республикасынын Башкы прокурорунун отчетун угуу болот.

Эске сала кетсек, кечээ Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин Регламенти боюнча комитетинин жыйынында баш прокурор Өткүрбек Жамшитов маалымат берген болчу.

Ошону менен катар эле  эртең жалпы жыйында Коомдук телерадиоберүү корпорациясынын иши тууралуу Байкоочу кеңешинин отчетун угушат.

 
Categories

Туристтик сезон маалында коопсуздукту 3000 ден ашык милиция кызматкерлери камсыздайт

Ички иштер министрлиги жана анын аймактык бөлүмдөрү тарабынан 2018-жылдын туристтик сезон маалында коомдук тартип менен жарандардын коопсуздугун камсыздоого багытталган бир катар уюштуруучулук иш чаралар жүргүзүлдү. Мындай маалыматты ИИМдин Басма сөз кызматы билдирди.

Бүгүнкү күнү республика аймагында 366 курорттук-саламаттыкты чыңдоо мекемелери бар. Элдер көп эс алган жайларда коомдук коопсуздукту 3000 ашуун милиция кызматкерлери менен 2000 жакын ыктыярлуу элдик кошуундар камсыздайт.

Ысык-Көл облусунун аймагына ИИМдин “Шумкар” атайын багыттагы полкунун 200 кызматкери тартылат. Ал эми, милиция кызматкерлеринин санын өсүшү өлкөдөгү ыкчам кырдаалга жана туристтердин келүүсүнө жараша болот. Ысык-көлдүн жээгинде милиция кызматкерлеринин жайгаштырылуусу аталган аймакты тейлеген курорттук-саламаттыкты чыңдоо мекемелеринин жетекчилеринин сунуштарын эске алуу менен иш-жүзүнө ашат.

Коомдук тартипти жана жол кыймылынын коопсуздугун камсыздоо үчүн ИИОнун күчүн жана каражаттарын эсепке алууну макулдашуу максатында Ысык-Көл РИИБдин Бостери айылындагы милициянын аймактык бөлүмчөсүндө Ыкчам штаб түзүлдү. Жарандардын кайрылуулары жана арыздарын кабыл алуу менен ага ыкчам аракеттенүү, андан сырткары, эс алуучуларга тиешелүү деңгээлде жардам көрсөтүү үчүн Ыкчам штабдын кызматкерлери күнү-түнү кызматын өтөшөт.

Мыйзамдуулукту жана кызматтык тартипти бузбоо максатында туристтер менен пикир алышуу үчүн өздүк курам даярдыктан өткөрүлдү. Коомдук коопсуздукту камсыздоого тартылган кызматкер тарабынан мыйзамсыз иш-аракеттер жасалбашы үчүн Ысык-Көл ОИИБдин башчыларынан жана кызматкерлери кирген офицердик патруль түзүлдү.

Республика аймагында туруктуулукту камсыздоо жана кылмыштарды аныктоо, иликтөө жана ага бөгөт коюу максатында ыкчам алдын алуу иш-чаралары жүргүзүлүүдө.

2018-жылдын туристтик сезон маалында жол кыймылынын коопсуздугун камсыздоо максатында Кыргыз Республикасынын ИИМдин Жол кыймылынын коопсуздугун камсыздоо башкы башкармалыгынын көчмө посттору жайгаштырылды: «Кордай (Казахстан)–Бишкек», «Манас» Аэропорту -Бишкек», «Түндүк бурулуш жолу –Бишкек», «Бишкек-Балыкчы–Чолпон-Ата–Каракол». Кыргыз Республикасынын ИИМдин Жол кыймылынын коопсуздугун камсыздоо башкы башкармалыгынын кызматкерлеринин кызмат өтөөсү фото-видеону фиксация кылган видео-регистраторлор, радардык жабдуулар (Визир) менен камсыздалган, автоунаанын кузовунда ишеним телефондору көрсөтүлгөн (ИИМ-66-23-31; ЖКККББ–63-09-00; 63-09-01) патрулдук автоунаалар менен гана бөлүштүрүлүп, бекитилген постторго ылайык кызматта болушат. Баардык патрулдук экипаждар POS-терминалдар менен камсыздалган. Жол кыймылынын эрежелерин бузган айдоочулар же эс алуучулар айып пулду терминал аркылуу («Виза», «Золотая корона», «Эл-карт» жана «Мастер карт») төлөөгө ыңгайлаштырылган. Жогорудагы ишеним телефондору стикерлер менен баннерлерде жазылуу.

Андын сырткары, туристтик сезон маалында, Боом капчыгайында, Кемин районунда, Төө-Ашуу өтмөгүндөгү «Бишкек-Ош» автожолунда ЖКККББнын күнү-түнү иштей турган посту уюштурулуп, жол-транспорттук кырсык катталган жерге өз убагында барып, жабырлануучуларга биринчи медициналык жардам көрсөтүү максатында Кыргыз Республикасынын ӨКМдин тез жардам каретасы менен куткаруучулардын нөөмөтү уюштурулду.

Күнү-түнү иштей турган Каргыз Республикасынын күч түзүмдөрүнүн жана өзгөчө кырдаалдар учурунда жардам бере тургандардын ишеним телефондору боюнча, ошондой эле Кыргыз Республикасынын аймагында жол кыймылынын эрежелерин бузгандар административдик жоопкерчиликке тартылуусу тууралуу маалыматты камтыган атайын стикерлер иштелип чыкты. Аталган стикерлер Кыргыз Республикасынын аймагына келген чет өлкөлүк туристтерге төмөнкү көзөмөл өткөрүү пункттардан өтүү учурунда таратылмакчы: «Чалдовар», «Ак-Жол», «Кара-Дарыя».

 
Categories

Кадыр түн 11-июндан 12-июнга караган түнү болору айтылууда

Кадыр түн Кыргызстанга 11-июндан 12-июнга караган түнү болорун муфтияттан маалымдашууда.

“Кадыр түн июндун 11инен 12исине карганда болот, бирок бул түн Рамазандын акыркы 10 күнүнүн так күндөрдүн биринде жашырылган”, — деп айтышты муфтияттан.

Кыргызстандыктар Кадыр түндү былтыр, 2017-жылы, 21-июндан 22-июнга караган түнү тоскон.

Мурдатан маалым болгондой Кадыр түн орозонун 27сине караган түнү белгиленип келет. Ал эми быйыл орозо 15 же 16-июнда аяктай турганы айтылууда.

 
Categories

Мурдагы премьер – министр Сапар Исаков: “Мени камаганга негиз жок”

Мурдагы премьер – министр Сапар Исаков бүгүн УКМКга кирип бара жатып, журналисттердин суроолоруна жооп берди.Сапар Исаков: “Менде камакка алуу коркунучу жок. Ал үчүн укуктук негиз керек. Адам мыйзамды бузганда, ыплас иштерди жасаганда камакка алынышы керек. Мен тазамын.ЖЭБдеги баалардын жогору көрсөтүлүүсүндө мен жоопкер эмесмин. Ал учурда биз Кыргызстанга сырттан инвестиция тартып келишибиз керек эле. Ал боюнча